राजपाल फेलिक्स चो पुरे पेसी
24
पांच दिन चो पाछे, बड़े पुजारी हनन्या खिंडिक धरम सियानमन के आउर तिरतुल्लुस नाव चो गोटोक उकील के संगे आनलो, आउर हुनमन राजपाल चो पुरे पउलुस चो उपरे नालीस करला।
2 जिदलदांय पउलुस के हागदिलो, तेबे तिरतुल्लुस हुनचो उपरे असन दोस लगाउन भाति बललो:
“ए राजपाल, तुमचो ले आमके खुबे अस्तिर मिरेसे, तुमचो चलातो ने राज खुबे सुदरलीसे।
3 ए राजपाल फेलिक्स, ए गोट के आमी सपाय थाने आउर सपाय बरन ले खुबे हरिक संगे मानुंसे।
4 मानतर मय तुमके आउर असकट करुक मने नी करेंसे; मय तुमचो ले गुहारेंसे कि तुमी दया करुन आमचो गोटोक-दुयठन गोटमन के सुन।
5 कसनबलले आमीमन, ए मनुक के, नोकसान करतो बीता आउर संवसार चो सपाय जहूदीमन ने झगड़ा करातो बीता आउर नासरतेया नाव चो गोटोक अडरा धरम चो मुखिया पावलुसे।
6 ए तो आमचो मंदिर के असुद करतो बुता ने रलो, मानतर आमीमन एके धरलु आउर हुनके आमचो धरम नियम चो हिसाब ने नियाव करुक सकते रलु।
7 मानतर पलटन चो बड़े मुखिया लुसियास आमचो उपरे ईलो आउर एके बेरपेला आमचो ले छंडाउन भाति धरुन गेलो।
8 आउर तुमचो पुरे एउन दोस लगातो काजे बललो। ए सपाय गोटमन के जेचो काजे आमी एचो उपरे दोस लगालुसे, तुमी खुदे एके परखुन भाति जानुक सकासे।”
9 जहूदीमन बले उकील चो गोट ने राजी होउन बलला, सते आय, ए गोट असने ची आय।
10 जिदलदांय राज करतो बीता, पउलुस के बलतो काजे अक्यालो, तेबे हुन बललो, “मय ए जाने, तुमी खुबे बरक ले ए राज चो लोगमन चो नियाव करासाहास, हरिक ले मय आपने के बचातो काजे सांगेंसे।
11 तुमी ए गोट के जानुक सकास, जिदलदांय ले मय जरूसलेम ने महापरभु चो आराधना करतो काजे ईले, हुदलदांय ले बारा दिन ची होलीसे।
12 आउर हुनमन मोके कोचई संगे मंदिर ने बला-बली होतोके, नोहले मंडली-घरमन ने नोहले सहर भीतरे आउर कोनी लगे लोगमन के उकसाउन भाति रूंडा करतो के नी पावलासोत,
13 आउर हुनमन, मोचो उपरे दोस तेंगड़तो गोटमन के, तुमचो पुरे सत करुक नी सकोत।
14 मानतर एके मय तुमचो पुरे मानेंसे, जोन परभु चो बाट के एमन अडरा बलसोत, हुनचेई हिसाब ने मय आपलो दादी पुरखामन चो महापरभु चो आराधना करेंसे, आउर जोन गोटमन मोसा चो दिलो नियम-कानुनमन आउर अगमजानीमन चो कितापमन ने लिखलोर आसे, हुन सपाय उपरे सतपतेयायंसे।
15 आउर मय महापरभु ले आसा करेंसे जसन हुनमन खुद बले करसोत कि धरमाती आउर ओधरमी लोग, दुनो चो मोरलो थान ले जीव उठतोर होयदे ची।
16 एईकाजे मय खुद बले दुख उठायंसे कि महापरभु आउर मनुकमन चो पुरे मोचो मन-चेतन सपाय बेरा दोस नोहलो रओ।
17 खुबे बरक चो पाछे मय आमचो गरीब लोगमन के दान अमराउक आउर भेंट चेगातो काजे बले एउन रले,
18 हुनमन मोके मंदिर ने पवितर करलो के दखला; लोग-कुड़ा संगे आउर झगड़ा करतो के नी पावला।
19 आउर आसिया राज चो खिंडिक जहूदीमन बले हुता रला। हुनमन के ए करतोर नंगत रली कि मोचो उलटा ने हुनमन चो काई गोट आसे जाले, एथा तुमचो लगे एउन भाति मोचो उपरे दोस लगाओत,
20 नोहले, जोनमन आजी एथा आसोत आपने बलुन देओत, जिदलदांय मय धरम पंच ने उबा होउन रले, तेबे हुनमन मोचो उपरे काय दोख पावला।
21 ए गोटोक गोट के छांडुन, जोन मय हुनमन चो मंजिगता उबा होउन किरकिरुन-किरकिरुन बलुन रले, ‘मोरलो थान ले जीव उठतो गोट काजे आजी तुमचो पुरे मोचो नियाव-दाव होयसे’।”
22 राजपाल फेलिक्स, परभु चो बाट चो गोट नंगत जानते रलोने बले हुन पेसी बड़ाउन दिलो। हुन बललो, “पलटन चो बड़े मुखिया* लुसियास ईलोने, तुचो पेसी टुटाउन देयंदे।”
23 आउर पाईकमन चो मुखिया के हुकुम दिलो, पउलुस के कयद असन नाई, मानतर जागा-पाहरा ने संगाउन भाति हुनचो राखा कर। आउर हुनचो लोगमन ले कोकई हुनचो सेवा करतो ले नी ठेबाव।
24 खिंडिक दिन पाछे राजपाल फेलिक्स आपलो बायले दुरसिल्ला संगे ईलो, जोन गोटोक जहूदीनी रली। हुन पउलुस के हागदियालो आउर हुनचो ले हुन सतपतेयातो चो गोट के सुनलो, जोन जीसु किरिस्त ने आसे।
25 जिदलदांय पउलुस, धरम आउर आपने के समालतोर आउर एतो बिती नियाव चो गोट सांगते रलो, तेबे फेलिक्स खुबे डरुन गेलो, हुन बललो, “एबे तो तुय जा; बेरा मिरलोने मय तुके आउर हागदेयंदे।”
26 हुन पउलुस ले खिंडिक पयसा-कोहड़ी पावतो आसा करते रलो; एईकाजे हुन पउलुस के घन-घन हागदेउन हुनचो संगे गोट गोटेयाते रलो।
27 मानतर जिदलदांय दुय बरक पुरली, तेबे फेलिक्स चो ठान ने पुरुखियुस-फेसतुस राजपाल होलो, आउर फेलिक्स, जहूदीमन के हरिक करतो मन ले पउलुस के जयल घर ने ची छांडुन दिलो।