उजर चो बेटा-बेटीमन असन चला
5
एईकाजे लाडरा पिलामन असन महापरभु चो बाट ने चला,
2 जसन किरिस्त आमके मया करलो आउर आपने नंगत बास चो भेंट बनुन आमचो काजे महापरभु चो पुरे जतरा होलो, उसने तुमी बले गोटोक-दुसर के मया करा।
3 तुमचो मंजिगता बेबिचार आउर काई बरन चो असुद बुतामन नोहले लालच चो गोट-बात बले नी होओ; जसन पवितर लोगमन काजे होतोर आय।
4 तुमीमन घिन-घिना गोट, एरा गोट, हांसी-खेली गोट नी गोटेयाहा; कसनबलले असन गोट गोटेयातोर नी बने मानतर महापरभु के धन-धन चे करा।
5 तुमी जानासाहास कि कोनी बेबिचारी, असुद नोहले लालची (लालच, मूरत सेवा करलो असन आय), एमन किरिस्त आउर महापरभु चो राज ने हकदार होउक नी सकोत।
6 दखा, कोनी तुमके ए फोकाहा गोटमन ले धोका नी देओत, कसनबलले एई बुतामन किरता महापरभु, हुनके नी मानतो लोगमन के रीस होयसे।
7 एईकाजे तुमी असन लोगमन चो संगी नी बना।
8 तुमी आगे अंधार चो लोग रलास बललोने पाप बुतामन करते रलास मानतर एदांय परभु ने उजर चो लोग आहास, एईकाजे उजर चो बेटा-बेटीमन असन चला।
9 कसनबलले उजर चो फर सबु बरन चो भलई, धरम आउर सत आय,
10 आउर परखुन दखा कि परभु के काय भायसे।
11 अंधार चो फोकाहा बुतामन ने नी मिसा, मानतर असन बुतामन के सपाय चो पुरे आना।
12 कसनबलले हुनमन चो खुसनाय करलो बुतामन चो बारे ने गोटेयातोर बले लाज गोटोक आय।
13 मानतर जिदलदांय उजर बरेसे तेबे सपाय दखा देयसे, कसनबलले उजर ले सपाय छुक-छुका दखा देउआय।
14 एई किरता हुन बलेसे:
“ए सोवतो बीता,
चेत आउर मोरलोमन थान ले जीव उठ;
तेबे किरिस्त चो उजर तुचो उपरे बरेदे।”
15 एईकाजे धियान दियास, कि तुमी कसन चलसास: बुद नोहलो लोग असन नाई मानतर बुद बीता असन चला।
16 मोहका के नी छांडा, कसनबलले एबे अडरा समया आय।
17 एईकाजे भकवा नी होआ, मानतर परभु चो इछा के जाना।
18 मंद पीउन मतवार नी होआ, कसनबलले एचोले अडरा बुता करुक होयसे, मानतर पवितर आत्मा ने समपुरन होआ, हुनी तुमके समालेदे।
19 तुमी सपाय मिसुन भजन गीत, जय-जय गीत आउर आत्मिक गीत गाहा, आउर आपलाहान मने परभु काजे भजन-गीत सुमरते राहा।
20 आउर सपाय गोटमन काजे आमचो परभु जीसु किरिस्त चो नाव ले महापरभु बुआ के अमदेया धन-धन करते राहा।
21 किरिस्त के मानुन गोटोक-दुसर चो हक ने राहा।
बायले-मनुक चो गोट
22 ए बायलेमन, तुमी आपलो-आपलो मनुक चो हक ने राहा जसन तुमी परभु चो हक ने रयसाहास।
23 कसनबलले बायले चो मुंडी मनुक आय, जसन मंडली चो मुंडी किरिस्त आय आउर हुन, आपलो देहें बललोने मंडली चो मुक्ति देउआय।
24 मानतर जसन मंडली किरिस्त चो हक ने आसे, उसने बायलेमन के सबु गोटमन ने आपलो-आपलो मनुक चो हक ने रतोर आय।
25 ए मनुकमन, आपलो-आपलो बायलेमन के मया करा, जसन किरिस्त बले मंडली के मया करलो आउर हुनचो काजे आपलो जीव दिलो,
26 कि हुनके महापरभु चो बचन चो सकत ले पवितर बनाओ आउर पानी ले धोउन सुद करो,
27 आउर हुन, मंडली के गोटोक दुली असन आपलो काजे मयमा चो बनाओ, जेचो थाने काई दाग आउर झुरली नी रओ कि हुन पवितर आउर दोख नोहलोर होओ।
28 असने ची ए नंगत आय कि मनुकमन आपलो-आपलो बायलेमन के आपलो देहें असन मया करा। जोन आपलो बायले के मया करेसे, हुन आपने के मया करेसे।
29 कसनबलले केबई कोनी आपलो देहें के नी घिनियाये मानतर हुनके पाला-पोसा करेसे, जसन किरिस्त बले आपलो मंडली के करेसे।
30 कसनबलले आमी हुनचो देहें चो अंग आव।
31 जसन बचन ने लिखलीसे,
“एई किरता मनुक आपलो आया-बुआ के छांडुन
आपलो बायले संगे रयदे,
आउर हुनमन दुनो गोटकी देहें होदे।”*