केचड़ बुता करुमन के मंडली ले निकरातोर
5
तुमीमन ले कोनी बेबिचार करेसे बलुन मोके कोनी सांगला, असन केचड़ बुता बिजातीमन ने बले कोनी नी करोत, गोटोक मनुक आपलो मावसी-माय के राकेसे।
2 आउर तुमी नी खिसियाहास, उलटा गुमान करसास! नोहले असन बुता करतो बीता के तुमचो मंजिगता ले निकराउन देतास।
3 मय देहें चो हिसाब ने तुमचो ले लापी आंसे, मानतर आत्मा ले तुमचो संगे आंसे आउर असन केचड़ बुता करतो मनुक काजे ए फासला करलेसे
4 कि तुमी मंडली ने जुहा होआ, मोचो आत्मा आउर आमचो परभु जीसु चो सकत बले तुमचो संगे रयदे।
5 तेबे हुन केचड़ बुता करु मनुक के आमचो परभु जीसु चो नाव ने देहें चो नास काजे सयतान के सोपा, कसनबलले परभु जीसु नियाव करतो दिने हुनचो आत्मा मुक्ति पायदे।
6 तुमी गुमान नी करा! काय तुमी नी जानास खिंडिक असन पाग सपाय चटकलो पिसान के पाग उलटायसे?
7 जुना पाग के गुचाउन तुमी नवा चटकलो पिसान असन सुद बना, तेबे तुमी फसह चो पाग नोहलोर रोटी असन होआसे। कसनबलले किरिस्त आमचो काजे फसह चो मेंडा पिला असन, जतरा होलोसे।
8 एईकाजे इआ, आमी तिहार हरिक-उदीम ले मनाउं। अडरा आउर केचड़ बुता चो पाग ले बनालोर रोटी ले नाई, मानतर सुद आउर सत चो पाग नोहलोर रोटी ले बनाउ।
9 मय चिटी ने तुमके लिखलेसे कि बेबिचार करुमन चो संगत नी करा।
10 मोचो बलतो गोट ए नोआय कि तुमी ए संवसार चो बेबिचार करुमन, लालचीमन, जटा-खायामन आउर मूरत सेवा करुमन संगे मुरे संगत नी करा, असन करलोने ए संवसार ने रउक चे नी सकास।
11 मानतर मोचो बलतो गोट असन आय कि कोनी किरिस्त भाई बलाय होयसे आउर बेबिचार, लालची, मूरत सेवा करतोर, झगड़ा करतोर, मतवार नोहले जटा-खाया असन बुता करेसे जाले, हुनमन चो संगत नी करा, आउर असन लोगमन संगे खाउक बले नी बसा।
12 मंडली ले बाहरी लोगमन चो नियाव मोचो बुता नोआय, मानतर काय तुमी मंडली भीतरे पाप करतोमन चो नियाव करुक नी सकासे?
13 बाहरी लोगमन चो नियाव महापरभु करुआय। एईकाजे “हुन बेबिचार करु बीता के भात छांडा”।