आया-बुआ आउर पिलामन
6
ए पिलामन, परभु ने आपलो आया-बुआ चो गोट के धरा, कसनबलले ए नंगत आय।
2 ए बायदा संगे चो पईल हुकुम आय, “आपलो आया-बुआ चो मान कर
3 तेबे तुचो भलई होयदे, आउर तुय मंजपुर ने खुबे दिन जीव रसे।”
4 ए आया-बुआमन, आपलो पिलामन के रीस नी चेगाहा, मानतर परभु चो सिखिया आउर चेतानी देते पाला-पोसा करा।
मालिक आउर कमेया
5 ए कमेयामन, ए संवसार ने जोन बले तुमचो मालिक आत, सत-मन ले डरुन-थरथरुन, हुनमन चो हुकुम माना जसन तुमी किरिस्त के मानेसाहास।
6 मनुक के हरिक करतो लोग असन दखातो काजे सेवा नी करा, मानतर किरिस्त चो कमेयामन असन महापरभु चो इछा के मन देउन करा,
7 आउर मनुक चो सेवा समजुन नाई, मानतर परभु चो सेवा समजुन सत-मन ले करा।
8 कसनबलले तुमी जानास कि जोन कोनी जसन नंगत बुता करेदे, उसनेची परभु ले पलटा पायदे, हुन कमेया होओ नोहले छुट-बीता होओ।
9 ए मालिकमन, तुमी दुनो चो मालिक जोन सरग ने आसे, हुन कोचई पाटेया नी होए, एईकाजे तुमी बले हुनमन संगे नंगत बेबार करा आउर नी धमकाहा।
आत्मिक जुद चो हतियार
10 एईकाजे ए भाईमन, तुमी परभु ने आउर हुनचो सकत ने चमकट राहा।
11 सयतान चो उआटमन ले बाचतो काजे तुमी महापरभु चो दिलो हतियारमन के पींदा।
12 कसनबलले आमचो लड़ई, मास आउर लोउ चो बिरुद नोआय मानतर राज करतोमन ले, हक संगातोमन ले, आउर संवसार चो अंधार चो सकतमन ले आउर बादरी ने रतो अडरा आत्मामन ले आय।
13 एईकाजे तुमी महापरभु चो दिलो सपाय हतियारमन* के पींदा कि तुमी अडरा समया के कटलाउक सकासे आउर पाछे बले चमकट रउक सकासे।
14 एईकाजे आपलो करांडे सत चो पट्टा बांदा, आउर धरम चो झिलम पींदा,
15 आउर पांयमन ने मिला-मिसा करातो नंगत खबर सांगतो चो पनई पींदा;
16 आउर सबुले बड़े गोट ए आय कि तुमी बिसवास के ढाल असन धरा, तेबे तुमी सयतान चो सबु जरतो कांडमन के लिबाउक सकासे।
17 आउर मुक्ति चो लोहा-टोप, आउर आत्मा चो खांडा धरा, जोन महापरभु चो बचन आय।
18 अमदेया सबु बरन चो पारथना आउर गुहार पवितर आत्मा चो सकत ले करते राहा, आउर सपाय पवितर लोगमन काजे चेत ने रउन अमदेया गुहार करा,
19 आउर मोचो काजे बले पारथना करा कि मय नंगत खबर चो भेद के सांगतो बेरा खुबे ढाढ़ुस ले सांगुक होओ,
20 एचई काजे मय सिकरा ने बांदलोर राजदूत होलेसे; पारथना करा कि जसन मोके नंगत खबर सुनातोर आय उसनेची ढाढ़ुस ले सुनाउक होओ।
सरासरी जुहार
21 तुमी जाना, मोचो हाल कसन आसे आउर काय करेंसे। ए गोट के मोचो लाडरा भाई आउर परभु ने पतेयातो लाईक सेवक, तुखिकुस तुमके सांगेदे।
22 हुनके मय, तुमचो लगे एईकाजे पठालेसे कि तुमी मोचो हाल के जाना, आउर हुन तुमचो जीव के अस्तिर करो।