बिया चो बारे ने जानतोर
7
एदांय जोन गोटमन तुमी मोके लिखलासाहास हुन हिसाब ने, मनुक के ठेंगवा रले चे नंगत आय।
2 मानतर बेबिचार ले बाचतो काजे सपाय मनुक चो बायले आउर सपाय बायले चो मनुक रओत।
3 मनुक आपलो बायले चो हक पुरा करो, आउर उसनेचे बायले बले आपलो मनुक चो हक पुरा करो।
4 बायले के आपलो खुद चो देहें ने हक नीआय, मानतर हुनचेई मनुक चो हक आसे, उसनेची मनुक के बले आपलो खुद चो देहें ने हक नीआय, मानतर आपलेई बायले चो हक आसे।
5 तुमी दुनो संगे ची राहा, पारथना करतो काजे सोर ने डंडिक काजे अलगे रउक सकास, मानतर फेर गोटकी संगे राहा। असन नी होओ कि कटलाउक नी सकतो किरता सयतान तुमके परखो।
6 ए गोटमन मोचो सला आय, हुकुम नोआय।
7 मय मन करेसे कि मोचो असन सपाय लोग रओत। मानतर सपाय लोग के महापरभु बाटले अलग-अलग बरमन मिरलीसे, कोकई गोटोक बरन चो आउर कोकई दुसर बरन चो।
8 मय ठेंगवामन आउर रांडीमन चो बारे ने बलेंसे हुनमन के उसनेचे रतोर नंगत आय, जसन मय आंसे।
9 मानतर हुनमन कटलाउक नी सकोत जाले, बिया होओत। कसनबलले लेका-लेकी धंधा ने रतो ले, बिया होतोर नंगत आय।
10 जेचो बिया होलीसे हुनके मय नाई, मानतर परभु हुकुम देयसे, बायले आपलो मनुक के नी छांडो।
11 बायले आपलो मनुक के छांडली जाले दुसर बिया नी होओ, नोहले आपलो मनुक संगे मिला-मिसा होओ; आउर मनुक बले आपलो बायले के नी छांडो।
12 दुसर लोगमन के परभु नाई, मय बलेंसे, कोनी किरिस्ती भाई चो बायले बिसवास नी करे, आउर हुनचो संगे रतो मन आसे जाले हुन, हुनके नी छांडो।
13 आउर कोनी किरिस्ती बईन चो मनुक बिसवास नी करे, मानतर हुनचो संगे रतो मन आसे जाले हुन, आपलो मनुक के नी छांडो।
14 कसनबलले असन मनुक जोन बिसवास नी करेसे, हुन किरिस्ती बईन बाटले पवितर होयसे, आउर हुन बायले जोन बिसवास नी करेसे, हुन किरिस्ती भाई बाटले पवितर होयसे, नोहले हुनमन चो पिला-झीलामन असुद होता, मानतर एदांय तो पवितर होलासोत।
15 मानतर जोन कोनी मनुक नोहले बायले, किरिस्त के बिसवास नी करेसे आउर छांडा-छांडी होउक मन करसोत जाले, छांडा-छांडी होओत। असन हाल ने कोनी भाई नोहले बईन बांदन ने नीआत। महापरभु, आमके अस्तिर ने रतो काजे हागदिलोसे।
16 ए बायले, तुय कसन ने जानुक सकीस, तुय तुचो मनुक चो मुक्ति करासे? आउर ए मनुक, तुय कसन ने जानुक सकीस, तुय तुचो बायले चो मुक्ति करासे?
महापरभु हागदिलो हिसाब ले चला
17 मय सपाय मंडलीमन ने एई हुकुम देयंसे कि तुमी सपाय उसने चला, जसन बरमन परभु तुमके बाटलोसे आउर जसन तुमी महापरभु हागदिलो बेरा रलास।
18 जेके खतना करालो हाल ने हागदिलोसे, हुन खतना नोहलोर नी रओ, जेके खतना नोहलोर हागदिलोर आसे, हुन खतना नी कराओ।
19 खतना कराले आउर खतना नी कराले काई नफा नीआय, मानतर महापरभु चो हुकुम मानतोर चे नफा आय।
20 सपाय लोग के जसन गती ने हागदिलोसे, उसनेचे रओत।
21 तुके कमेया चो गती ने हागदिलोसे जाले फिकिर नी कर। मानतर तुय छंडाय होउक सकीस जाले, छंडाय हो।
22 कसनबलले जेके कमेया चो गती ने परभु हागदिलोसे, हुन परभु चो छंडालोर आय, आउर उसनेचे जेके छंडाय होलो गती ने हागदिलोसे, हुन किरिस्त चो कमेया आय।
23 महापरभु तुमके खुबे मोल देउन घेनलोसे, एईकाजे मनुक चो कमेया नी बना।
24 ए भाईमन, महापरभु हागदिलो बेरा जसन तुमी रलास, उसनेचे महापरभु संगे चे राहा।
ठेंगवामन आउर रांडी बायलेमन
25 कुंआरी लेकीमन चो बारे ने मोके परभु बाटले काई हुकुम नी मिरलीसे, मानतर परभु मोके दया करलो गुने पतेयातो लाईक होउन तुमके सला देयंसे।
26 आजी काली चो बिपती किरता, मोचो बिचार ले, “तुमी जसन आसास उसनेचे रले नंगत आय।”
27 तुचो बायले आसे जाले हुनके छांडतो बिचार नी कर, आउर तुचो बायले नीआय जाले बायले नी डगराव।
28 तुचो बिया होलीसे जाले, ए पाप नोआय, आउर कुंआरी लेकी बिया होले बले काई पाप नोआय। मानतर मय, तुमीमन के संवसारिक डंड ले बचाउक मन करेंसे।
29 ए भाईमन, मय बलेंसे परभु चो एतो समया अमरलीसे। एईकाजे अमदेया बायले चो मया ने पड़ुन नी राहा,
30 आउर गागतो लोग, नी गागलो असन, आउर हरिक होतो लोग, हरिक नी होलो असन आउर घेनतो लोग, आपलो लगे काई चे नीआय असन राहा;
31 आउर ए संवसार ने सुख-भोग करतो लोगमन, सुख-भोग ने पड़ुन नी राहा, कसनबलले ए संवसार अमदेया नी रये।
32 मय मन करेंसे कि तुमी फिकिर ने नी राहा, ठेंगवा मनुक जोन परभु ने आसे हुन, परभु चो सूरता ने रयसे कि परभु के कसन ने हरिक करेंदे।
33 मानतर बिया होलो मनुक, आपलो बायले के कसन हरिक करेंदे बलुन संवसार चो जीवना-खावना चो फिकिर ने रयसे,
34 आउर बिया होलो बायले आउर कुंआरी लेकी ने बले फरक आसे, कुंआरी लेकी परभु चो फिकिर ने रयसे कि हुन देहें आउर आत्मा दुनो ले पवितर होओ। मानतर बिया होलो बायले आपलो मनुक के कसन हरिक करेंदे बलुन संवसार चो फिकिर ने रयसे।
35 मय ए गोट के तुमचो भलई काजे बलेंसे, तुमके अड़ंगा लगातो काजे नोआय। मानतर ए मन करेंसे कि तुमी एक मन होउन परभु चो सेवा, फोबतो असन नंगत ले करा।
36 फेर कोनी मनुक चो कुंआरी लेकी संगे माहला होलीसे, आउर हुन मनुक झपके बिया होउक मन करेसे जाले बिया होओ, एचोले काई पाप नीआय,
37 मानतर कोनी मनुक बिया नी होतो चो पक्का बिचार करलोसे आउर आपने के कटलाउक सके जाले हुन फासला करो कि हुनके बिया होतोर चे नोआय आउर हुन, कुंआरी लेकी के बिया नी होए। ए हुनचो नंगत फासला आय।
38 एईकाजे जोन मनुक, कुंआरी लेकी के बिया होयसे हुन नंगत करेसे, आउर जोन बिया नी होयसे, हुन हुनचो ले बले नंगत करेसे।