थिसलुनीके चो मंडली
काजे पठालो-बीता पउलुस चो पईल चिटी
1
पउलुस, सिलवानुस आउर तीमुथियुस बाटले, थिसलुनीके चो मंडली के चिटी, जोन आमचो बुआ महापरभु आउर परभु जीसु किरिस्त ने आसोत:
तुमके दया आउर अस्तिर मिरते रओ।
थिसलुनीकियामन चो चमकट बिसवास
2 आमी तुमीमन काजे पारथना करुंसे आउर अमदेया तुमी सपाय काजे महापरभु के धन-धन करुंसे,
3 आउर तुमचो बिसवास चो बुता, मया ले करलो मसागत आउर आमचो परभु जीसु किरिस्त ने तुमचो आसा चो धीरजा के, आमचो महापरभु आउर बुआ चो पुरे अमदेया सूरता करुंसे।
4 महापरभु मया करतो ए भाईमन, आमी जानुंसे तुमी महापरभु चो बाछलो लोग आहास।
5 कसनबलले आमचो बाटले नंगत खबर तुमचो लगे सोजे गोट ले चे नाई मानतर सकत, पवितर आत्मा आउर पक्का सत ले अमरली, आउर तुमी जानेसाहास, तुमचो मंजी रलो बेरा आमी तुमचो नफा काजे कसन जीवना जीवते रलु।
6 तुमी खुबे डंड-तकलीस ने बले आमी सुनालो नंगत खबर के, पवितर आत्मा चो हरिक ले मानुन आमचो आउर परभु चो असन चाल चलसास।
7 एचोले तुमी मकिदुनिया आउर अखाया ने रतो सपाय बिसवासीमन काजे गोटोक बाट-दखाउ बनलास।
8 कसनबलले तुमचो थान ले परभु चो नंगत खबर सोजे मकिदुनिया आउर अखाया ने चे नी सुनाला मानतर महापरभु के तुमी पतेयातो चो गोट सबु जगा ने असन उड़ली कि आमके कोकई काई सांगुक ची नी लागे।
9 कसनबलले हुनमन खुदे सांगुआत कि आमी तुमचो लगे ईलोके तुमी कितरो सगा-मान करलास, आउर तुमी कसन मूरत सेवा के छांडुन महापरभु बाटे बोहड़लास जेचोले तुमी एदांय सत आउर जीवत महापरभु चो सेवा करसास,
10 आउर महापरभु चो बेटा जीसु के सरग ले एतो बाट दखते रयसास, जेके महापरभु मोरलोमन ले जियालो, जोन आमके महापरभु चो एतो बिती रीस-डंड ले बचाउआय।