पउलुस, अगरिपा राजा चो पुरे
26
अगरिपा राजा, पउलुस के बललो, “तुके आपलो काजे बलतो हुकुम आसे।” तेबे पउलुस हाथ के उठालो आउर आपने के बचातो काजे गोट गोटेयाउक मुरियालो।
2 “ए अगरिपा राजा, जितरो गोट चो जहूदीमन मोचो उपरे दोस लगायसोत, आजी तुमचो पुरे हुनचो बारे ने सांगतो काजे मय खुबे हरिक आंसे।
3 तुमी जहूदीमन चो नीती आउर गोट-बातमन चो झगड़ा के जानासाहास, एईकाजे मय तुमचो ले गुहारेंसे कि अस्तिर ने मोचो गोटमन के सुना।
4 जसन मोचो जीवना, जुवान बेरा ले, आपलो राज ने आउर जरूसलेम ने काटले, एके सपाय जहूदीमन जानसोत।
5 हुनमन साकी देउक मने करसोत जाले, देउक सकोत। कसनबलले हुनमन मूर ले मोके चितालासोत, मय आमचो धरम चो सबु ले कटुर गोहड़ी चो गोटोक फरीसी रले।
6 आउर एबे हुन बायदा चो आसा काजे जोन महापरभु आमचो दादी पुरखामन ले करुन रलो, मोचो उपरे नियाव-दाव चलेसे।
7 हुनी बायदा चो पुरतो चो आसा लगाउन आमचो बारा बंसमन आपलो मन ले रात-दिन महापरभु चो सेवा करते ईलासोत। ए राजा, एई आसा काजे जहूदीमन मोचो उपरे दोस लगायसोत।
8 जेबे महापरभु मोरलो लोगमन के जियायसे, तेबे तुमी ए गोट के काय काजे नी पतेयाहास।
9 मय बले समजुन रले, जीसु नासरतेया चो नाव चो बिरुद ने मोके जगले-जीता दया नोहलो बुतामन करतोर आय।
10 मय बले जरूसलेम ने असने करले, आउर पुजारीमन चो मुखियामन थान ले हक पाउन भाति खुबे पवितर लोगमन के जयल घरे ढकाते रले, आउर हुनमन के मोरते मारतो बेरा मय बले हुनमन चो बिरुद ने राजी रले।
11 सपाय मंडली-घरमन ने मय हुनमन के डंड दियाउन-दियाउन जीसु चो बदी कराते रले, रीस काजे मय असन बोया होउन रले कि दुसर सहरमन ने बले जाउन-जाउन हुनमन के डाटा-टेवा करते रले।
12 पउलुस आउर बललो, एईकाजे मय जिदलदांय पुजारीमन चो मुखियामन चो राजी आउर हक दिलोर कागत के धरुन भाति दमिसक सहर बाटे जाते रले,
13 ए राजा, तेबे बाट ने मुंडे-बेरा सरग ले बेर चो उजर ले बले जुगे बरतो उजर मोचो आउर संगे जातो लोगमन चो भोंवरक बरतो के दखले।
14 जिदलदांय आमी सपाय भुंय ने घसरुन पड़लु, तेबे इबरानी बोली ने, मोके असन बलतो राग सुना दिली: ‘ए साउल, ए साउल, तुय मोके काय काजे डाटा-टेवा करसीस? धार ने लात मारतोर तुचो काजे मसकिल आय।’
15 मय बलले, ‘ए परभु, तुय कोन आस?’ परभु बललो, ‘मय जीसु आंय जेके तुय डाटा-टेवा करसीस।
16 मानतर एबे तुय उठ आउर उबा हो, कसनबलले मय तुके एईकाजे दरसन दिलेसे कि तुके हुन गोटमन चो साकी बनायंदे, जोन तुय दखलिसीस आउर हुनमन चो बले जोनमन काजे मय तुके दरसन देयंदे।
17 मय तुके तुमचो लोगमन ले आउर बिजाती लोगमन ले बचाते रयंदे, जोनमन लगे मय एबे एईकाजे पठायंसे,
18 कि तुय हुनमन चो आंईकमन के उगाड़से आउर हुनमन अंधार ले उजर बाटे आउर सयतान चो हक ले महापरभु चो बाटे फिरोत। कसनबलले हुनमन पापमन चो खेमा, आउर मोचो उपरे सतपतेयालो किरता पवितर लोगमन संगे हक पावदे’।”
19 पउलुस आउर बललो, “ए अगरिपा राजा, मय सरग ले मिरलो हुन दरसन के नी निंदरले,
20 मानतर मय आगे दमिसक आउर जरूसलेम ने रतो लोगमन के, हुनचो पाछे सपाय जहूदिया राज ने आउर बिजातीमन के समजाते रले कि पापमन ले मन बोहड़ाहा आउर महापरभु चो बाटे एउन भाति मन बोहड़ालो असन बुता करा।
21 एचई काजे जहूदीमन मोके मंदिर ने धरुन भाति मोरते मारतो काजे खुबे घतयाते रला।
22 महापरभु चो साहरा ले मय आजी ले जीव आंसे आउर मय नानी-बड़े आउर सपाय चो पुरे साकी देयंसे, मय हुन गोटमन के छांडुन आउर काई नी बलले, जोन अगमजानीमन आउर मोसा बले बलुन रला कि ए गोटमन होतो बिती आय,
23 कसनबलले किरिस्त के दुख उठातोर होयदे आउर हुन सबु ले आगे मोरलो थान ले जीव उठुन भाति जहूदीमन आउर बिजातीमन, दुनो के उजर चो गोट सांगेदे।”
24 जिदलदांय पउलुस ए गोटमन सांगते रलो, तेबे फेसतुस किरकिरुन बललो, “ए पउलुस, तुय बोया आस, खुबे गियान तुके बोया उलटालीसे!”
25 मानतर पउलुस बललो, “ए राजा फेसतुस, मय बोया नोआंय, मानतर मय सत बुद चो गोट गोटेयायंसे।
26 अगरिपा राजा बले, जेचो पुरे मय डर नोहलो बलेंसे, ए गोटमन के नंगत ले जानेसे, आउर मय पतेयालेसे कि ए गोटमन हुनचो ले नी लुकलीसे। कसनबलले ए गराहांमन मंजपुर चो कोनी नी जानतो कोंटी ने नी होलीसे।
27 ए अगरिपा राजा, काय तुमी अगमजानीमन चो गोटमन के सतपतेयायसाहास? हव, मय जानेंसे, तुमी सतपतेयायसाहास।”
28 तेबे अगरिपा पउलुस के बललो, “काय, तुय इतरोई ने मोके किरिस्ती बनाउक मने करसीस?”
29 पउलुस बललो, “महापरभु ले मोचो एई पारथना आसे, खिंडिक ने हो नोहले खुबे ने हो, तुमी एकलाय ची नाई मानतर आजी मोचो गोटमन के सुनतो सपाय लोगमन, मोचो ए सिकरामन के छांडुन मोचो असन होउन जाओत।”
30 तेबे अगरिपा राजा, राजपाल, बिरनिके आउर हुनमन चो संगे बसलो लोगमन उबा होला।
31 हुनमन बाहरे जाउन भाति गोटोक-दुसर संगे गोटेयाला, ए मनुक, असन काई नी करलोसे, जेचो काजे एके मोरते मारतो चो डंड नोहले जयल घरे भोरुक होओ।
32 अगरिपा राजा फेसतुस के बललो, “ए मनुक, बड़े राजा कयसर के नी गुहारलोने, छांडुक सकते रलु।”