मिरलो छुट के नी बुड़ाहा
5
किरिस्त आमके छुट ने रतो काजे छंडालोसे, एईकाजे किरिस्त बाटले मिरलो छुट ने ची राहा, आउर फेर ले नियम-कानुन चो कमेया नी मांडा।
2 दखा, मय पउलुस तुमके बलेंसे, तुमी खतना करालास जाले किरिस्त तुमचो काजे काई नफा चो नोआय।
3 तेबले बले मय, खतना करातो सपाय लोगमन के चेतायंसे कि हुनमन के सपाय नियम-कानुन मानुक पड़ेदे।
4 तुमीमन ले जोन बले नियम-कानुन मानतो ले धरमकारी होतो मन करसाहास, तुमी खुदे किरिस्त ले अदरे आउर महापरभु चो दया पावतो ले लापी होलासाहास।
5 कसनबलले आमी जोन बले पवितर आत्मा पावलुसे, आमी बिसवास बाटले महापरभु चो पुरे धारनिक होतो आसा ले बाट दखुंसे।
6 किरिस्त जीसु के पतेयातो लोग के, खतना करले नोहले नी करले काई काम चो नोआय, मानतर सोजे बिसवास ले उबजतो मया ले ची नफा आसे।
7 तुमी तो किरिस्त ने खुबे नंगत ले चलते रलास। एदांय कोन आय तुमके सत के मानतोके अड़ंगा लगायसे?
8 असन सिखिया तुमके हागदेउ महापरभु बाटले नोआय।
9 खिंडिक असन पाग जमाय चटकलो-पिसान के पाग उलटायसे।†
10 मोके परभु ने भोरसा आसे कि तुमी दुसर चो गोट के नी धरासे, मानतर जोन बले तुमके भरमायसे, हुन कोनी ची होले बले डंड पायदे।
11 ए भाईमन, मय एबे बले खतना चो गोट सुनायंसे जाले, काय काजे मोके एबतले डाटा-टेवा करसोत? तेबे फेर मोके कुरूस चो खबर सांगतो किरता डंड नी मिरती।
12 नंगत होती कि जोनमन तुमके भरमायसोत, हुनमन आपलेई देहें के काटी होता।
13 ए भाईमन, महापरभु तुमके छुट ने रतो काजे बाछलोसे, मानतर तुमी छुट चो आड़ ने, देहें चो सुख-भोग ने नी राहा, हुनचो पलटा मया ले गोटोक-दुसर चो सेवा करा।
14 कसनबलले जमाय नियम-कानुन ए गोटोक गोट ने पुरा होयसे, “जसन तुय आपने के मया करुआस, उसनेची आपलो घर लग चो लोग के बले मया कर”।†
15 मानतर तुमी गोटोक-दुसर के चाबुन-तितड़ुन खायसास जाले चेत ने राहा, कसनबलले असन करुन तुमी गोटोक-दुसर के सत्यानास करासे।
पवितर आत्मा बाटले चलतोर
16 मानतर मय बलेंसे, तुमी पवितर आत्मा बाटले चलसास जाले, देहें चो लालच बुतामन के कसनी बरन ले बले पुरा नी करासे।
17 कसनबलले देहें, आत्मा चो उलटा आउर आत्मा, देहें चो उलटा लालच करेसे, आउर ए गोटोक-दुसर चो बयरी आत,† एईकाजे जोन तुमी करुक मन करसास हुनके करुक नी सकसास।
18 तुमी पवितर आत्मा चो हक ने चलसास जाले नियम-कानुन चो हक ने नीआहास।
19 देहें चो बुता के तुमी सपाय जानसाहास, बललोने, बेबिचार, अडरा बुता, निलज,
20 मूरत सेवा, पांगन-नासन, बईर, झगड़ा, ईरका, रीस, लालच, लड़ा-जुजा, भिने-भिने होतोर,
21 कपट, माततोर, हांसी-खेली आउर असने ची आउर बले बुतामन आसे, एचो बारे ने मय तुमके आगे ले सांगुन रले, एदांय फेर सांगेसे कि असन बुता करतो लोगमन महापरभु राज चो हकदार नी होदे।
22 मानतर पवितर आत्मा चो फर, मया, हरिक, अस्तिर, धीरजा, दया, भलई, बिसवास, सोज आउर मन-मंडातोर आय।
23 असन बुतामन चो बिरुद ने काई नियम-कानुन नीआय।
24 आउर जोन किरिस्त जीसु चो लोग आत, हुनमन आपलो देहें के सपाय लालच आउर मन-इछा संगे कुरूस ने चेगालासे।