23
पउलुस धरम पंच चो लोगमन के गरेया-गरेया दखलो आउर असन बललो, “ए भाईमन, मय आजी दिन ले महापरभु चो पुरे गोटोक सुद मन-चेतन ले दिन काटलेसे।”
2 हुदलदांय बड़े पुजारी हनन्या, पउलुस लगे उबा होलो लोगमन के हुनचो थमना ने थापड़ मारतो हुकुम दिलो।
3 तेबे पउलुस हुनके बललो, “ए चूना पोतलो भीती, तुके महापरभु मारेदे; तुय नियम-कानुन हिसाब ले मोचो नियाव करतो काजे बसलिसीस, फेर कसन ने, तुय नियम चो उलटा मोके मारतो हुकुम देयसीस?”
4 जोनमन पउलुस लगे उबा होउन रला, हुनमन बलला, “काय तुय महापरभु चो बड़े पुजारी के अडरा बलसीस?”
5 पउलुस बललो, “ए भाईमन, मय नी चिताले कि ए बड़े पुजारी आय; कसनबलले पवितर सास्तर ने लिखलोर आसे, ‘आपलो मुखियामन के अडरा नी बलतोर आय’।”†
6 एथा खिंडिक फरीसीमन आउर खिंडिक सदूकिमन बले आसोत बलुन जानुन, पउलुस धरम पंच ने किरकिरुन बललो, “ए भाईमन, मय फरीसी आउर फरीसी चो बेटा आंय, मोरलो लोगमन चो आसा आउर मोरलोमन चो जीव उठतो काजे मोचो जमकापुरा होयसे।”
7 जिदलदांय पउलुस ए गोट के बललो, तेबे फरीसीमन आउर सदूकिमन चो मंजिगता झगड़ा होउक मुरियाली आउर धरम पंच, दुय भाग होउन गेली।
8 कसनबलले सदूकिमन, असन सतपतेयालासोत कि मोरलो थान ले जीव उठतोर नीआय, सरगदूत आउर आत्मा बले नीआय; मानतर फरीसीमन सपाय के मानसोत।
9 तेबे खुबे कोलार मातली आउर खिंडिक फरीसीमन चो गोहड़ी ले कोनी-कोनी धरम-पंडितमन उबा होउन सदूकिमन के गोट उलटाउक मुरियाला, “आमी ए मनुक ने काई दोस नी पाउंसे, आउर कोनी आत्मा नोहले सरगदूत हुनचो ले बललोसे जाले, आमके एचोले काय आय?”
10 जिदलदांय खुबे झगड़ा होली, तेबे पलटन चो बड़े मुखिया डरलो कि हुनमन पउलुस के गोंदा-गोंदा करुन देदे, आउर हुन पाईकमन के हुकुम दिलो कि हुनमन जाउन भाति पउलुस के हुनमन चो मंजिगता ले बेरपेला निकराउन थाना ने आनोत।
11 हुनी राती परभु, पउलुस लगे उबा होउन बललो, “ए पउलुस ढाढ़ुस कर, कसनबलले जसन तुय जरूसलेम ने मोचो गवई दिलीस, उसने तुके रोम ने बले मोचो गवई देतोर होयदे।”
पउलुस के मोरते मारतो उआट
12 बियान पावतोके खिंडिक जहूदीमन, गोटोक मन होउन किरिया खादला कि आमी पउलुस के मोरते नी मारलोर काई खादलु-पीवलु जाले आमके सराप लागो।
13 जोन लोगमन असन किरिया खाउन रला, हुनमन दुय कोड़ी* ले अनगर रला।
14 हुनमन, पुजारीमन चो मुखियामन आउर धरम सियानमन लगे एउन बलला, “आमीमन पक्का किरिया खादलुसे। आमी पउलुस के मोरते नी मारतले काई चाकलोने, आमके सराप लागो।
15 एईकाजे तुमी, बड़े धरम पंच संगे पलटन चो बड़े मुखिया के समजाहा कि हुन पउलुस के पंच पुरे आनो; असन घाई भीड़ाउन तुमी, हुनके आउर बले नंगत ले परखुक सकासे। हुनचो एथा अमरतो ले आगे आमी हुनके मोरते मारतो काजे तियार रवां।”
16 पउलुस चो बईन चो बेटा, हुनमन चो मोरते मारतो चो उआट के सुनलो, एईकाजे हुन थाना ने जाउन भाति पउलुस के सांगुन दिलो।
17 पउलुस पलटन चो नानी मुखियामन ले एक झन के आपलो लगे हागदेउन बललो, “ए जुवान के पलटन चो बड़े मुखिया लगे निया, ए हुनके काई बलतो काजे मने करेसे।”
18 एईकाजे पलटन चो नानी मुखिया हुनके पलटन चो बड़े मुखिया लगे नीलो आउर बललो, “कयदी पउलुस मोके हागदेउन भाति, ए जुवान के तुमचो लगे आनतो काजे गुहारलो, ए तुमचो ले काई बलुक मन करेसे।”
19 पलटन चो बड़े मुखिया, हुनचो हाथ धरुन भाति अलगे नीलो आउर पूछलो, “तुके मोचो ले काय बलतोर आसे?”
पलटन चो बड़े मुखिया (23:19)
20 हुन बललो, “काली के जहूदीमन असन उआट लगादे कि आमी पउलुस के आउर नंगत ले परखुक मने करुंसे, आउर एईकाजे हुनमन तुमचो ले गुहारदे कि तुमी हुनके धरम पंच ने आना।
21 मानतर तुमी हुनमन चो गोट के नी माना, कसनबलले दुय कोड़ी ले अनगर मनुक पउलुस के मोरते मारतो काजे लुकुन तियार आसोत। हुनमन पक्का किरिया खादलासोत कि हुनमन पउलुस के मोरते नी मारतले खादलोने आउर पीवलोने हुनमन चो उपरे सराप लागो। एबे हुनमन तियार आसोत आउर तुमचो हुकुम चो बाट दखसोत।”
22 तेबे पलटन चो बड़े मुखिया हुनके असन हुकुम देउन भाति पठालो, “कोकई नी सांग कि तुय मोके ए गोटमन के सांगलीसीस।”
23 पाछे हुन, पलटन चो दुयझन नानी मुखियामन के हागदेउन भाति बललो, “दुय सव पाईकमन, तीन कोड़ी दसझन घोड़ा-सुआर आउर दुय सव भाला धरतो बीतामन के आजी राती नव बजे कयसरिया ने जातो काजे तियार करा।
24 पउलुस काजे बले घोड़ा तियार संगावा। कसनबलले हुनके राजपाल फेलिक्स लगे नंगत ले अमराउक होओ।”
25 हुन असन चिटी बले लिखलो:
26 “बड़े आउर जगतजाना राजपाल फेलिक्स के, कलोदियुस लुसियास बाटले जुहार।
27 ‘ए मनुक के जहूदीमन धरुन भाति मोरते मारतो काजे होते रला, मानतर मोके जान पड़ली कि ए रोम राज चो रयत आय, तेबे पाईकमन संगे जाउन भाति छंडाउन आनले।
28 आउर मय जानुक खोजते रले कि हुनमन एचो उपरे काय काजे दोस लगायसोत। एईकाजे एके हुनमन चो धरम पंच* ने नेउन रले।
29 तेबे मोके जान पड़ली, हुनमन आपलो नियम-कानुनमन चो झगड़ा काजे एचो उपरे दोस लगायसोत; मानतर मोरते मारतो नोहले कयद करतो असन काई दोस एचो उपरे नीआय।
30 जिदलदांय मोके जान पड़ली कि खिंडिक जहूदीमन ए मनुक के मोरते मारतो काजे अडरा उआट करलासोत, तेबे मय तूरते हुनके तुमचो लगे पठाउन दिले, आउर मय हुनचो उपरे नालीस करतो लोगमन के बले हुकुम दिलेसे कि हुनमन तुमचो पुरे, एचो उपरे नालीस करोत’।”
31 एईकाजे जसन पाईकमन के हुकुम मिरुन रली, उसनेची हुनमन पउलुस के संगे नेउन भाति रात भर ने अंतिपतरिस ने अमरला।
32 दुसर दिने, हुनमन घोड़ा-सुआरमन के पउलुस संगे जातो काजे छांडुन भाति थाना ने बोहड़ुन ईला।
33 सुआरमन कयसरिया ने अमरुन राजपाल फेलिक्स के चिटी दिला, आउर पउलुस के हुनचो पुरे उबा करुन दिला।
34 हुन चिटी पढ़ुन भाति पूछलो, ए कोन राज चो आय। जिदलदांय हुन जानलो, पउलुस किलिकिया चो आय,
35 तेबे हुन बललो, “जिदलदांय तुचो नालीस करुमन बले एदे, तेबे मय तुचो जमकापुरा करेंदे।” आउर हुन पउलुस के हेरोद राजा चो माहाल* ने राखा-पाहरा ने संगातो काजे हुकुम दिलो।