पठालो-लोग चो हक आउर बुता
9
काय, मय छुट ने नीआय? काय, मय पठालो-लोग नोआंय? काय, मय आमचो परभु जीसु के नी दखलेसे? काय, तुमी परभु ने मोचो फर नोआहास?
2 मय दुसर लोग काजे पठालो-लोग नी होले बले तुमचो काजे तो आंय, कसनबलले परभु ने मय पठालो-लोग होतोर चो चीना तुमी आहास।
3 जोन मोके परखसोत, हुनमन काजे मोचो एई गोट आय।
4 काय, आमके खातो पीवतो हक नीआय?
5 काय, आमके किरिस्ती कुंआरी बईन* के बिया होउन, हुनचो संगे बुलतो हक नीआय, जसन दुसर पठालो-लोग आउर परभु जीसु चो भाईमन आउर कयफा करसोत?
6 नोहले काय, मोके आउर बरनबास के ची नी कमाउन खातो हक नीआय?
7 कोन आपलो हाथ चो खाउन, पाईक-बुता करुआय? कोन बाड़ी ने अंगुर रोपुन, हुनचो फर नी खाये? कोन गाय-छेरी पोसुन, हुनचो गोरस नी खाये?
8 काय, मय ए गोटमन मनुक चो नीती ले चे बलेंसे? काय, नियम-कानुन ने बले असने नी लिखलीसे?
9 मोसा चो नियम-कानुन ने लिखलीसे, “मांजन फांदतो बयला चो टोंड के नी बांदा।” काय, महापरभु बयलामन के ची फिकिर करेसे?†
10 नाई, जुगे करुन आमचो काजे बलेसे। हव, आमचेई काजे लिखलीसे, कसनबलले नंगत आय कि नांगर जोपतो बीता आसा ले जोपो, आउर मांजन फांदतो बीता बाटा पावतो आसा ले फांदो।
11 आमी तुमचो मंजिगता आत्मिक बीचमन बुनलु, आउर एचो पलटा तुमचो संवसारी फसल काटतोर, काय, ए बड़े गोट आय?
12 जेबे तुमचो उपरे दुसरमन के हक आसे तेबे काय, हुनमन चो ले आगर हक आमके नीआय?
मानतर आमी ए हक के नी बाहारलु आउर ए सपाय के सहुंसे कि आमचो बाटले किरिस्त चो नंगत खबर सांगतो थाने काई छेका-फांदा नी होओ।
13 काय, तुमी नी जानास, जोन मंदिर ने सेवा करसोत हुनमन चो जीवना-खावना मंदिर ले होयसे, आउर जोन बेदी चो सेवा करसोत हुनमन बले बेदी ले बाटा पायसोत†,
14 एई हिसाब ले परभु हुकुम दिलोसे कि जोन लोग नंगत खबर सुनायसोत, हुनमन चो जीवना-खावना हुनी नंगत खबर बाटले होओ।
15 मय एमन ले काईके बले नी बाहारलेसे आउर मय ए गोटमन के तुमी मोचो काजे असन करा बलुन बले नी लिखलेसे। कसनबलले तुमी मोचो गोट के फोकाहा समजसाहास जाले, मोचो मोरतोर चे नंगत आय।
16 नंगत खबर सुनातो काजे मय गुमान नी करें, कसनबलले नंगत खबर सुनातोर मोचो बुता आय, आउर नंगत खबर नी सुनाले मोके हाय लागेदे।
17 कसनबलले मोचो मन-इछा ले सुनायसे जाले, मोके पुनफर मिरेसे आउर मोचो मन-इछा ले नी होले बले मोके नंगत खबर सुनातो भंडारीपन सोपलोसे।
18 तेबे मोके काय पुनफर मिरुआय? मय किरिस्त चो नंगत खबर फोकाहा ने सुनायंसे, एईकाजे नंगत खबर सुनातो हक के बले नी बाहारेंसे।
19 मय छुट होउन बले, खुबे लोगमन के परभु ने आनतो काजे, खुद के सपाय चो कमेया बनालेसे।
20 मय जहूदीमन के परभु ने आनतो काजे जहूदी बनले, नियम-कानुन के मानतो लोगमन के परभु ने आनतो काजे मय (नियम-कानुन ने नी रले बले) नियम-कानुन मानतो बीता होले।
21 मय, महापरभु चो नियम-कानुन के मानुआंय, आउर किरिस्त चो नियम-कानुन के मानेंसे, तेबले बले नियम-कानुन के नी मानतो लोग चो मन बोहड़ातो काजे, नियम-कानुन नी मानतो लोग असन होले।
22 बिसवास ने निमलमन के परभु ने आनतो काजे मय निमल असन होले, मय सपाय मनुकमन काजे सपाय असन होले कि कसनी बरन ने बले खिंडिक-आदक लोग चो मुक्ति कराउक होओ।
23 मय ए सपाय के नंगत खबर सुनातो काजे करेंसे कि मोके बले हुनचो बर चो बाटा मिरो।
मुकुट पावतो काजे परातोर
24 काय तुमी नी जानास, खेल ने, परातो लोग सपाय परायसोत, मानतर इनाम एकलाय के मिरेसे, एईकाजे तुमी इनाम पावतो असन पराहा।
25 सपाय खिलाड़ीमन सपाय बरन ले आपलो देहें के ओंकायसोत, हुनमन तो गोटोक नास होतो मुकुट के पावतो काजे ए सपाय करसोत, मानतर आमी केबई नास नी होतो मुकुट पावतो काजे करुंसे।
26 एईकाजे मय, ए नीती ले परायंसे कि जीतुक होओ, आउर मय, दुसर लोग चो लेहरा ने मुटका मारलो असन नी मारे, मानतर मोचो मुटका नी चुके।
27 मानतर मय, मोचो देहें के ओंकायसे कि दुसर लोगमन के नंगत खबर सुनाउन-सुनाउन मोके खुदे भाटा ने पड़ुक नी होओ।