नियम-कानुन नोहले बिसवास
3
ए भकवा गलातेयामन, मय, तुमी सपाय चो आंईक पुरे जीसु किरिस्त के कुरूस ने चेगालो असन दखाले! एबे तुमके कोन गुपायसे?
2 मय तुमचो ले सोजे इतलेई ची जानुक मन करेंसे, तुमी पवितर आत्मा के, नियम-कानुन के मानतो बाटले पावलास कि नंगत खबर सुनुन सतपतेयालोके पावलास?
3 काय, तुमी इतरो भकवा आहास कि आपलो किरिस्ती जीवना के महापरभु चो आत्मा ले मुरियाउन एबे देहें चो हिसाब ले सारुक मन करसाहास?
4 काय, तुमी इतरो डंड फोकाहा ने सहलास? ए फोकाहा ने नोआय,
5 जोन तुमके आपलो आत्मा दान देयसे आउर तुमचो मंजी अचरित बुता करेसे, काय, हुन नियम-कानुन चो बुतामन ले आय कि नंगत खबर के सतपतेयातो बाटले आय?
6 असने ची, “अबराहम महापरभु के पतेयालो, एईकाजे हुनके धारनिक मानला।”†
7 बललोने, ए गोट के जाना कि महापरभु के सतपतेयातो लोगमन ची अबराहम चो बेटा-बेटीमन आत।†
8 आउर पवितर सास्तर ने आगे ले सांगु रये कि महापरभु, बिजातीमन के पतेयातो बाटले धरमकारी मानेदे, महापरभु आगे ले अबराहम के ए नंगत खबर सुनालो: “तुचो बाटले सपाय जातमन बर पावदे।”†
9 एईकाजे महापरभु के पतेयातो लोगमन, पतेयालो बीता अबराहम संगे बर पायसोत।
10 मानतर जितरो लोग नियम-कानुन चो बुतामन ने भोरसा करसोत, हुनमन सपाय सराप चो हक ने आसोत, कसनबलले सास्तर ने लिखलोर आसे, “जोन कोनी बले नियम-कानुन चो किताप ने लिखलोर सपाय गोटमन के नी मानोत आउर नी चलोत, हुनमन सराप पायसोत।”†
11 एचोले ए पक्का जानुक होयसे कि नियम-कानुन बाटले कोनी बले महापरभु चो पुरे धरमकारी नी होओत, कसनबलले पवितर सास्तर ने लिखलोर आसे: “धरमकारी बिसवास ले जीव रयदे।”†
12 मानतर नियम-कानुन ले, बिसवास चो काई नाता नीआय, कसनबलले जोन नियम-कानुन के मानेदे, हुन, हुनचो किरता जीव रयदे।†
13 किरिस्त आमचो काजे सराप पावलो आउर आमके नियम-कानुन चो सराप ले छंडालो, कसनबलले लिखलोर आसे: “जेके बले रूक ने टांगलासे हुन सराप पावलोसे।”†
14 असन एईकाजे होली कि अबराहम के मिरलो बर किरिस्त जीसु बाटले बिजातीमन के मिरो, आउर आमी बिसवास करतो बाटले हुन बायदा करलो पवितर आत्मा के पाउं।
नियम-कानुन आउर बायदा
15 ए मोचो भाईमन, मय संवसारी नीती ले बलेंसे, मनुक चो बायदा बले चमकट रयसे। बायदा करलो पाछे, कोनी हुनके दोदुक नोहले घटाउक-बड़ाउक नी सके।
16 महापरभु, अबराहम आउर हुनचो थर संगे बायदामन करलो।† पवितर सास्तर ने, “थरमन के” बलुन खुबे लोग काजे नी बले, मानतर एकलाय “तुचो थर के” बललोने, किरिस्त काजे बलेसे।
17 एचोले मय एई बलुक मन करेंसे: महापरभु आगे करलो पक्का बायदा के, चार सव तीस बरक चो पाछे ईलो नियम-कानुन दोदुक नी सके कि बायदा फोकाहा होओ।†
18 कसनबलले बाटा मिरतो हक नियम-कानुन बाटले मिरेसे जाले, फेर बायदा बाटले नाई। मानतर महापरभु अबराहम के बायदा करलो बाटले ची बाटा चो हक दिलोसे।†
नियम-कानुन काय काजे आय?
19 तेबे फेर नियम-कानुन काय काजे आय? हुन बायदा करलो हकदार एओतले, आमचो पापमन चो किरता देउ रलो। हुनके सरगदूतमन गोटोक मंजी बललोने, मोसा चो हाथे लोगमन लगे अमराला।
20 दुय पाट नी रले, मंजी होउक नी पड़े; मानतर महापरभु एकलाय ची आय।
21 तेबे काय नियम-कानुन महापरभु चो बायदामन चो बिरुद ने आय? केबई नाई! कसनबलले असन नियम-कानुन जीव देउक सकती जाले धारनिक होतोर बले नियम-कानुन ले होती।
22 मानतर पवितर सास्तर ने लिखलीसे कि सपाय, पाप चो तलेया ने आसोत। एईकाजे कि महापरभु चो बायदा, जीसु किरिस्त के सतपतेयातो लोगमन काजे पक्का होओ।
23 मानतर बिसवास एओतले नियम-कानुन चो हिसाब ने आमचो दखा-राखा होते रली, आउर आमी हुनचो हक ने रलु।
24 एईकाजे नियम-कानुन, किरिस्त लगे अमरातो काजे आमचो गुरु होलीसे कि आमी बिसवास ले धरमकारी होउं।
25 मानतर एदांय बिसवास ईलोके, आमी नियम-कानुन चो हक ने नी आंव।
महापरभु चो बेटा-बेटीमन
26 कसनबलले तुमी सपाय, किरिस्त जीसु के पतेयातो बाटले महापरभु चो बेटा-बेटीमन आहास।
27 आउर तुमीमन ले जितरो लोग, किरिस्त संगे मिसतो काजे बपतिस्मा धरलासाहास, हुनमन ने किरिस्त चो सपाय गुन समालीसे।
28 एदांय तुमी, जहूदी नोहले जूनानी, कमेया नोहले छुट, मनुक नोहले बायले नोआहास, मानतर किरिस्त जीसु ने सपाय गोटकी चे आहास।
29 तुमी किरिस्त चो आहास जाले अबराहम चो थर आउर बायदा हिसाब ले हकदार बले आहास।†