दुसर पठालो-बीतामन, पउलुस के पठालो-बीता मानतोर
2
चवदा बरक चो पाछे मय बरनबास संगे फेर जरूसलेम गेले, आउर तीतुस के बले संगे नीले।†
2 मोचो जातोर महापरभु दिलोर दरसन हिसाब ले होली, आउर जोन नंगत खबर के मय बिजातीमन के सुनायंसे, हुनके मय खुसनाय मुखियामन चो मंजी बले सांगले। एईकाजे कि मोचो आगे चो आउर एबे चो करलो मसागत फोकाहा नी होओ।
3 मोचो संगे तीतुस बले रलो, मानतर हुन जूनानी जात चो होले बले खतना करातो काजे कोनी बेरपेला नी करला,
4 फेर बले कोनी-कोनी फंदी भाईमन, किरिस्त भाईमन चो भेस धरुन जीसु किरिस्त ने आमके मिरलो छुट* के जानतो काजे खुसनाय आमचो मंजी एउ रला, कि आमी किरिस्त ने रउन खतना नी करातो भेद के जानुन आमके जहूदी धरम चो तलेया ने पाड़ोत,
5 मानतर तुमचो ने नंगत खबर चो सत रओ बलुन भाति आमी डंडिक काजे बले हुनमन चो हक ने रतोर नी मानलु।
6 मंडली चो मुखियामन होउन बले हुनमन नंगत खबर सुनातोने मोके काई सला नी देउक सकला - हुनमन कोनी बले होओत, मोके काई फरक नी पड़े, महापरभु कोचई पाटेया नी होए।†
7 मानतर हुनमन ए बले जानला कि जसन महापरभु, खतना करलो लोगमन बललोने, जहूदीमन के नंगत खबर सुनातो बुता पतरस के सोपलोसे, उसनेची खतना नी करलो लोगमन बललोने, बिजातीमन के नंगत खबर सुनातो बुता मोके सोपलोसे।
8 कसनबलले महापरभु, जोन पतरस के जहूदीमन (खतना होलो लोग) चो मंजी पठालो-लोग होतो काजे बाछलोसे, हुनी मोके बले बिजातीमन चो मंजी पठालो-लोग होतो काजे बाछलोसे।
9 जिदलदांय जाकूब, कयफा (पतरस), आउर जूहन्ना, जोनमन के मंडलीमन चो खुट मानसोत, हुनमन महापरभु मोके दिलो दया के जानला, तेबे बरनबास आउर मोचो संगे सोर होला कि हुनमन जहूदीमन (खतना होलो लोग) के आउर आमी बिजातीमन के नंगत खबर सुनाउंदे।
10 हुनमन इतरो बलला कि गरीबमन के धियान दियास, आउर एकेई ची मय आगतले करुक मन करते रयें।
पउलुस, पतरस चो बिरुद ने
11 मानतर जिदलदांय कयफा (पतरस) अंताकिया ने ईलो, तेबे मय हुनचो पुरे बलले कि तुय पक्का दोसी आस।
12 कसनबलले जाकूब संग चो आदो लोगमन एतो ले आगे हुन बिजातीमन संगे खाते रलो। मानतर जिदलदांय हुनमन ईला, खतना करलो लोगमन बललोने जहूदीमन चो डर काजे जात-पात करुन पतरस, बिजातीमन ले अदरे होउक मुरियालो।
13 हुनचो संगे आदो जहूदीमन कपट करला, आउर बरनबास बले हुनमन चो कपट ने मिसलो।
14 मानतर जिदलदांय मय दखले कि हुनमन नंगत खबर चो सत ने नी चलसोत, तेबे मय सपाय चो पुरे कयफा (पतरस) के बलले, “तुय जहूदी होउन जहूदीमन चो नीती ले नाई मानतर बिजातीमन चो नीती ले चलसीस! तेबे तुय कसन ने बिजातीमन के जहूदीमन चो नीती ले चलतो काजे बलसीस?”
पतेयातो बाटले धरमकारी होतोर
15 आमी जनम ले जहूदी आंव, आउर बिजातीमन असन नियम-कानुन नोहलो लोग नोआंव,
16 तेबले बले ए जानलु कि मनुक, नियम-कानुन चो बुतामन ले नाई, मानतर जीसु किरिस्त के सतपतेयातो बाटले धरमकारी होयसे, आउर आमी किरिस्त के पतेयाउन धरमकारी होलु, नियम-कानुन चो बुतामन बाटले नाई। कसनबलले कोनी मनुक नियम-कानुन बाटले धरमकारी नी होदे।†
17 आमी, जोन किरिस्त ने धरमकारी होउक मन करुंसे, आउर आमी खुदे पापी होलोने, तेबे काय किरिस्त पाप चो सेवक आय? केबई नाई!
18 कसनबलले मय कोनी नियम-कानुन के छांडुन फेर हुनके मानेंसे जाले, मय नियम-कानुन हिसाब ले आपने के कसूरदार बनायंसे।
19 मय नियम-कानुन चो हिसाब ले नियम-कानुन काजे मोरले कि महापरभु काजे जीव रयंदे।
20 मय बले किरिस्त संगे कुरूस ने मोरले, एबे मय जीव नीआंय, मानतर किरिस्त मोचो ने जीव आंसे, आउर एबे मय जीव रतोर महापरभु चो बेटा के सतपतेयातो बाटले आय, जोन मोके मया करलो आउर मोचो काजे आपलो जीव के दिलो।
21 मय महापरभु चो दया के फोकाहा नी समजे, नियम-कानुन बाटले धारनिक होते रले, किरिस्त चो मोरना फोकाहा होती।