पउलुस करतो सेवा-बुता
2
ए भाईमन, तुमी खुदे जानेसाहास, आमी तुमचो लगे एतोर फोकाहा नी होली,
2 आउर तुमी ए बले जानेसाहास, आगे फिलिपी ने डंड-तकलीस उठातोने आमी महापरभु दिलो ढाढ़ुस ले हुनचो नंगत खबर के खुबे बिरुद करले बले तुमके सुनालु।
3 कसनबलले आमी कोकई गुपातो काजे सला नी देउंसे, असुद बिचार आउर कपट ले बले नोआय।
4 मानतर महापरभु आमके भोरसा करुन जसन नंगत खबर के सोपलो, उसनेची आमी सांगुसे। एचोले कोनी मनुक के नाई मानतर आमचो मन के परखतो महापरभु के हरिक करुंसे।
5 कसनबलले तुमी पक्का जानेसाहास आउर महापरभु गवा आसे कि आमी लालच करुन काई घाई नी भीड़ालु आउर केबई फोबानी गोट नी गोटेयालु।
6 आउर किरिस्त चो पठालो-लोग होलो किरता आमी तुमचो उपरे बोजा तेंगड़ुक सकतु, तेबले बले आमी लोगमन ले, तुमचो ले होओ नोहले कोचई ले होओ, मान पाउक मन नी करलु।
7 मानतर जसन माय, गोरस खातो पिलामन के पोसुआय उसनेची आमी बले तुमचो मंजी रउन सुसार बेबार करलु।
8 आमी तुमके खुबे मया करुआंव गुने, सोजे महापरभु चो नंगत खबर के ची नी सुनालु, मानतर आपलाहान जीव के बले तुमके देतो काजे तियार रलु, एईकाजे कि तुमी आमचो लाडरा रलास।
9 ए भाईमन, आमचो मसागत आउर तकलीस के जानसास कि आमी, तुमीमन ले कोकई बले काई बोजा नी होओ बलुन रात-मंजन बुता-भयना करुन-करुन तुमके महापरभु चो नंगत खबर सुनालु।
10 तुमी खुदे गवा आसास आउर महापरभु बले गवा आसे कि तुमी बिसवास करुमन चो मंजी, आमचो चलनी-बुलनी कसन पवितर, धारनिक आउर दोख नोहलोर रली।
11 कसनबलले तुमी जानेसाहास, जसन बुआ आपलो पिलामन ले बेबार करुआय, उसनेची आमी बले तुमी जमाय के उकसाते, अस्तिर करते आउर चेतानी देते रलु
12 कि तुमचो चलनी-बुलनी महापरभु के भावतो लाईक होओ, जोन तुमके आपलो राज आउर मयमा चो भागी होतो काजे हागदेयसे।
13 एईकाजे आमी महापरभु के सरलगा धन-धन करुंसे कि जिदलदांय आमी महापरभु चो गोट तुमके सुनालु, तेबे तुमी हुनके मनुकमन चो गोट नाई, मानतर महापरभु चो गोट आय बलुन मानलास आउर ए सत गोट आय। तुमीमन ले जोन कोनी हुनके पतेयालास, हुनीमन ने ए गोट काम करेसे।
14 ए भाईमन, तुमी जहूदिया परघन ने रतो महापरभु चो मंडलीमन जोन किरिस्त जीसु ने आसोत, हुनमन असन चलसास। कसनबलले तुमी बले आपलो लोगमन ले उसने तकलीस पावलास जसन हुनमन जहूदीमन ले पावला।
15 जहूदीमन, परभु जीसु आउर अगमजानीमन के मोरते मारला आउर आमके बले डाटा-टेवा करसोत। हुनमन महापरभु के हरिक नी करसोत आउर सबु लोग चो बिरुद करसोत,
16 आउर हुनमन, बिजातीमन* मुक्ति पावतो नंगत खबर सुनातोने आमके बिरुद करसोत, असन करुन हुनमन आपलेई ची पाप चो हांडी भोरसोत। मानतर हुनमन चो उपरे महापरभु चो बायबिकाल रीस पक्का अमरलीसे।
मंडली के फेर भेटुक मन करतोर
17 ए भाईमन, मन ले नाई मानतर तुमचो ले डंडिक काजे आंईक आड़ होलु, तेबे तुमके दखतो काजे खुबे मन खोजेसे आउर मसागत बले करेंसे।
18 एईकाजे आमी, जुगे करुन मय पउलुस, घन-घन तुमचो लगे एतो काजे होले, मानतर सयतान आमके छेका-फांदा करली।
19 आमचो परभु जीसु एतो बेरा, परभु पुरे आमचो आसा, हरिक आउर मयमा चो मुकुट काय, तुमी ची नोआहास?
20 आमचो मयमा आउर हरिक तुमी ची आहास।