4
ए मालिकमन, आपलो-आपलो कमेयामन संगे सत आउर नंगत बेबार करा, एके समजुन कि सरग ने तुमचो बले गोटोक मालिक आसे।
नंगत चलनी-बुलनी काजे सला
2 सरलगा पारथना करते राहा, आउर पारथना करतो बेरा चेत ने रउन धन-धन करा।
3 आमचो काजे बले पारथना करते राहा कि महापरभु आमके नंगत खबर सुनातो काजे असन बाट दखाओ कि आमी किरिस्त चो भेद के सांगुक होओ; एई गोट सांगतो किरता मय जयल-घरे आंसे।
4 पारथना करा कि हुन नंगत खबर के जसन सुनातोर आय उसनेचे सुनाउक होओ।
5 मोहका के खुबे मोल चो आय समजुन बिजातीमन संगे नंगत बुद ले चलनी-बुलनी करा।
6 तुमचो गोट अमदेया दया ले आउर काय रसिया होओ कि तुमके सपाय लोगमन संगे नंगत-नंगत गोट बात करुक जानुक होओ।
सरासरी जुहार
7 मोचो मीत भाई आउर पतेयातो लाईक कमेया तुखिकुस, जोन परभु चो सेवा ने मोचो संगवारी आय, हुन, मोचो सपाय गोट तुमके सांगेदे।
8 मय हुनके तुमचो लगे एईकाजे पठायंसे कि तुमी आमचो हाल के जाना आउर हुन तुमचो मन के अस्तिर करो।
9 हुनचो संगे, आमचो पतेयातो लाईक मीत भाई, उनेसिमुस के बले पठायंसे, जोन तुमीमन ले ची आय। एमन तुमके एथा चो सपाय गोटमन के सांगदे।
10 अरिस्तरखुस जोन मोचो संगे जयल-घर ने आसे आउर मरकुस जोन बरनबास चो भाई लागे (जेचो बारे ने तुमके हुकुम मिरु रली कि हुन ईलोने हुनके इजित-मान करा।),
11 आउर जेसु जोन जूसतुस बले बलाय होयसे, ए तीनो, तुके जुहार बलसोत। खतना करलोमन ले एमन ची महापरभु चो राज काजे मोचो संगवारी आत। एमन चो किरता मोके अस्तिर मिरली।
12 इपफरास जोन तुमचो संग चो आय, आउर किरिस्त जीसु चो कमेया आय; हुन तुमीमन के जुहार बलेसे। हुन तुमीमन काजे अमदेया गोटोक मन ले पारथना करेसे कि तुमी महापरभु चो मन-इछा ले समपुरन बिसवास ने चमकट राहा।
13 हुन तुमचो काजे, लवदीकिया काजे आउर हियरापुलिस चो लोगमन काजे खुबे मसागत करते रहेसे, मय एचो साकी आंसे।
14 मीत भाई, बईद लूका आउर देमास बाटले तुमके जुहार।
15 लवदीकिया चो भाईमन के आउर बईन नमुफास आउर हुनचो घर ने रूंडतो मंडली के मोचो बाटले जुहार बलुन दियास।
16 ए चिटी के तुमचो थाने पढ़लोने लवदीकिया चो मंडली ने बले पढ़ोत आउर पाछे लवदीकिया चो मंडली काजे मय लिखलो चिटी के तुमी बले पढ़ा।
17 अरखिपुस के सांगा, हुनके सोपलो परभु चो सेवा-बुता के चेत ले पुरा करो।
18 मय पउलुस, आपलो हाथ ले जुहार लिखलेसे। जयल-घरे, मोके बांधलो सिकरामन तुमी सूरता करा। महापरभु चो दया तुमचो उपरे होते रओ। आमीन।