रोम सहर बाटे जातोर
27
जिदलदांय आमी पानी जाहाज ने इटली राज ने जातो गोट पक्का होली, तेबे हुनमन पउलुस आउर दुसर कयदीमन के जूलियुस नाव चो गोटोक पलटन चो नानी मुखिया चो हाथे सोपुन दिला, जोन अगस्तुस सेना चो गोटोक मुखिया रलो।
2 आमी अदरमुतियुम सहर चो गोटोक पानी जाहाज ने चेगलु जोन आसिया चो कटा-कटा चो जगामन ने जातो बिती रली। आमचो संगे मकिदुनिया राज ले थिसलुनीके सहर चो भाई अरिस्तरखुस रलो।
3 दुसर दिने, आमीमन सयदा घाट ने अमरलु, आउर जूलियुस, पउलुस चो उपरे दया करुन भाति हुनके मीतमन चो लगे जाउक दिलो कि हुनमन पउलुस चो संगे मान-दान जुहार भेट करुक सकोत।
4 हुताले पानी जाहाज ने चेगलु आउर लेहरा उलटा होतोने आमी साइपरस ढिपका चो आड़ ने होउन भाति गेलु,
5 आउर हुताले आमी किलिकिया आउर पंफुलिया चो लगे चो समदूर ले होउन भाति लुकिया चो मीरा सहर ने उतरलु।
6 हुता पलटन चो नानी मुखिया के सिकंदरिया चो गोटोक पानी जाहाज मिरली जोन इटली राज ने जाते रली। हुन आमके हुन थाने चेगाउन दिलो।
7 जिदलदांय आमी खुबे दिन ले धीरे-धीरे जाउन-जाउन खुबे खट-खट ले कनिदुस चो पुरे अमरलु, तेबे आमके खुबे लेहरा-पूर बाटे पड़ली, लेहरा आमके पुरे जाउक नी देते रली। एईकाजे आमी सलमोने चो पुरे ले होउन भाति करेते चो आड़ ले होउन गेलु,
8 आउर हुनचो रेटे-रेटे खट-खट ले आमी “सुभसरन जगा” नाव चो गोटोक समदूर चो घाट ने अमरलु, जोन थान ले लसया सहर लगे रली।
9 खुबे दिन होलो पाछे, हुनमन के पानी ने जातो के बले गराहां रली, कसनबलले उपास चो सरासरी बेरा बले सरुन रली, तेबे पउलुस, हुनमन के असन बलुन समजालो,
10 “ए भाईमन, मोके असन जान पड़ेसे कि एबे चो जातो ने आमचो उपरे गराहां एयदे, आउर जाय-जमक आउर पानी जाहाज के ची नाई, मानतर आमचो जीव चो बले नोकसान होउक सके।”
11 मानतर पलटन चो नानी मुखिया, पउलुस चो गोट ले, पानी जाहाज चलातो बीतामन चो मुखिया आउर पानी जाहाज चो मालिक चो गोट के जुगे मानलो।
12 हुन समदूर चो घाट, सीतकार ने रतो लाईक नी रली। एईकाजे जुगे लोगमन, हुताले पानी जाहाज चलाउन कसने करुन बले, फिनिक्स ने अमरुन सीतकार हुता काटतो मन करला। फिनिक्स, करेते ढिपका चो गोटोक समदूर चो घाट आय, जोन थाने बेर पड़ती चो डेबरी हाथ बाटले आउर बेर पड़ती चो उजा हाथ बाटले जाउक होयदे।
13 जिदलदांय खिंडिक-खिंडिक बेर पड़ती चो डेबरी हाथ बाट ले लेहरा एउक मुरियाली, तेबे हुनमन असन समजला कि हुनमन चो काम बनली। हुनमन पानी जाहाज चो डोरी ढीलुन दिला आउर करेते ढिपका चो कटा-कटा ले जाउक मुरियाला।
14 मानतर डंडिक रउन करेते ढिपका बाट ले गोटोक बड़े लेहरा-धुका ईली, जोन “जुरकुलीन” बलाय होयसे।
15 जिदलदांय हुन बड़े लेहरा-धुका पानी जाहाज ने एउन ठटाय होली, तेबे पानी जाहाज ठेबुक नी सकली। एईकाजे आमीमन, हुनके बोहरुक दिलु आउर असनी बोहोरते-बोहोरते जाते गेलु।
16 तेबे कलोदा नाव चो गोटोक नानी असन ढिपका चो आड़ ने बोहोरते-बोहोरते आमी खुबे खट-खट ले पानी जाहाज चो डोंगी के आमचो थर ने पाड़ुक सकलु।
17 चलातो बीतामन हुनके पानी जाहाज ने उचाला आउर कितरो उपाय करुन भाति पानी जाहाज के खाले ले बांदला आउर सुरतिस चो बारु-सरा ने टेकतो डर ने पानी जाहाज चो लेहरा धरतो पोता के उतराउन भाति बोहोरते-बोहोरते जाउक दिला।
18 जिदलदांय आमी लेहरा ले खुबे ठेगला-मसका होलु, तेबे दुसर दिन हुनमन पानी जाहाज ले बोजा-बानी के पकाउक मुरियाला।
19 आउर तीसर दिन आपलो हाथमन ले पानी जाहाज चो कितरो जमकमन के पकाउन दिला।
20 आउर आमके खुबे दिन ले बेर नोहले तारामन दखुक नी मिरली, आउर बड़े लेहरा खुबे बोहते रली, तेबे सरासरी ने आमचो बाचतो आसा बले टुटते रली।
21 हुनमन खुबे दिन ले भूके रला, तेबे पउलुस हुनमन चो मंजिगता उबा होउन भाति बललो, “ए लोगमन तुमके मोचो गोट के धरतोर रली, तुमीमन करेते थान ले पानी जाहाज नी चलालोने आमचो उपरे ए गराहां नी होती आउर ए नोकसान बले नी होती।
22 मानतर एबे मय तुमके सांगेंसे, हरिक ने राहा। कसनबलले तुमचो मंजिगता ले कोचई जीव नोकसान नी होए, सोजे जाहाजचेई होयदे।
23 कसनबलले महापरभु जेचो मय आंय आउर जेचो सेवा मय करेंसे हुनचो गोटोक सरगदूत, गेलो राती मोचो लगे एउन भाति बललोसे,
24 ‘ए पउलुस, नी डर, तुके कयसर राजा चो पुरे उबा होतोर निचट आसे, आउर दख, महापरभु तुचो संगे जातो सपाय के तुके दिलोसे।’
25 एईकाजे ए भाईमन हरिक ने राहा। कसनबलले मय महापरभु चो गोट उपरे सतपतेयायंसे, जसन मोचो ले बललासोत उसनेची होयदे।
26 मानतर आमचो जाहाज कोनी ढिपका उपरे लेहरा ले गोंजी होयदे आउर आमी हुता लटकुन रवां।”
27 जिदलदांय चवदा राती होली आउर आमीमन अदरिया समदूर ने, ए बाटे-हुन बाटे होते जाते रलु, तेबे अधगर राती चो अमरा-अमरी के, जाहाज चलातो लोगमन के असन लागली कि आमी कोनी भुंय कटा अमरलुसे।
28 आउर पानी चो थाहा धरुन भाति हुनमन बीस छाता हाथ गड़िया पावला, आउर खिंडिक पुरे जाउन भाति थाहा धरला, तेबे पंदरा छाता हाथ पावला।
29 तेबे बड़े-बड़े पकनामन उपरे लागतो के डरुन भाति हुनमन पानी जाहाज के ठेबातो काजे बड़े बिल्लईकल असन चारठन लंगरमन के हुनचो पाट बाट ले उतराला, आउर बियान पावतो चो बाट दखते रला।
30 जाहाज चलातो बीतामन, पानी जाहाज ले परातो काजे बिचार करुन रला। हुनमन मुंडी बाटले बड़े बिल्लईकल असन लंगरमन के उतरातो बिचार ने डोंगी के समदूर ने उतराउन दिला।
31 तेबे पउलुस, पलटन चो नानी मुखिया आउर पाईकमन के बललो, “एमन पानी जाहाज ने नी रलोने तुमीमन चो जीव नी बाचुक सके।”
32 तेबे पाईकमन बरंईमन के काटुन भाति डोंगा के बोहरुक दिला।
33 बियान पावतो ले आगे, पउलुस सपाय के खातो काजे सांगलो आउर हुन हुनमन के गुहारलो, “चवदा दिन होली, तुमी बाट दखते-दखते भूके आसास आउर तुमीमन काई बले नी खादलासाहास।
34 एईकाजे मय तुमके बिनायंसे, खिंडिक काई खाउन दियास, जेचोले तुमचो जीव बाचुक सको। कसनबलले तुमचो कोचई मुंड चो गोटोक चूंदी बले नोकसान नी होए।”
35 आउर असन बलुन पउलुस, रोटी धरुन भाति सपाय चो पुरे महापरभु के पारथना करलो, आउर रोटी टुटाउन भाति खाउक मुरियालो।
36 तेबे हुनमन सपाय बले ढाढ़ुस करुन भाति खाउक मुरियाला।
37 आमी सपाय मिसुन भाति पानी जाहाज ने दुय सव तीन कोड़ी सोला झन रलु।
38 हुनमन पेट भोरते खादलो पाछे गउं के समदूर ने पकाउन भाति पानी जाहाज के उकास करला।
39 बियान पावलोके, हुनमन जगा के नी चिताला मानतर हुनमन गोटोक घाट के दखला, जेचो ओसार खंड रली। हुनमन बिचारला कि होउक सकलोने, एथाय पानी जाहाज के पाड़ुं।
40 जिदलदांय हुनमन बड़े बिल्लईकल असन लंगरमन चो बरंईमन के काटुन भाति समदूर ने छांडुन दिला, हुदलदांय पानी जाहाज के मोड़तो बिती चाटुमन चो बरंई के बले काटुन दिला आउर जाहाज चो पुरे चो लेहरा धरतो पोता के चेगाउन भाति खंड बाटे गेला।
41 मानतर पानी जाहाज समदूर चो दुय धारा चो जोड़ान ने अमरुन भाति बारु-सरा ने टेकली आउर हुता जाहाज चो मुंडी गड़ली आउर निकरुक नी सकली। मानतर हलकामन चो बल ले पानी जाहाज चो पाट बाट टुटुक मुरियाली।
42 तेबे पाईकमन चो असन बिचार होली, कयदीमन के मोरते मारुन देउं? कसनबलले कोनी पोंहरुन भाति निकरुन नी पराओत।
43 मानतर पलटन चो नानी मुखिया पउलुस चो जीव बचातोर मन ले हुनमन के ए उआट ले ठेबालो, आउर असन हुकुम दिलो, जोनमन पोंहरुक सकदे हुनमन आगे कूदुन भाति रेटे निकरुन जाओत,
44 आउर बाचलो लोग कोनी फारामन ने आउर कोनी पानी जाहाज चो काई टुटलो फूटलो गोंदामन चो साहरा ले निकरुन जाओ। असनी करुन भाति सपाय लोग बाचुन भुंय ने नंगत ले अमरला।