किरिस्त ने नवा जीव पावतोर
2
जिदलदांय तुमी कसूर आउर पापमन चो किरता आत्मिक हिसाब ले मोरुन रलास, तेबे हुन तुमके बले जियालो।
2 तुमी आगे ए संवसार चो नीती ले, बादरी चो हकदार के मानते रलास बललोने, सयतान चो आत्मा के मानते रलास, जोन आत्मा एबे बले महापरभु के नी मानतो लोगमन के चलायसे।
3 हुनीमन असन आमी बले आगे संवसारिक जीवना जीवते रलु, बललोने, आपलो देहें आउर मन चो अडरा इछामन असन चलनी-बुलनी करते रलु, एईकाजे दुसर संवसारिक लोगमन असन आमी बले महापरभु ले डंड पावतो लाईक रलु।
4 मानतर महापरभु, जोन दया चो सवकार आय, हुन, आपलो जुगे मया किरता आमके खुबे मया करलो,
5 जिदलदांय आमी कसूरमन चो किरता आत्मा हिसाब ले मोरुन रलु, तेबे हुन आमके किरिस्त संगे जियालो (दया ले ची तुमके मुक्ति मिरलीसे),
6 आउर किरिस्त जीसु संगे आमके जियालो, आउर सरगपुरे आमके हुनचो संगे बसालो
7 कि महापरभु, किरिस्त जीसु ने जोन दया आमके दखालोसे, हुन बड़े भारी दया के एतो जुग ने बले आमके दखाओ।
8 पतेयातो बाटले महापरभु चो दया ले ची तुमचो मुक्ति होलीसे; आउर ए तुमचो बुता हिसाब ले नोआय, मानतर महापरभु चो दान आय।
9 मुक्ति, आपलो करलो नंगत बुतामन चो पलटा नोआय कि कोनी गुमान करुक सकोत।
10 आमी महापरभु चो बनालोर आंव, आउर हुन आमके किरिस्त जीसु ने गोटकी करलो कि आमी नंगत बुतामन करुं। महापरभु आगे ले ची आमके नंगत बुतामन करतो काजे तियार करलोसे।
किरिस्त ने गोटोक होतोर
11 एईकाजे सूरता करा, जहूदीमन जोन देहें चो हिसाब ले खतना करालोर आत, हुनमन तुमके खतना नी करलो बिजातीमन आत बलसोत।
12 हुदलदांय तुमी, किरिस्त ले अदरे आउर इसराएलिमन चो जात-सगा ले बाहरे रलास, आउर महापरभु चो बायदा के जानते बले नी रलास, आउर ए संवसार ने महापरभु चो आसा नोहलो जीवना जीवते रलास।
13 तुमी आगे महापरभु ले खुबे लापी रलास, मानतर एदांय किरिस्त जीसु ने किरिस्त चो लोउ बाटले लगे ईलास।
14 कसनबलले हुनी आमचो मिला-मिसा आय, जोन जहूदी आउर बिजाती, दुनो के गोटकी करलो आउर हुनमन चो मंजिगता चो झगड़ा के बुताउन, बईर चो भीती के भोसड़ालो,
15 आपलो देहें बाटले हुन नियम-कानुन चो हुकुममन चो नीतीमन के गुचाउन दिलो,
16 आउर कुरूस ने आपलो मोरना बाटले जहूदी आउर बिजातीमन चो बईर के नास करुन दुनो के गोटकी देहें बनाउन महापरभु संगे मिला-मिसा करालो।
17 हुन एउन तुमी, बिजातीमन जोन महापरभु ले खुबे लापी रलास आउर जहूदीमन जोन लगे रलास, सपाय के अस्तिर चो नंगत खबर सुनालो।
18 कसनबलले हुनचो बाटले, आमी दुनो बाट चो लोग के गोटकी पवितर आत्मा ले बुआ महापरभु लगे अमरुक होयसे।
19 एईकाजे तुमी एदांय परदेसिया नोहले पर-लोग नोआहास, मानतर तुमी पवितर लोगमन संगे रयत आउर महापरभु चो कुटुम आहास।
20 तुमी गोटोक घर असन आहास जेचो पाया पठालो-लोगमन आउर अगमजानीमन आत, आउर हुन घर चो कोना चो पकना खुदे किरिस्त जीसु आय।
21 किरिस्त आमी सपाय के गोटकी करुन महापरभु काजे गोटोक पवितर मंदिर बनायसे,
22 जोन थाने महापरभु चो आत्मा डेरा रतो काजे तुमके बले गोटकी संगे बनायसे।