बिजातीमन चो मंजी पउलुस सेवा करतोर
3
महापरभु, जहूदी आउर बिजातीमन के किरिस्त ने गोटकी करलो आउर तुमी बिजातीमन के, किरिस्त जीसु चो नंगत खबर सुनालो किरता, मय पउलुस कयदी होलेसे।
2 महापरभु चो दया ले, तुमचो भलई काजे मोके सोपलो बुता चो बारे ने तुमी पक्का जानास,
3 हुन भेद चो गोट मोके दरसन बाटले मिरली, ए गोट के मय आगे चे तुमके खिंडिक असन लिखलेसे,
4 जेके तुमी पढ़ुन जानुक सकास कि किरिस्त चो बारे ने महापरभु चो हुन भेद के मय कितरो समजेंसे।
5 ए भेद चो गोट के, जसन एबे हुनचो पवितर पठालो-लोगमन आउर अगमजानीमन के आत्मा बाटले दखाला, उसन आगे-जुगे चो लोगमन के नी दखाला
6 बललोने, किरिस्त जीसु चो नंगत खबर सुनातो बाटले बिजातीमन बले हुन बाटा चो हकदार, गोटकी देहें चो अंग आउर हुनी बायदा चो संगी आत।
7 मय, महापरभु चो दया चो हुन दान हिसाब ले, जोन हुनचो अचरित सकत हिसाब ले मोके दिला, हुन नंगत खबर चो सेवक बनले।
8 मय, सबु पवितर लोगमन ले खुबे नानी आंय, फेर बले मोके बिजातीमन के किरिस्त चो नंगत खबर सुनातो दया मिरली, जोन खुबे महांग धन असन आय,
9 आउर सपाय लोगमन के हुन भेद चो गोट के सांगतो काजे कि, जोन सपाय जाकमन के बनाउ महापरभु ने संवसार चो मूर बेरा ले लुकलोर रये।
10 एदांय, मुखियामन आउर हक संगातोमन जोन सरगपुरे आसोत, हुनमन मंडली के दखुन महापरभु चो बरन-बरन चो गियान के जानसोत,
11 जेके महापरभु, आपलो जुग-जुग चो उआट हिसाब ले आमचो परभु किरिस्त जीसु ने पुरा करुन रये।
12 किरिस्त के बिसवास करलो किरता आमके ढाढ़ुस आउर भोरसा संगे महापरभु लगे जातो हक आसे।
13 एईकाजे मय तुमके गुहारेंसे कि जोन तकलीस मय तुमचो काजे पायंसे, हुनचो किरता तुमी धीरजा नी छांडा, कसनबलले हुन तुमचो मयमा काजे आय।
किरिस्त चो मया
14 एई किरता मय बुआ महापरभु चो पुरे डंडासरन करेंसे,
15 कि हुनचेई ले सरगपुर आउर मंजपुर चो सपाय कुटुम नाव पायसोत।
16 मय पारथना करेंसे, महापरभु आपलो मयमा चो धन हिसाब ले, तुमके ए बर देओ कि तुमी हुनचो आत्मा बाटले सकत पाउन आपलो नंगत मनुक-गुन ने बाड़ते जाहा;
17 आउर बिसवास बाटले, किरिस्त तुमचो मन ने रओ कि तुमी मया ने जड़ धरुन पाया चमकट बनाउन राहा,
18 जेचोले सपाय पवितर लोगमन संगे किरिस्त चो मया के समजतो सकत मिरो कि हुनचो मया चो लाम, ओसार आउर डेंग-थाक कितरो आय,
19 आउर तुमी किरिस्त चो मया के जाना जेके आमी, आपलो बुद ले समजुक नी सकुं, कि तुमी महापरभु चो सपाय गुनमन ने संपुरन होआ।