मंडली लोग भिने-भिने होतो चो बिरुद
3
ए भाईमन, मय तुमके आत्मिक लोगमन चो नीती असन गोटेयाउक नी सकले, मानतर संवसारी लोगमन चो नीती ले गोटेयाले कि तुमचो बिसवास किरिस्त ने पिला असन आसे।
2 मय तुमके गोरस चे खुआले भात नाई, कसनबलले तुमी भात के जीराउक नी सकास, आउर एबे बले भात खाउक नी सकसास।
3 तुमी एबे बले संवसारी लोग असन आसास। तुमी ईरका आउर झगड़ा होयसास, तेबे काय तुमी संवसारी लोग नोआहास? काय तुमी मनुक चो नीती ने नी चलसास?
4 कसनबलले कोनी बलेसे, “मय पउलुस बाटे आंय”, आउर कोनी बलेसे “मय अपुलोस बाटे आंय”, तेबे काय तुमी संवसारी लोग नोआहास?
5 अपुलोस कोन आय? आउर पउलुस कोन आय? आमी सोजे महापरभु चो कमेया चे आंव, आमचो बाटले तुमी पतेयालास, आउर आमी हुन सपाय बुता के करलु जेके परभु आमके सोपु रये।
6 मय रोपले आउर अपुलोस पानी दिलो, मानतर महापरभु बड़ालो।
7 रोपु बीता आउर पानी देउ बीता काई चे नोआत, मानतर महापरभु चे सपाय आय जोन सबके बड़ायसे।
8 रोपु बीता आउर पानी देउ बीता दुनो गोटकी बरन चो आत, आउर सपाय लोग के आपलो मसागत हिसाब ले भूती मिरेदे।
9 कसनबलले आमी महापरभु संगे सेवा-बुता करतो लोग आंव, तुमी महापरभु चो बेड़ा आउर हुनचो बनालोर घर आहास।
10 महापरभु मोके दिलो दया हिसाब ले मय बुद-बीता राज-मिस्तरी असन पाया बनाले; आउर दुसर हुन थाने जोड़ाई करसोत, मानतर जोड़ाई करतो लोग चेत करा कि कसन जोड़ाई करसास।
11 कसनबलले हुन पाया जीसु किरिस्त आय, आउर हुनके छांडुन कोनी दुसर पाया बनाउक चे नी सकोत।
12 कोनी ए पाया ने सोन, रूप नोहले मोल बिती पकना, रूक, रोंडा नोहले खड़ चो घर-कुड़िया बनायसोत जाले,
13 नियाव दिने सपाय चो बुता दग-दगा दखा देयदे। कसनबलले सपाय चो बुता के आईग ने परखेदे कि हुनमन चो बुता कसन आसे।
14 जेचो बुता हुन पाया ने बरसक रयदे, हुन भूती पायदे।
15 मानतर हुनचो बनालो बिती जरली जाले हुनके खुबे नोकसान होयदे; आउर आपने बाचेदे, मानतर जरते-जरते बाचेदे।
16 काय तुमी नी जानास कि तुमी महापरभु चो मंदिर आहास, आउर महापरभु चो आत्मा तुमचो भीतरे रयसे?
17 कोनी महापरभु चो मंदिर के नास करला जाले, महापरभु हुनमन के नास करेदे, कसनबलले महापरभु चो मंदिर पवितर आय आउर हुन मंदिर तुमी आहास।
18 कोनी आपने के धोका नी दियास, तुमीमन ले कोनी आपने के ए संवसार चो गियानी समजेसे जाले हुन भकवा होउन रले चे नंगत आय, तेबे हुन गियानी होउक सकेदे।
19 कसनबलले ए संवसार चो गियान महापरभु चो नंजर ने फोकाहा आय, जसन धरमसास्तर ने लिखलीसे, “हुन गियानीमन के हुनीमन चो गियान ने गुपाउन देयदे”,†
20 आउर बलेसे, “परभु, गियानीमन चो बिचार के फोकाहा आय बलुन जानेसे”।
21 एईकाजे कोनी, गियानीमन उपरे गुमान नी करा, कसनबलले सपाय तुमचेई आय:
22 पउलुस, अपुलोस, कयफा, संवसार, जीवना, मोरना, एबे चो गोट, पाछे चो गोट, ए सपाय तुमचेई आय,
23 आउर तुमी किरिस्त चो आहास, आउर किरिस्त महापरभु चो आय।