इफिसुस चो मंडली
काजे पठालो-बीता पउलुस चो चिटी
1
महापरभु चो मन ले, जीसु किरिस्त चो पठालो-बीता पउलुस बाटले, इफिसुस चो पवितर लोग, जोन किरिस्त जीसु ने पतेयातो लाईक आसोत, हुनमन काजे चिटी:
2 आमचो बुआ महापरभु आउर परभु जीसु किरिस्त बाटले तुमके दया आउर अस्तिर मिरते रओ।
किरिस्त ने आमके आत्मिक बरमन
3 आमचो परभु जीसु किरिस्त चो बुआ महापरभु चो धन-धन होओ, जोन आमके किरिस्त ने सबु बरन चो आत्मिक बरमन सरगपुर ने दिलोसे।
4 महापरभु आमके किरिस्त ने संवसार चो मूर ले आगे बाछलो कि आमी हुनचो पुरे मया ने पवितर आउर दोख नोहलो होउं,
5 आउर आपलो मन करलो नंगत उआट असन आमके मया करलो किरता, जीसु किरिस्त बाटले आपलो पोसवा बेटा-बेटीमन होतो काजे बाछलो,
6 एईकाजे इआ, आमी हुनचो बड़े भारी दया काजे जय-जय करुं, जेके महापरभु, आपलो लाडरा बेटा बाटले आमके फोकाहा ने दिलो।
7 आमके हुनचो लोउ बाटले पापमन चो खेमा बललोने छंडावा, हुनचो बड़े भारी दया चो हिसाब ले मिरलीसे,
8 जेके हुन आपलो, सपाय गियान आउर समज संगे आमके खुबे ले दिलो।
9 कसनबलले महापरभु आपलो मन चो भेद के, नंगत उआट चो हिसाब ले आमके सांगलो, जेके हुन आपलो मने किरिस्त बाटले पक्का बिचारुन रये।
10 कसनबलले महापरभु चो असन उआट रली कि नंगत समया ईलोने, जोन कोनी बले सरग आउर मंजपुर ने आसे, सपाय के हुन किरिस्त ने गोटकी करो।
11 महापरभु सपाय गोटमन के आपलो मन-इछा हिसाब ने पुरा करेसे, आउर महापरभु मूर ले बनालो उआटचेई किरता आमके किरिस्त ने गोटकी होतो काजे बाछलोसे
12 कि आमी, जोनमन किरिस्त उपरे आगे ले आसा करुन रलु, हुनचो मयमा चो जय-जय चो किरता बनु।
13 किरिस्त चो सत बचन जोन तुमचो काजे मुक्ति चो नंगत खबर आय, हुनके सुनुन सतपतेयालास, तेबे महापरभु तुमके आपलेची लोग होतो काजे बायदा करलो पवितर आत्मा चो चीना दिलोसे,
14 जोन आपलो घेनलो लोगमन के छंडातो काजे आमचो बयाना आय, जेचोले आमी महापरभु करलो बायदा पाउक सकुं।
हुनचो मयमा चो जय-जय होओ।
पउलुस चो पारथना
15 एईकाजे, मय बले तुमचो बिसवास जोन परभु जीसु ने आसे आउर मया जोन सपाय पवितर लोगमन काजे आसे एचो बारे ने खबर सुनलो किरता,
16 तुमचो काजे महापरभु के धन-धन करते रयंसे। आउर मय पारथना करते रयंसे
17 कि मयमा चो बुआ बललोने आमचो परभु जीसु किरिस्त चो महापरभु तुमके पवितर आत्मा देओ जेचोले तुमके महापरभु के चितातो गियान आउर दरसन मिरो।
18 आउर तुमचो मन ने चेत एओ आउर जाना कि महापरभु तुमके हागदेतो चो आसा काय आय, आउर हुनचो पवितर लोगमन के बायदा करलो मयमा-धन काय-काय आय,
19 आउर आमी बिसवास करतो लोगमन काजे हुनचो सकत कितलो बड़े आय, महापरभु आपलो सकत ले करलो बुता हिसाब ले
20 जोन किरिस्त के मोरलो थान ले जीयाउन आपलो उजा हाथ बाटे सरगपुर ने बसालो,
21 आउर सपाय बरन चो बड़े पन, हक, सकत, राज करतो हक आउर सबुले बड़े नाव बले दिलो, जोन नाव ए जुग ने ची नाई मानतर एतो जुग ने बले धरदे।
22 महापरभु, सपाय के हुनचो हक ने* करुन दिलो; आउर हुनके सपाय चो मुंडी बनाउन मंडली चो बाड़ती काजे सोपलो।
23 मंडली किरिस्त चो देहें आय, किरिस्त समपुरन आय गुने सपाय बरन ले सपाय के समपुरन करेसे।