किरिस्त चो बारे ने नंगत खबर
2
ए भाईमन, मय अकल-गियान चो गोटमन के फोबाउन सांगतो काजे नाई, मानतर महापरभु चो बचन चो भेद सांगतो काजे तुमचो लगे ईले।
2 कसनबलले मय मन ने पक्का टेक धरुन रले कि तुमचो मंजिगता कुरूस ने चेगालो जीसु किरिस्त के छांडुन काई गोट के नी जानें।
3 मय निमल ले आउर डर ने खुबे थरथरते तुमचो संगे रले।
4 मोचो गोटमन ने आउर मोचो सुनातो नंगत खबर ने मनुक के मोहातो गोटमन नी रली, मानतर पवितर आत्मा चो सकत ने रली।
5 एईकाजे तुमचो बिसवास मनुक चो गियान ने नाई, मानतर महापरभु चो सकत ने रओ।
महापरभु चो गियान
6 फेर बले आमी सिद लोगमन के गियान चो गोट के सांगुसे, मानतर ए संवसार चो आउर ए जुग चो राजपालमन चो नास होतो गियान असन नोआय।
7 आमी महापरभु चो लुकलो गियान के भेद चो नीती ले सांगुसे, जेके महापरभु आमचो मयमा काजे आगे जुगे ले बनालोसे।
8 जेके ए जुग चो राजपालमन कोनी नी जानला, हुनमन जानते रले, मयमा चो परभु के कुरूस ने नी चेगाता।
9 मानतर धरमसास्तर ने लिखलीसे,
“महापरभु, आपने के मया करतो लोगमन काजे काय तियार करलोसे,
हुनके कोनी आंईक ले दखलोर नीआय आउर कान ले सुनलोर नीआय,
आउर कोनी केबई मन ने बिचारलासोत बले नाई”।
10 मानतर महापरभु हुनके, आपलो आत्मा बाटले आमके दखालो, कसनबलले आत्मा सपाय गोटमन के आउर महापरभु चो भेद चो गोटमन के परखुआय।
11 जसन गोटोक मनुक चो बिचार के खुद चो आत्मा के छांडुन आउर कोनी मनुक जानुक नी सके, उसनेची महापरभु चो बिचार के बले हुनचेई आत्मा के छांडुन आउर कोनी जानुक नी सके।
12 आमी संवसार चो आत्मा के नाई, मानतर महापरभु दिलो आत्मा के पावलुसे, जेचोले आमी महापरभु दिलो बरमन के समजुक सकुं।
13 आमी मनुक चो सिखालोर गियान चो गोटमन ले नाई, मानतर आत्मा चो सत गोटमन के पवितर आत्मा चो सिखालो गियान मिलाउन-मिसाउन सांगुसे।
14 मानतर संवसारी मनुक, महापरभु चो आत्मा सांगलो गोट के नी धरे, कसनबलले हुनचो नंजर ने, ए फोकाहा गोट आय। आउर हुन मनुक हुनके समजुक बले नी सके, कसनबलले हुन गोट के परखतोर आत्मा बाटले होयसे।
15 पवितर आत्मा पावलो मनुक सपाय के परखुआय, मानतर हुनके कोनी परखुक नी सके।
16 “कसनबलले परभु चो मन के कोन जानलोसे?
कोन हुनके सिखाउक सके?”
मानतर आमचो ने किरिस्त चो मन आसे।