पउलुस, जरूसलेम जातोर
21
जिदलदांय आमी हुनमन ले बिदा होउन भाति पानी जाहाज ने चेगलु; तेबे सलक बाट ले, कोस नाव चो ढिपका ने ईलु, आउर दुसर दिने रोदुस ढिपका ने आउर हुताले पतरा सहर ने अमरलु।
2 हुता आमके गोटोक पानी जाहाज मिरली जोन फीनिके राज ने जाते रली, आमी हुता चेगुन गेलु।
3 जिदलदांय आमके साइपरस ढिपका दखा दिली तेबे आमी हुनके डेबरी हाथ बाटे नीलु आउर सीरिया चो बाट ने जाउन सूर सहर ने उतरलु, कसनबलले हुता पानी जाहाज ले बोजा उतरातोर रली।
4 आउर सतपतेयालो लोगमन के डगराउन भाति आमी हुता सात दिन ले रलु। हुनमन पवितर आत्मा ले भरपुर होउन पउलुस के बलला, “जरूसलेम ने पांय नी संगाव।”
5 जिदलदांय हुता ठेबतो दिन पुरली, तेबे आमी हुताले निकरलु; आउर सपाय लोगमन आपलाहान बायले-पिलामन संगे आमके सहर चो बाहरे अमराउन दिला, आउर आमी समदूर चो खंड ने मांडिखुटा देउन पारथना करलु।
6 तेबे आमी गोटोक-दुसर ले बिदा होउन पानी जाहाज ने चेगलु आउर हुनमन आपलो-आपलो घरे बोहड़ुन गेला।
7 तेबे आमी सूर ले पतुलिमइस ने अमरलु आउर पानी जाहाज ने जातो बाट के सारलु, आउर भाईमन के जुहार करुन भाति हुनमन संगे गोटोक दिन रलु।
8 दुसर दिने आमी हुताले निकरुन कयसरिया सहर ने ईलु, आउर हुता आमी नंगत खबर सुनातो बीता फिलिपुस चो घरे गेलु, जोन जरूसलेम ने बाछलो सातझन ले गोटोक रलो आउर आमी हुनचो थाने रलु।
9 हुनचो चारझन कुंआरी बेटीमन रला, जोनमन अगमगोट गोटेयाते रला।
10 आमी हुता खुबे दिन ले ठेबलो बेरा अगबुस नाव चो गोटोक अगमजानी जहूदिया ले ईलो।
11 हुन आमचो लगे एउन भाति पउलुस चो करांड चो पटका के धरलो आउर आपलो हाथ-पांयमन के बांदी होउन भाति बललो, “पवितर आत्मा असन बलेसे कि जोन मनुक चो ए पटका आय हुनके जहूदी लोगमन जरूसलेम ने असने बांददे आउर बिजातीमन चो हाथे सोपदे।”
12 जिदलदांय आमी ए गोट सुनलु, तेबे आमी हुता चो लोगमन संगे पउलुस के खुबे गुहारलु कि हुन जरूसलेम ने नी जाओ।
13 मानतर पउलुस बललो, “तुमी ए काय करासाहास? तुमी गागुन-गागुन मोचो मन के काय काजे टुटायसाहास? मय तो परभु जीसु चो नाव ने जरूसलेम ने बांदी होतोर ची नाई मानतर मोरतो काजे बले तियार आंसे।”
14 जिदलदांय पउलुस आमचो गोट नी मानलो, तेबे आमी ओगाय होलु आउर बललु, “परभु चो मन-इछा पुरा होओ।”
15 हुन दिनमन चो पाछे आमनमन जमकमन के जोड़ुन जरूसलेम गेलु।
16 कयसरिया ने रतो खिंडिक चेलामन बले आमचो संगे ईला, आमचो ठेबतो काजे हुनमन आमके मनासोन चो घरे आनला। हुन साइपरस ढिपका चो रतो बीता आउर मूर चो सतपतेयालो लोग रलो।
17 जिदलदांय आमी जरूसलेम ने अमरलु, तेबे भाईमन खुबे हरिक ले आमचो ले भेट होला।
18 दुसर दिने पउलुस आमचो संगे जाकूब के भेटुक गेलो। हुता सपाय धरम सियानमन रूंडा होउन रला।
19 पउलुस हुनमन के जुहार करुन भाति, महापरभु, बिजातीमन चो मंजी, हुनचो ले करालो सेवा चो बारे ने, गोटोक-गोटोक करुन सपाय गोटमन सांगलो।
20 एके सुनुन हुनमन महापरभु चो जय-जय करला, आउर हुनमन पउलुस के बलला, “ए भाई, तुय दखसीस कि कितरो हजार जहूदीमन बले सतपतेयालासोत आउर हुनमन सपाय मोसा दिलो नियम-कानुन चो लय ने ची रयसोत।
21 आउर तुचो बारे ने हुनमन असन सिखालासोत कि तुय बिजातीमन चो मंजी रतो जहूदीमन के मोसा चो दिलो हुकुममन के नी मानतो सिखानी देयसीस, आउर आपलो पिलामन के महापरभु चो दिलो चीना बललोने खतना नी कराहा आउर आमचो जहूदी नीतीमन ने बले नी चला, बलसीस।
22 एबे काय करतोर आय? लोगमन तुय एथा ईलीसीस बलुन सुनदे ची।
23 एईकाजे जसन आमी तुके बलुंसे, उसनेचे कर; आमचो लगे चारझन बोदना बोहलो लोग आसोत।
24 तुय एमन के धरुन जा, आउर एमन संगे तुय बले आपने के पवितर कर। तुय एमन के मुंड खुरातो काजे खरचा देस। तेबे सपाय लोग जानदे, तुचो बारे ने हुनमन सुनलो गोटमन ने काई सत नीआय, आउर तुय खुद बले मोसा चो दिलो नियम-कानुनमन के मानसीस आउर हुनचेई असन चलसीस।
25 मानतर हुन बिजातीमन काजे जोनमन सतपतेयालासोत, आमी असन बिचार करुन लिखुन पठालुसे,
‘मूरतमन चो पुरे पूजलो मास के,
लोउ के आउर टोडरा अलटलोर जनतुरमन चो मास के खातो ले
आउर बेबिचार करतो ले बाचुन राहा’।”
26 दुसर दिने पउलुस, हुन चारझन मनुकमन संगे आपने के बले पवितर करलो, आउर मंदिर ने गेलो, आउर हुनमन सपाय काजे भेंट चेगातो आउर पवितर होतो दिन केबे पुरेदे सांगुन दिलो।
पउलुस के कयद करतोर
27 जिदलदांय सुद होतोर चो सात दिन पुरतो असन होउन रली, तेबे आसिया चो जहूदीमन पउलुस के मंदिर ने दखला, हुनमन सपाय लोगमन के उकसाला आउर पउलुस के धरला। हुनमन किरकिरुन भाति बलुक मुरियाला।
28 “ए इसराएलिमन, आमचो साहरा होआ। ए हुनी मनुक आय, जोन लोगमन के, मोसा चो दिलो नियम-कानुन आउर ए जगा चो उलटा, सपाय जगा ने सिखायसे, इतरोई नाई मानतर बिजातीमन के बले मंदिर ने आनुन भाति ए पवितर जगा के असुद करुन दिलोसे।”
29 हुनमन एचोले आगे इफिसेया तुरफिमुस के पउलुस संगे सहर ने दखुन रला, आउर असन समजला कि पउलुस हुनके मंदिर ने आनलोसे।
30 तेबे सपाय सहर ने कली-दंद मातुन गेली। लोगमन गुलाय बाटले पराउन ईला आउर मंदिर ने रूंडा होला। हुनमन पउलुस के धरुन भाति मंदिर चो बाहरे ओड़गोड़ते नीला, आउर तूरते मंदिर चो डेवना के ढाकुन दिला।
31 हुनमन पउलुस के मोरते मारतो काजे सिरजते रला, मानतर जिदलदांय रोमी राज चो पलटन चो बड़े मुखिया के खबर अमरली कि गुलाय जरूसलेम ने झगड़ा मातुन गेलीसे।
32 तेबे हुन तूरते पाईकमन के आउर पलटन चो बड़े मुखियामन के नेउन भाति झगड़ा मातलो लगे पराते ईलो। हुनमन पलटन चो बड़े मुखिया आउर पाईकमन के दखुन भाति पउलुस के मारा पेटा करुन छांडुन दिला।
33 तेबे पलटन चो बड़े मुखिया, लगे एउन भाति पउलुस के धरलो, आउर हुनके दुयठन सिकरामन संगे बांदतो हुकुम दिलो आउर पूछलो, ए कोन आय आउर ए काय करलोसे?
34 मानतर लोग-कुड़ा ले कोनी-कोनी, काई-काई किरकिरुक मुरियाला आउर कल-कल किरता सत के पक्का जानुक नी सकलो, तेबे हुन, पउलुस के थाना ने नेतो काजे हुकुम दिलो।
35 जिदलदांय पउलुस सीड़ी ने अमरलो, तेबे लोग-कुड़ा चो ठेगला-मसका के दखुन भाति पाईकमन हुनके उचाउन भाति नेउक पड़ली।
36 कसनबलले भीड़ असन किरकिरुन-किरकिरुन भाति हुनचो पाटे पड़ुन गेला, हुनके मोरते मारुन दियास, हुनके मोरते मारुन दियास।
पउलुस लोगमन के सांगेसे
37 जिदलदांय पाईकमन पउलुस के थाना भीतरे नेतो काजे होते रला, तेबे हुन, पलटन चो बड़े मुखिया के पूछलो, “काय मय तुमचो ले काई बलुक सकेंदे?” हुन बललो, “काय, तुय जूनानी बोली जानीस?
38 काय, तुय हुन मिसरेया नोआस, जोन खिंडिक दिन आगे सरकार चो उलटा कल-कल माताउन भाति चार हजार माने-मारामन के रान राज ने नेउन दिलीस?”