तीमुथियुस के पठातोर
3
आमी आउर कटलाउक नी सकलो किरता एथेंस सहर ने एकला रउक पड़ली;
2 आउर आमी तीमुथियुस के, जोन किरिस्त चो नंगत खबर सुनातोने आमचो भाई आउर महापरभु चो कमेया आय, तुमचो लगे एईकाजे पठालु कि हुन, तुमके बिसवास ने चमकट करो आउर उकसाओ
3 कि कोनी असनी तकलीस पाउन इसु-हेंव नी होओत। कसनबलले तुमी जानेसाहास, आमके एई डंड-दुखमन सहतो काजे बाछलोसे।
4 जसन आमी तुमचो संगे रलो बेरा डंड-दुख सहुक पड़ेदे बलुन आगे ले सांगु रलु आउर एबे तुमी जानसास असनी ची होली।
5 एईकाजे मय कटलाउक नी सकुन असन बिचार करले कि परखतो बीता तुमके परखलो होती आउर आमचो मसागत काय फोकाहा तो नी होली? एई किरता तुमचो बिसवास चो हाल जानतो काजे तीमुथियुस के पठाले।
तीमुथियुस बाटले खबर
6 एबे तीमुथियुस तुमचो बाटले एता अमरलो आउर तुमचो बिसवास आउर मया चो नंगत खबर सुनालो आउर ए गोट बले सांगलो, तुमी आमके अमदेया मया ले सूरता करसास आउर आमके दखतो काजे खुबे मन करसास, जसन तुमके दखतो काजे आमी बले मन करुंसे।
7 ए भाईमन, आमचो सपाय डंड-तकलीस बेरा, तुमी बिसवास ने चमकट आसास गुने आमके अस्तिर लागली।
8 कसनबलले तुमी परभु ने चमकट आसास जानुन आमके जीव ने जीव ईलो असन लागेसे।
9 तुमचो किरता आमचो महापरभु पुरे आमी खुबे हरिक आसुं, आउर हुनचो पलटा तुमचो काजे कसन बरन ले महापरभु के धन-धन करुक सकुंदे?
10 आमी रात-मंजन मन देउन पारथना करते रहुंसे कि तुमके दखुक होओ आउर तुमचो बिसवास चो घटी पुरा होओ।
11 एदांय आमचो महापरभु आउर बुआ आउर आमचो परभु जीसु, आमके तुमचो लगे एतो काजे साका होओ;
12 आउर जसन आमी तुमके मया करुंसे, उसनेची तुमचो मया बले गोटोक-दुसर ले आउर जमाय लोगमन संगे बाड़तो-लामतो काजे परभु आमके साका होओ।
13 हुन तुमचो मन के बरसक करो कि जिदलदांय आमचो परभु जीसु आपलो सबु पवितर लोगमन संगे एयदे, तेबे तुमके आमचो महापरभु आउर बुआ चो पुरे काई दोख नोहलो पवितर पाओ।