गोटोक-दुसर के साका होआ
6
ए भाईमन, कोनी मनुक काई पाप ने धरा पड़लो जाले, तुमी जोन आत्मिक लोग आहास, हुनके धीरजा ले समजाउन बचाहा, आउर आपने बले लेक ने राहा कि तुमी बले जचई ने नी पड़ा।
2 तुमी तकलीस बेरा गोटोक-दुसर के साका होउन किरिस्त चो नियम-कानुन के पुरा करा।
3 कसनबलले कोनी मनुक काई नी जानुन बले मय सपाय के जाने बलुन बिचारेसे जाले, हुन आपने के धोका देयसे।
4 मानतर तुमीमन ले सपाय आपलो ची बुता के परखा, तेबे दुसर चो बारे ने नाई, आपलो ची बारे ने गुमान करतो मोहका मिरेदे।
5 कसनबलले तुमीमन ले सपाय लोग आपलो ची बोजा बोआसे।
6 जोन बचन सीखसोत, हुनमन आपने के सिखातो लोग के आपलो सपाय नंगत जिनीसमन चो बाटा देओत।
7 धोका नी खाहा, महापरभु के हांसी-खेली करुक नी होए, कसनबलले मनुक जसन बुनेदे उसनेची काटेदे।
8 कसनबलले जोन आपलो देहें काजे बुनेसे, हुन देहें बाटले सत्यानास चो कटई काटेदे, आउर जोन आत्मा काजे बुनेसे, हुन आत्मा बाटले जुग-जुग जीव चो कटई काटेदे।
9 आमी भलई करतोने पुरे रउं, कसनबलले आमी ठगरा नी होलोने नंगत समया ने कटई काटवां।
10 एईकाजे जेबे बले मोहका मिरलोने आमी सपाय चो भलई करुं, जुगे करुन किरिस्त भाई-बईनमन के।
सरासरी चेतानी आउर जुहार
11 दखा, मय कसन बड़े-बड़े अखर ने तुमचो काजे आपलो हाथ ले लिखलेसे।
12 तुमके खतना करतो काजे बेरपेला करतो लोग ढोंगई आत, किरिस्त चो कुरूस किरता हुनमन के कोनी डाटा-टेवा नी करोत बलुन असन करसोत।
13 कसनबलले खतना करलो लोगमन खुदे नियम-कानुन ने नी चलसोत, मानतर तुमचो खतना करालु बलुन गुमान करतो काजे खतना करातो बिचार करसोत।
14 मानतर मय, कोनी दुसर गोट उपरे नाई, सोजे परभु जीसु किरिस्त चो कुरूस ने ची गुमान करुआंय, जेचोले संवसार मोचो नंजर ने आउर मय संवसार चो नंजर ने कुरूस ने चेगालोर आंसे।
15 कसनबलले खतना करले, नोहले नी करले, काई काम नीआय, मानतर नवा होतोर बललोने मुक्ति पावतो ले काम आसे।
16 जितरो लोग ए नीती हिसाब ने चलदे हुनमन उपरे आउर महापरभु चो इसराएली थर चो लोग उपरे, अस्तिर आउर दया होते रओ।
17 एदांय ले कोनी मोके तकलीस नी दियास, कसनबलले मय जीसु चो किरता पावलो घावमन चो चीना के आपलो देहें ने धरुन बुलेंसे।
18 ए भाईमन, आमचो परभु जीसु किरिस्त चो दया तुमचो आत्मा संगे रओ। आमीन।