किरिस्ती लोगमन ने नियाव-दाव
6
तुमीमन ने झगड़ा होलोने, नियाव काजे पवितर लोगमन के छांडुन, ओधरमी लोगमन लगे जातो साहस कहां ले पावलास?
2 काय, तुमी नी जानास, पवितर लोग संवसार चो नियाव करदे? जेबे तुमके संवसार चो नियाव करतोर आय, तेबे काय, तुमी नानी-चुनी झगड़ामन चो नियाव करुक नी सकास?
3 काय, तुमी नी जानास, आमी सरगदूतमन चो बले नियाव करवां? तेबे काय, आमचो जीवना चो नानी-चुनी झगड़ामन चो नियाव करुक नी सकुं?
4 तुमचो मंजिगता काई बले नानी-चुनी झगड़ामन चो नियाव करतोदांय, काय तुमी हुनीमन के बसाहासे, जोनमन के मंडली ने काई मान नीआय?
5 मय तुमके लाज पड़ातो काजे बलेंसे, काय, तुमीमन ले कोनी बले बुद बीता नीआत, जोन आपलो भाईमन चो नियाव करुक सको?
6 मानतर तुमीमन, भाई-भाई नियाव-दाव होयसास आउर हुन बले परभु के नी पतेयातो लोगमन चो पुरे।
7 सते, तुमीमन ने दोस आसे गुने तुमी आपने-आपने नियाव-दाव लड़सास; हुनचो पलटा ओनियाव काय काजे नी सहसास? आउर आपलो नोकसान काय काजे नी मानसास?
8 मानतर एदांय तुमी खुदे ओनियाव करसास आउर आपलेई भाईमन के नोकसान करसास।
9 काय तुमी नी जानास कि ओधरमी लोग महापरभु चो राज के नी पावदे? धोका नी खाहा, बेसवा लगे जातो लोग, मूरत सेवा करतो लोग, केचड़ाहा, ठगतो लोग, मनुक के मनुक राकतो लोग,
10 चोरतो लोग, लालची लोग, मतवार लोग, सरापतो लोग, झीका-उड़मा करतो लोग, महापरभु चो राज चो हक नी पावदे।
11 तुमीमन ले कोनी-कोनी असनी रलास, मानतर तुमी परभु जीसु किरिस्त चो नाव ले आउर आमचो महापरभु चो आत्मा बाटले पाप ले सुद होउन पवितर आउर धरमी होलास।
देहें ले महापरभु चो मयमा
12 तुमीमन ले कोनी-कोनी बलेसाहास, “सपाय मोचो काजे नंगत आय”, मानतर सपाय नफा चो नोआय। “मय सपाय करुक सकें”, मानतर मय काई अडरा बुतामन चो हक ने नी रयें।
13 तुमी असन बले बलेसाहास “भात, पेट काजे आय, आउर पेट भात काजे आय”, मानतर महापरभु भात आउर पेट, दुनो के नास करेदे। देहें, बेबिचार करतो काजे नोआय, मानतर परभु काजे आय; आउर परभु देहें चो भलई काजे आय।
14 आउर महापरभु आपलो सकत ले परभु जीसु के जियालो, आउर आमके बले जियायदे।
15 काय तुमी नी जानास, तुमचो देहें किरिस्त चो अंग आय? काय मय, किरिस्त चो अंग के बेसवा चो अंग बनाउआंय? केबई नाई।
16 काय तुमी नी जानास कि जोन बले बेसवा संगे रयसे, हुन, बेसवा संगे गोटकी देहें होयसे? कसनबलले धरमसास्तर ने लिखलीसे, “हुनमन दुनो गोटकी देहें होदे”।
17 मानतर जोन बले परभु संगे रयसे, हुन, परभु संगे गोटकी आत्मा चो होयसे।
18 जितरो पाप मनुक करेसे हुन आपलो देहें ले बाहरी करेसे, मानतर बेबिचार करु बीता आपलो देहें चो बिरुद ने पाप करेसे, एईकाजे बेबिचार ले बाचुन राहा।
19 काय तुमी नी जानास, तुमचो देहें पवितर आत्मा चो मंदिर आय, जेके तुमी महापरभु ले पावलासास आउर हुन पवितर आत्मा तुमचो थाने रयसे? तुमी, तुमचो नोआहास;
20 कसनबलले तुमके महापरभु मोल देउन घेनलोसे। एईकाजे आपलो देहें ले महापरभु चो मयमा करा।