4
मोचो बलतो अरथ एई आय, हकदार सपाय तीजमन चो मालिक होले बले, जिदलदांय ले हुन पिला आसे, तेबे हुनचोने आउर कमेया ने काई फरक नीआय।
2 कसनबलले हुन, बुआ चो कबूल धरालो बेरा पुरत ले दखा-राखा करु बीतामन आउर भंडारीमन चो हक ने रयसे।
3 उसनेची आमी बले, आत्मिक हिसाब ने पिला रलोदांय, संवसार चो मूर सिखियामन चो कमेया रलु।
4 मानतर जिदलदांय बेरा पुरली, तेबे महापरभु आपलो बेटा के पठालो, जोन बायले* ले जनम होलो आउर हुन नियम-कानुन चो हक ने रलो,
5 कसनबलले नियम-कानुन चो हक ने रतो कमेयामन के, बललोने आमके मोल देउन छंडाओ कि बेटा-बेटीमन होतो हक मिरो।
6 एदांय तुमी बेटा-बेटीमन आहास, एईकाजे महापरभु आपलो बेटा चो आत्मा के आमके दिलोसे, जेचोले आमी, “ए अब्बा, ए बुआ!” बलुन हागदेउंसे।
7 एदांय तुमी कमेयामन नाई, बेटा-बेटीमन आहास, आउर बेटा-बेटीमन होलास गुने महापरभु बाटले हकदार बले आहास।†
गलातेयामन काजे पउलुस फिकिर करेसे
8 आगे तुमी महापरभु के नी जानते रलास गुने देव-भूतमन चो कमेया रलास, जोन महापरभु नोआय ची बले।
9 मानतर एदांय तुमी महापरभु के चितालास, बललोने महापरभु तुमके चितालो, फेर बले तुमी काय काजे निमल, फोकाहा आउर मूर सिखियामन के मानतो काजे होयसास, काय, तुमी फेर हुनचेई कमेया होउक मन करसास?
10 तुमी, कोनी-कोनी दिनमन, जोनमन, बेरामन आउर बरकमन के मानासाहास।
11 मोके डर आसे कि मय तुमचो काजे करलो मसागत फोकाहा तो नी होए।
12 ए भाईमन, मय तुमके गुहारेंसे, तुमी मोचो असन होआ, कसनबलले मय बले तुमचो असन होलेसे, तुमी मोचो ले काई ओनियाव नी करलास।
13 मानतर तुमी जानास, मय बेमार रलो किरता पईल हार तुमके नंगत खबर सुनाले।
14 आउर तुमी मोचो बेमार चो किरता खुबे तकलीस पाउन बले मोके हिनस्ता नी करलास आउर नाई बले नी बललास। मानतर मोके महापरभु चो दूत असन इजित-मान करलास, एचोले बले आगर किरिस्त जीसु असन।
15 एदांय तुमचो भाग उपरे गुमान करतोर कसन होली? एचो मय गवा आंसे, आउर हुदलदांय तुमचो ले होउक सकलोने तुमी आपलो आंईकमन के बले हिटाउन मोके देतास।
16 काय, एबे मय तुमके सत गोटेयालो किरता तुमचो बयरी होलेसे?
17 हुन फंदी गुरुमन अडरा बिचार ले तुमके मीत बनाउक मन करसोत, मानतर ए तुमचो नंगत काजे नोआय। हुनमन चो बिचार एई आय कि तुमी मोके छांडुन हुनमन के ची मीत बनाहा।
18 भलई बुतामन काजे मीत बनातोर अमदेया नंगत आय, सोजे हुदलीदांय ची नाई, जिदलदांय मय तुमचो संगे रयंसे।
19 ए मोचो पिलामन, तुमचो ने किरिस्त पक्का होओतले, छर-फर होतो काजे दुखा खातो बायले असन तुमचो काजे मय दुखा फेर ले सहेंसे।
20 मय मन करेंसे कि एबे तुमचो लगे एउन दुसर बरन ले तुमके समजायंदे, कसनबलले मय तुमचो काजे खुबे फिकिर करेंसे।
सारा आउर हाजिरा चो कटाव
21 तुमी जोन नियम-कानुन चो हक ने रउक मन करसास मोके सांगा, काय, तुमी नियम-कानुन के नी सुनलासाहास?
22 हुता लिखलोर आसे कि अबराहम चो दुयझन बेटामन रओत, गोटोक कमेयीन ले आउर गोटोक बियाती बायले ले।†
23 मानतर जोन कमेयीन ले जनमलो, हुन देहें चो हिसाब ने जनमलो, आउर जोन बियाती बायले ले जनमलो, हुन महापरभु चो बायदा हिसाब ने जनमलो।
24 ए गोटमन ने कटाव आसे, ए बायलेमन दुयठन बायदामन असन आत, गोटोक तो सिनाई डोंगरी ले आय, जोन कमेयामन के ची जनमायसे, आउर हुन हाजिरा आय।
25 आउर हाजिरा बललोने, अरब चो सिनाई डोंगरी आय, आउर एबे चो जरूसलेम हुनचो कटार चो आय, कसनबलले हुन आपलो पिला-झीलामन संगे कमेया बुता ने आसे।
26 मानतर बियाती बायले सारा, सरग चो जरूसलेम चो कटार चो आय आउर हुन आमचो आया आय।
27 धरमसास्तर ने लिखलोर आसे,
“ए बांझीन, तुय पिला नी पावलीस, हरिक हो,
तुके छर-फर होतो दुखा नी होली, जय-जय कर,
कसनबलले बांझीन बायले के
आउर दुसर सपाय बायलेमन ले आगर पिला-झीलामन आसोत।”†
28 ए भाईमन, आमी इसहाक असन बायदा करलो बाटले जनमलो पिलामन आंव।
29 आउर जसन हुदलदांय देहें चो हिसाब ने जनमलो लोग, महापरभु चो आत्मा हिसाब ने जनमलो लोग के डाटा-टेवा करते रओत, उसनेची एबे बले होयसे।
30 मानतर पवितर सास्तर काय बलेसे? “कमेयीन आउर हुनचो बेटा के निकराउन देस, कसनबलले कमेयीन चो बेटा, बियाती बायले चो बेटा संगे हक बाटा नी पायदे।”†
31 एईकाजे ए भाईमन, आमी कमेयीन चो नाई, मानतर बियाती बायले चो पिलामन आंव।