कुरिंथी चो मंडली
काजे पठालो-बीता पउलुस चो पईल चिटी
जुहार
1
जीसु किरिस्त चो पठालो-लोग होतो काजे, महापरभु आपलो मन ले हागदिलो पउलुस आउर भाई सोस्थिनेस बाटले,
2 कुरिंथुस ने रतो महापरभु चो मंडली काजे चिटी: जीसु किरिस्त ने जोन पवितर आसोत आउर हुनमन संगे पवितर होतो काजे महापरभु हागदिलोसे; आउर सपाय थाने जोन बले परभु जीसु किरिस्त चो नाव के धरसोत।
3 तुमी सपाय के आमचो बुआ महापरभु आउर परभु जीसु किरिस्त बाटले दया आउर अस्तिर मिरते रओ।
किरिस्त बाटले बर पावतोर
4 महापरभु चो दया तुमके जीसु किरिस्त ने होलीसे, एईकाजे मय तुमचो काजे महापरभु के रोजे धन-धन करेंसे।
5 जीसु किरिस्त ने रउन तुमी सपाय गोट ने बललोने सपाय बचन आउर गियान ने धनी होलास
6 बललोने, किरिस्त चो गवई तुमचो ने सत होली,
7 जेचोले तुमके काई बरदान चो बले कमी नी होली, तुमी आमचो परभु जीसु किरिस्त चो एतो बाट दखते रयसास।
8 हुन तुमके सरासरीदांय ले बिसवास ने चमकट करेदे कि तुमी आमचो परभु जीसु किरिस्त चो दिने दोख नोहलो होआ।
9 कसनबलले महापरभु सत आय, जोन तुमके आपलो बेटा आउर आमचो परभु जीसु किरिस्त चो संगत ने हागदिलोसे।
मंडली ने लड़ा-जुजा
10 ए भाईमन, मय तुमके आमचो परभु जीसु किरिस्त चो नाव ने गुहारेंसे: तुमी एक सोर ने राहा, तुमी भिने-भिने नी होआ, मानतर गोटकी मन-बिचार ने मिलुन-मिसुन राहा।
11 कसनबलले ए मोचो भाईमन, तुमीमन ले कोनी-कोनी झगड़ा होयसास बलुन मोके खलोए घर चो लोगमन सांगला।
12 मोचो बलतो गोट ए आय कि तुमी आपने के कोनी पउलुस चो, कोनी अपुलोस चो, कोनी कयफा* चो आउर कोनी किरिस्त चो आंव बलसास।
13 काय, किरिस्त बाटा होलोसे? काय, पउलुस के तुमचो काजे कुरूस ने चेगाला? नोहले तुमी पउलुस चो नाव ने बपतिस्मा धरलास?
14 मय महापरभु के धन-धन करेंसे कि किरिसपुस आउर गयुस के छांडुन मय तुमीमन ले कोकई बले बपतिस्मा नी दिले।
15 कोनी असन बलुक नी सकोत कि तुमी मोचो नाव ने बपतिस्मा धरलासास।
16 आउर हव, मय स्तिफनास चो कुटुम के बले बपतिस्मा दिले, एमन के छांडुन आउर कोकई बपतिस्मा दिले बलुन मय नी जाने।
17 कसनबलले किरिस्त मोके बपतिस्मा देतो काजे नाई, मानतर नंगत खबर सुनातो काजे पठालोसे; आउर फोबाउन सांगतो गियान चो हिसाब ने बले नोआय, नोहले किरिस्त चो कुरूस ने डंड पावतोर फोकाहा होयदे।
किरिस्त, महापरभु चो गियान आउर सकत आय
18 कुरूस चो खबर, नास होतो लोगमन काजे फोकाहा गोट आय, मानतर आमी, मुक्ति पावतो लोगमन काजे महापरभु चो सकत आय।
19 कसनबलले धरमसास्तर ने लिखलीसे,
“मय गियानीमन चो गियान के नास करेंदे
आउर समजतो बीतामन चो बुद के गुपाउन देयंदे”।
20 कहां आसे गियानी? कहां आसे धरम-पंडित? कहां आसे ए जुग चो काट-छाट करु बीता? काय, महापरभु ए संवसार चो गियान के फोकाहा नी करलो?
21 महापरभु आपलो गियान ले जानलो कि ए संवसार चो लोग आपलो गियान ले महापरभु के नी चिताला, तेबे महापरभु के ए नंगत लागली कि नंगत खबर सुनुन पतेयातो बाटले लोगमन मुक्ति पाओत, मानतर संवसार चो लोगमन ए नंगत खबर सुनातोके फोकाहा आय बलसोत।
22 जहूदी लोग अचरित चीना मांगसोत, आउर जूनानी लोग गियान डगरायसोत,
23 मानतर आमी हुन कुरूस ने चेगालोर किरिस्त चो खबर सुनाउंसे, जोन जहूदीमन काजे धोका खातो गोट आय आउर बिजातीमन काजे फोकाहा गोट आय बलसोत।
24 मानतर जहूदी होओ नोहले जूनानी, जोन हागदिलो लोग आत हुनमन काजे किरिस्त, महापरभु चो सकत आउर महापरभु चो गियान आय।
25 कसनबलले महापरभु चो भकवा होतोर मनुकमन चो गियान ले जुगे गियान आय आउर महापरभु चो निमल होतोर मनुकमन चो सकत ले बले जुगे सकत आय।
26 ए भाईमन, बिचारुन दखा, तुमी कसन रलास, जेबे महापरभु तुमके हागदिलो। हुदलदांय तुमी संवसार चो हिसाब ले गियानी नोहले खुबे सकत बीता आउर बड़े जात चो बले नी रलास।
27 मानतर महापरभु गियानीमन के लाज पड़ातो काजे संवसार चो भकवामन के बाछलो, आउर महापरभु बलबीतामन के लाज पड़ातो काजे संवसार चो निमलमन के बाछलो।
28 आउर महापरभु संवसार चो हिनस्ता आउर नानी जात चो लोगमन के, बललोने जेचो काई इजित बले नीआय, उसने लोगमन के बाछलो कि इजित पावतो लोगमन फोकाहा होओत।
29 तेबे महापरभु चो पुरे कोनी गुमान करुक नी सकदे।
30 मानतर महापरभु बाटले तुमी जीसु किरिस्त ने आसास, जोन आमचो काजे हुनचो बाटले गियान होलो, बललोने आमचो काजे धरमी, पवितर आउर छंडाउ आय।
31 तेबे जसन धरमसास्तर ने लिखलीसे, उसनेचे होओ, “जोन गुमान करुआय हुन परभु ने गुमान करो।”