मूरत ने चेगालो जिनीसमन चो बारे ने
8
एदांय मूरतमन ने चेगालो जिनीसमन चो बारे ने आमी जानुसे, “आमी सपाय के बुद आसे” आउर बुद ले गुमान उबजेसे, मानतर मया ले आत्मिक बाड़ती होयसे।
2 कोनी आपने के बुद बीता समजेसे जाले, जसन हुनके जानतोर आय उसन एबले बले नी जाने।
3 मानतर कोनी महापरभु के मया करेसे जाले महापरभु हुनके जानेसे।
4 एईकाजे मूरतमन चो पुरे जतरा करलो मास-भात चो बारे ने: आमी जानुसे, संवसार ने “मूरत काई चे बले नोआय” कसनबलले “महापरभु गोटकी चे आय”।
5 फेर बले बादरी ने आउर मंजपुर ने खुबे देवमन बलाय होयसोत, जसन खुबे “देवमन आउर परभुमन” आसोत।
6 तेबे बले आमचो काजे गोटकी चे महापरभु आसे बललोने बुआ, हुनचो बाटले सपाय बानी आसे आउर आमी हुनचो काजे आंव। गोटकी चे परभु आय, बललोने जीसु किरिस्त, जेचो बाटले सपाय बानी बनलीसे आउर आमी बले हुनचो बनालोर आंव।
7 फेर बले सपाय के असन बुद नीआय, कितरो लोग मूरत के जीवता समजलो किरता मूरत चो पुरे जतरा करलो मास-भात के नंगत समजुन खायसोत, आउर हुनमन चो समज निमल होलो किरता आपने असुद होयसोत।
8 मास-भात आमके महापरभु लगे नी अमराये, आमी नी खादले काई नोकसान नी होए, आउर खादलु जाले काई नफा नी होए।
9 मानतर चेत ने राहा, असन नी होओ कि तुमचो छुट किरता निमलमन पाप ने पड़ोत।
10 कसनबलले कोनी निमल मनुक, तुय बुद बीता के मंदिर ने मूरत ने चेगालो जिनीसमन खातो के दखलोने, काय हुनके बले मूरत चो पुरे जतरा करलो मास-भात के खाउक नी भायदे?
11 एई नीती ले तुचो बुद किरता हुन बिसवास ने निमल भाई नास होयदे, जेचो काजे बले किरिस्त मोरलो।
12 असन हिसाब ले, आपलो भाईमन चो बिरुद पाप करलोने आउर हुनमन चो निमल मन के दुख दिलोने तुमी किरिस्त चो बिरुद पाप करसास।
13 एईकाजे मास-भात खातोर मोचो भाई के पाप करायसे जाले मय काई नीती ले केबई मास-भात नी खायें, जेचोले मय, आपलो भाईमन के पाप करातो बीता नी होयें।