फेसतुस लगे पउलुस चो नियाव-दाव
25
फेसतुस आपलो राज ने ईलो तीन दिन पाछे, कयसरिया ले जरूसलेम ने गेलो।
2 तेबे पुजारीमन चो मुखियामन आउर जहूदीमन चो मुखियामन हुनचो पुरे पउलुस उपरे नालीस करला,
3 हुनमन, हुनके हागदेउन भाति पउलुस चो बिरुद ने गोट-बात करला कि हुन पउलुस के जरूसलेम ने पठाउन देओ। कसनबलले हुनमन हुनके बाटे ची मोरते मारतो उआट करुन रला।
4 फेसतुस बललो, “पउलुस कयसरिया ने जागा-पाहरा ने आसे आउर हुता मय खुद झटके जायंदे।”
5 फेर बललो, “तुमीमन ले खिंडिक मुखियामन मोचो संगे एओत आउर हुन काई अडरा बुता करलोसे जाले, हुनचो उपरे दोस लगाओत।”
6 फेसतुस आठ-दस दिन रउन भाति कयसरिया ने गेलो आउर हुन दुसर दिने नियाव गादी ने बसलो आउर पउलुस के आनतो काजे हुकुम दिलो।
7 जिदलदांय पउलुस भीतरे ईलो, तेबे जरूसलेम ले ईलो जहूदीमन हुनचो भोंवरक उबा होउन भाति हुनचो उपरे खुबे भारी दोसमन लगाला, जेचो गवई हुनमन नी देउक सकते रला।
8 मानतर पउलुस बललो, “मय, जहूदीमन चो नियम-कानुन चो नोहले मंदिर चो नोहले राजा कयसर चो उलटा ने काई बले कसूर नी करलेसे।”
9 तेबे फेसतुस जहूदीमन के हरिक करतो काजे पउलुस के पूछलो, “काय तुय जरूसलेम जाउक मन करसीस, आउर हुता मोचो पुरे तुचो पेसी होओ?”
10 पउलुस बललो, “मय कयसर राजा चो कचरी ने उबा आसे, एई थाने मोचो नियाव होतोर आसे; तुमी नंगत ले जानासाहास, जहूदीमन चो बिरुद मय काई ओनियाव नी करलेसे।
11 मय कसूरदार आंय जाले, आउर मोरते मारतो असन काई ओनियाव करलेसे जाले, तेबे मय मोरतो काजे नाई नी बलेंसे; मानतर जोन गोटमन काजे एमन मोचो उपरे दोख लगायसोत हुन गोटमन सत नी होलोने, कोनी मोके हुनमन चो हाथे सोपुक नी सकदे, मय कयसर राजा के गुहारेंसे।”
12 तेबे फेसतुस आपलो राजसभा चो लोगमन संगे गोटेयालो, आउर हुनचो पाछे पउलुस के बललो, “तुय कयसर राजा चो सरन धरलिसीस, तुय कयसर राजा लगे जासे।”
पउलुस, अगरिपा राजा आउर बिरनिके चो पुरे
13 खिंडिक दिन पाछे, अगरिपा राजा आउर बिरनिके रानी कयसरिया ने एउन फेसतुस के जुहार-भेट करला।
14 हुनमन हुता खुबे दिन रलो पाछे, फेसतुस, अगरिपा राजा के पउलुस चो गोट सांगलो; “गोटोक मनुक आसे, जेके फेलिक्स कयद-खाना ने छांडुन गेलोसे।
15 जिदलदांय मय जरूसलेम ने रले, हुदलदांय पुजारीमन चो मुखियामन आउर जहूदीमन चो धरम सियानमन हुनचो उपरे दोस लगाला। हुनमन मन करते रला कि हुनके डंड चो हुकुम मिरो।
16 मानतर मय हुनमन के बलले, ‘जिदलदांय ले कसूर बीता के आपलो बिरुद दल चो गोट उलटातो काजे मोहका नी मिरेदे, हुदलदांय ले कोनी मनुक के डंड काजे सोपुन देतोर।’ रोमीमन चो नीती नोआय।
17 हुनमन एथा ईला, तेबे मय बेर नी करुन दुसर दिने ची नियाव गादी ने बसुन भाति हुन मनुक के भीतरे आनतो काजे हुकुम दिले।
18 जिदलदांय हुनचो बिरुद बलतो लोगमन उबा होला, तेबे हुनमन असन खुबे अडरा गोटमन चो दोस नी लगाला, जसन मय बिचार करुन रले।
19 मानतर हुनमन आपलो धरम* चो, आउर जीसु नाव चो कोनी मनुक चो गोट उपरे जोन मोरुन रलो, आउर पउलुस हुनके एबे बले जीव आसे बलते रलो, हुनी काजे बला-बली होते रला।
20 मोचो बिचार बुड़लीसे कि ए गोटमन के कसन बरन ने जानुक होयदे? एईकाजे मय हुनके पूछले, काय, तुय जरूसलेम जातो काजे तियार आसीस, कसनबलले हुता ए गोटमन चो जमकापुरा होओ?
21 मानतर जिदलदांय पउलुस गुहारलो कि मोचो जमकापुरा महाराजा लगे होओ, तेबे मय फासला सुनाले कि जिदलदांय ले मय हुनके कयसर राजा लगे नी पठायें, हुदलदांय ले हुनचो पाहरा करा।”
22 तेबे अगरिपा फेसतुस के बललो, “मय बले हुन मनुक चो गोटमन के सुनुक मन करेंसे।” फेसतुस बललो, “तुमी काली के सुनसे।”
23 दुसर दिन अगरिपा आउर बिरनिके बड़े उदीम ने ईला। हुन पलटन चो बड़े मुखियामन आउर सहर चो मुखियामन चो संगे राज दरबार ने अमरलो। फेसतुस हुकुम दिलो आउर पउलुस के भीतरे आनला।
24 तेबे फेसतुस बललो, “ए अगरिपा राजा आउर ए सपाय मुखियामन, तुमी ए मनुक के दखसाहास जेचो काजे सपाय जहूदीमन जरूसलेम ने आउर एथा बले किरकिरुन-किरकिरुन मोचो ले गुहारला कि एके जीव संगातोर नंगत नोआय।
25 मानतर मय जानले, हुन मोरते मारतो असन काई नी करलोसे आउर जिदलदांय हुन खुद बले महाराजा चो सरन धरलो, तेबे मय हुनके पठातो काजे बिचारले।
26 मानतर एचो काजे मय महाराजा के काय लिखुन पठायंदे? मोके असन काई गोट नी मिरली। एईकाजे मय एके तुमीमन चो पुरे आउर खुबे करुन, ए अगरिपा राजा, तुमचो पुरे उबा करलेसे, कसनबलले आमी एके परखलो पाछे मोके काई लिखतो काजे मिरो।
27 कसनबलले कयदी के, महाराजा लगे पठातोर आउर जोन दोस हुनचो उपरे लगालासोत, हुनमन के सते नी सांगलो ने मोके फोकाहा जान पड़ेसे।”