किरिस्त ने गोटकी सोर रतोर
4
परभु चो सेवा किरता मय कयद ने आंसे आउर जोन तुमके हागदिलोसे हुनचो लाईक जीवना जीवतो काजे गुहारेंसे,
2 बललोने अमदेया सोज आउर सीदा ले, धीरजा धरुन मया ले गोटोक-दुसर चो गोट के सहा;
3 आउर पवितर आत्मा ने मिलुन-मिसुन गोटकी सोर ने रतो काजे मसागत करा।
4 जसन तुमी गोटकी देहें आहास, आउर गोटकी पवितर आत्मा आसे, तुमके गोटकी आसा चो भागी होतो काजे महापरभु हागदिलोसे।
5 गोटकी ची परभु, गोटकी ची बिसवास आउर गोटकी ची बपतिस्मा आय,
6 आउर सपाय चो गोटकी ची महापरभु आउर बुआ आय जोन सबुले बड़े, सबु चो मन ने काम करेसे आउर सबु ने आसे।
7 मानतर किरिस्त दिलो दान हिसाब ले आमी सपाय के दया बाटुन दिलोसे।
8 एईकाजे धरमसास्तर ने लिखलीसे:
“जेबे हुन डेंग ने चेगलो,
हुन कयदीमन के बांधुन नीलो, आउर मनुकमन के दान दिलो।”†
9 “हुन डेंग ने चेगलो” बललोने, काय जानुक होयसे? एचोले ए जानुक होयसे कि हुन मंजपुर चो तले बले उतरु रये।
10 आउर जोन उतरलो, ए हुनी आय जोन बादरी ले बले उपरे चेगलो कि हुन सपाय के समपुरन करो।
11 हुन, कोकई पठालो-लोग होतो काजे, कोकई अगमजानी होतो काजे, कोकई नंगत खबर सुनातो काजे, कोकई दखा-राखा करतो काजे, आउर कोकई सिखिया देतो काजे बरदानमन दिलो,
12 जेचोले पवितर लोग, सेवा करतोने सिद होओत आउर किरिस्त चो देहें बललोने, मंडली चो बाड़ती होओ,
13 जिदलदांय ले आमी बिसवास ने आउर महापरभु चो बेटा चो गियान ने गोटकी नी होउं, हुदलदांय ले किरिस्त ने लंग-लंगा बाड़ुं कि नंगत मनुक-गुन ने समपुरन होउं।
14 एईकाजे कि आमी एदांय पिलामन असन नी रउं, जोन मनुक चो फंद सिखिया आउर चलाक गोट ले, आउर भरमातो उआटमन आउर सिखिया ने भुलकसोत।
15 मानतर आमी, मया ले सत गोटेयाते सपाय गोटमन ने किरिस्त असन बाड़ते जाउं, जोन आमचो मुंडी आय।
16 किरिस्त सपाय बरन चो अंगमन के गठमन ले जोड़ुन गोटोक नंगत देहें बनायसे, आउर सपाय अंगमन आपलो बुता के मया ले करलोने देहें चो बाड़ती होयसे आउर आपने के बड़ायसे।
किरिस्त ने नवा जीव
17 एईकाजे मय तुमके परभु ने चेतायंसे कि तुमी एदांय बिजातीमन असन अडरा नीती ने नी चला।
18 हुनमन चो बुद गुपलीसे आउर आपलो ओगियान आउर मन चो कटुर होलो किरता हुनमन महापरभु ले मिरतो जीव ले लापी आसोत;
19 आउर हुनमन लाज नोहलो सबु बरन चो अडरा बुतामन करतो टकर पड़लासे।
20 मानतर तुमी किरिस्त चो बारे ने नंगत सिखिया पावलासाहास।
21 जसन जीसु ने सत आसे, तुमके बले हुनचो चेलामन असन नंगत चलनी-बुलनी काजे सिखिया दिलोर आसे।
22 एईकाजे तुमी आगे चो अडरा चलनी-बुलनी चो टकर के छांडा, जोन तुमके अडरा लालचमन ने गुपायसे
23 जेचोले तुमी बुद आउर आत्मिक चलनी-बुलनी ने नवा होते जाहा,
24 आउर तुमचो मनुक गुन नवा होओ, जेके महापरभु चो असन सत-धरमाती आउर पवितर ले बनालोर आसे।
25 एईकाजे फंद गोटेयाउक छांडुन भाति सबु लोग आपलो घर-लग चो लोगमन संगे सत गोटेयाहा, कसनबलले आमी सबु गोटकी देहें चो अंगमन आव।
26 तुमी रीस होले बले, रीस ले काई पाप नी करा; बेर बसु-बसु तुमचो रीस उतरो,
27 आउर सयतान के मोहका नी दियास।
28 चोर एदांय चोरुक छांडो, मानतर काई भलई बुता करो, कसनबलले जेके चिपा आसे, हुनके दान देउक सको।
29 बाकना गोट नी गोटेयाहा, मानतर सहरातो गोट गोटेयाहा, जेचोले तुमचो बाड़ती आउर सुनतो लोगमन चो भलई होओ।
30 महापरभु चो पवितर आत्मा के मुरमुरा नी करा, कसनबलले छंडावा चो दिन काजे महापरभु तुमके पवितर आत्मा ले चीना दिलोसे।
31 आउर सबु बरन चो कपट, रीस, झगड़ा, बदी देतोर आउर बईर, ए सबु अडरा गोट के छांडा।
32 गोटोक-दुसर के जीव-दुखा आउर दया करा, गोटोक-दुसर चो पाप के खेमा करा जसन किरिस्त बाटले महापरभु तुमचो पाप के खेमा करलो।