गलाती चो मंडली
काजे पठालो-बीता पउलुस चो चिटी
1
मय पउलुस, मनुकमन बाटले नाई आउर कोनी मनुक दिलो हक ले बले नाई, मानतर जीसु किरिस्त आउर हुनके मोरलो थान ले जियालो महापरभु बुआ बाटले, पठालो-बीता आंय -
2 मय आउर मोचो संगे रतो सपाय भाईमन बाटले, गलाती चो मंडलीमन के चिटी:
3 महापरभु बुआ आउर आमचो परभु जीसु किरिस्त बाटले तुमके दया आउर अस्तिर मिरते रओ।
4 हुनी आमचो पापमन काजे आपने के देउन दिलो कि आमचो महापरभु बुआ चो मन-इछा ले एबे चो ए अडरा संवसार ले आमके बचाओ।
5 हुनचो मयमा जुग-जुग होते रओ। आमीन।
आउर दुसर नंगत खबर नीआय
6 महापरभु तुमके किरिस्त चो दया ने हागदिलोसे, हुनके तुमी इतरो डंडकी छांडुन दुसर नंगत खबर के मानसाहास बलुन मय भक्यालेसे।
7 हुन नंगत खबर नोआय ची बले: मानतर सत गोट ए आय कि कोनी तुमके भरमायसोत आउर किरिस्त चो नंगत खबर के नसाउक मन करसोत।
8 मानतर आमी होउं नोहले कोनी सरगदूत बले होओ, आमी आगे तुमके सुनालो नंगत खबर के छांडुन, आउर दुसर नंगत खबर के तुमके सुनायसोत जाले, हुनमन के सराप लागो।
9 जसन आमी आगे सांगलुसे, उसनेची एबे फेर मय सांगेसे, आमचो सुनालो नंगत खबर जेके तुमी मानलासाहास, हुनके छांडुन कोनी दुसर नंगत खबर सुनायसोत जाले, हुनमन के सराप लागो।
10 काय, एबे मोचो ले मनुकमन हरिक होयसोत कि महापरभु हरिक होयसे? काय, मय मनुकमन के हरिक करुक मन करेंसे? मय मनुकमन के ची हरिक करते रलोने किरिस्त चो कमेया नी होते।
पउलुस कसन ने पठालो-बीता होलो
11 ए मोचो भाईमन, तुमी ए गोट के जानास, जोन नंगत खबर मय तुमके सुनालेसे, हुन मनुक चो बाटले नोआय।
12 कसनबलले हुन नंगत खबर, कोनी मनुक चो बाटले नी मिरली, नोहले कोनी मनुक मोके नी सिखाला, मानतर जीसु किरिस्त चो दरसन बाटले मिरली।
13 जहूदी धरम ने मोचो आगे चो चलनी-बुलनी के तुमी सुनलासाहास कि मय महापरभु चो मंडली के खुबे डाटा-टेवा करुन सत्यानास करते रले।†
14 जहूदी धरम मानतोने मोचो जोंहरेयामन ले मय पुरे रले, आउर आपलो पुरखा-पाटीमन चो नीतीमन चो भर ने रले।†
15 मानतर महापरभु मोचो आया चो पेट ले ची मोके बाछलो, आउर आपलो दया ले, मोके हागदिलोसे,
16 आउर आपलो मन-इछा ले आपलो बेटा चो दरसन मोके दिलो कि मय बिजातीमन के हुनचो नंगत खबर सुनायंदे, तेबे मय कोनी मनुक चो सला नी धरले,†
17 आउर मोचो ले आगे चो पठालो-लोगमन लगे जरूसलेम ने नी जाउन तूरते अरब राज ने गेले आउर फेर हुन थान ले दमिसक सहर ने बोहड़ुन ईले।
18 फेर तीन बरक पाछे मय, पतरस (कयफा) के भेट-घाट होतो काजे जरूसलेम गेले, आउर हुता हुनचो संगे पंदरा दिन रले।†
19 तेबे परभु चो भाई जाकूब के छांडुन आउर कोनी पठालो-लोगमन के नी भेटले।
20 दखा, जोन गोटमन मय तुमचो काजे लिखेंसे, ए गोटमन फंद नोआय, महापरभु एचो गवा आसे।
21 एचो पाछे, मय सीरिया आउर किलिकिया चो परघनमन ने ईले।
22 जहूदिया राज चो किरिस्त मंडलीमन चो लोगमन मोचो संगे आगे केबई भेट-घाट नी होउन रला,
23 मानतर ए गोट के सुनुन रओत कि जोन आगे आमके डाटा-टेवा करुन किरिस्ती बिसवास के सत्यानास करतो काजे हलवाल होउन रलो, एदांय हुन, हुनी बिसवास चो गोट के सुनायसे,
24 आउर हुनमन मोचो किरता महापरभु चो जय-जय करते रओत।