पउलुस, मकिदुनिया आउर जूनान ने
20
जिदलदांय कली-दंद सरली, तेबे पउलुस सतपतेयालो लोगमन के हागदेउक पठालो, आउर हुनमन के ढाढ़ुस चो गोट सांगुन उकसालो आउर हुनमन ले बिदा धरुन मकिदुनिया राज बाटे गेलो।
2 हुन, सपाय राज ले होउन भाति हुता रतो लोगमन के उकसालो आउर ढाढ़ुस देते जूनान देस ने ईलो।
3 जोन थाने तीन मयना ले रलो। हुन पानी जाहाज ने सीरिया राज जातो बीता रलो, तेबे जहूदीमन हुनके मोरते मारतो उआट ने रला, एईकाजे पउलुस मकिदुनिया ले होउन बोहड़ुन जातो बिचार करलो।
4 बिरीया राज चो पिरूस चो बेटा सोपतरुस, थिसलुनीके थान ले अरिस्तरखुस, सिकुनदुस आउर दिरबे चो गयुस, तीमुथियुस, आसिया राज चो तुखिकुस आउर तुरफिमुस हुनचो संगे होला।
5 हुनमन पुरे जाउन भाति तरोआस ने आमचो बाट दखते रला।
6 आउर आमी पाग नोहलो रोटी चो तिहार दिनमन चो पाछे, फिलिपी ले पानी जाहाज ने चेगुन भाति पांच दिन ने तरोआस ने हुनमन लगे अमरलु आउर सात दिन ले हुताय रलु।
जुतीकोस के जियायसे
7 हपता चो पईल दिने, जिदलदांय आमी रोटी टुटातो (परभु भोज) काजे रूंडा होलु, तेबे पउलुस लोगमन के गोट सांगते रलो। हुन दुसर दिन तरोआस सहर ने जातो बीता रलो। एईकाजे हुन अधगर रात ले लोगमन के सिखाते रलो।
8 जोन ढाबा ने आमी रूंडा होउन रलु, हुन थाने खुबे दीयामन बरते रली।
9 जुतुखुस नाव चो गोटोक जुवान खिड़की ने बसुन रलो। जिदलदांय पउलुस खुबेदांय ले गोटेयाते रलो तेबे हुन जुवान, झूमा चो भर ने तीन पाउच उपर ले घसरुन पड़लो, आउर लोगमन हुनके मोरलो भेटला।
10 पउलुस खाले उतरलो आउर हुनचो उपरे लेपटलो, आउर पोटारुन बललो, “डरा नाई, कसनबलले ए जीव आसे।”
11 आउर हुन उपरे जाउन भाति रोटी (परभु भोज) टुटालो आउर सतपतेयालो लोगमन संगे खादलो, हुन बियान पावतले हुनमन संगे गोटेयाते रलो, पाछे हुन जाते गेलो।
12 लोग हुन जुवान के जीवता घरे आनला आउर खुबे अस्तिर पावला।
इफिसुस चो धरम सियानमन ले बिदानी
13 आमी आगे ले पानी जाहाज ने चेगुन भाति अस्सुस ने जाते गेलु; आमी हुताले पउलुस के आपलो पानी जाहाज ने चेगाउक मने करलु। कसनबलले हुन आपने हिंडुन हुता जातो बिचार करुन रलो।
14 आउर जिदलदांय हुन आमके अस्सुस ने भेट होलो तेबे आमी हुनचो संगे पानी जाहाज ने मितुलेने सहर ने ईलु।
15 आउर हुताले आमी पानी जाहाज ने दुसर दिने खियुस ढिपका ने अमरलु, आउर तीसर दिने सामोस ढिपका ने पाड़ुन दिलु आउर चवथा दिने मिलेतुस ने ईलु।
16 पउलुस, पेंतिकुस तिहार चो दिने, जरूसलेम ने झटके अमरतो काजे आसिया ने बेर नी होओ बलुन इफिसुस के नाहकुन जातो बिचार करलो।
17 पउलुस मिलेतुस ले इफिसुस ने खबर पठालो आउर सतपतेयालो लोगमन चो मंडली चो सियानमन के हागदिलो।
18 जिदलदांय हुनमन हुनचो लगे ईला, तेबे हुन हुनमन के बललो: “तुमी जानासाहास कि पईल दिन ले जिदलदांय मय आसिया ने अमरले, मय सपाय बेरा तुमचो संगे कसन बरन ने रले,
19 आउर सुसार बेबार ले आउर खुबे आंसूमन संगे आउर जहूदीमन चो अडरा उआटमन किरता मोचो उपरे ईलो दुख-तकलीस ले बले मय परभु चो सेवा करते ची रले।
20 आउर जोन-जोन गोटमन तुमचो नफा चो रली, हुनमन के मय केबई सांगुक नी छांडले, मानतर मय लोगमन लगे आउर घरे-घरे जाउन सिखाते रले।
21 मय जहूदीमन आउर जूनानीमन के साकी देउन बलते रले कि महापरभु चो बाटे मन बोहड़ाहा आउर आमचो परभु जीसु किरिस्त चो उपरे सतपतेयाहा।
22 एबे दखा, मय पवितर आत्मा चो साहरा ले जरूसलेम ने जायंसे; आउर नी जाने कि हुता मोके काय होयदे-काय नाई।
23 मय एईची जानेंसे कि पवितर आत्मा सपाय सहरमन ने, साकी देउन-देउन मोचो ले बलेसे कि सिकरा आउर डंड मोचो काजे तियार आसे।
24 मानतर मय आपलो जीव के हिनस्ता समजेंसे, आउर महापरभु चो दया चो नंगत खबर चो साकी होतो काजे मय हुन सेवा बुता के पुरा करुक मन करेंसे, जेके परभु जीसु ले पावलेसे।
25 आउर एबे दखा, मय जानेंसे, तुमी सपाय मोके पाछे केबई नी दखुक सकास। मय तुमचो मंजिगता महापरभु चो राज चो गोट सुनाते बुललेसे।
26 एईकाजे मय आजी चो दिने तुमके साकी देउन भाति बलेंसे कि तुमी सपाय चो लोउ चो दोसी मय नोआय।
27 कसनबलले मय महापरभु चो भरपुर मन-इछा के तुमचो मंजिगता सांगतो ने केबई पाटे नी गुचले।
28 एईकाजे, तुमी आपलो आउर सपाय लोग गोहड़ी चो राखा करा, जेचो उपरे तुमके पवितर आत्मा मुखिया* बनालोसे; तुमी महापरभु चो सतपतेयालो लोगमन चो मंडली के राखा करा, जेके हुन आपलो निज बेटा चो लोउ ले घेनलोसे।
29 मय जानेंसे, मोचो गेलो पाछे चीरुन देतो डुरकीमन तुमचो मंजिगता एदे, जोनमन सतपतेयालो लोगमन चो गोहड़ा के नोकसान करलोर नोहलो नी छांडदे।
30 तुमचो मंजिगता ले ची असन लोग एदे, जोनमन सतपतेयालो लोगमन के आपलो बाटे नेतो काजे लंद-फंद गोट गोटेयादे।
31 एईकाजे चेत ने राहा, आउर सूरता करा। कसनबलले मय तीन बरक ले रात-मंजन आंसू बोहाउन-बोहाउन सपाय के चेताते रले।
32 आउर एबे मय तुमके महापरभु आउर हुनचो दया चो हाथे सोपुन देयंसे, जोन तुमके सिद करुक सकेदे आउर सपाय पवितर लोगमन ने मिसाउन भाति बर चो हक देउक सकेदे।
33 मय केबई कोचई सोन-रूप नोहले फटई चो लालच नी करले।
34 तुमी खुदे जानासाहास कि मोचो एई हाथमन मोचो आउर मोचो संगे रतो लोगमन चो पुरा सेवा करलासे।
35 मय तुमके सपाय बानी जनाउन भाति दखालेसे कि कसन बरन ले खुबे मसागत करुन भाति गरीब-दुखी के समालतोर आय, आउर परभु जीसु चो गोट के अमदेया सूरता करा। कसनबलले हुन बललोसे, ‘धरतोर ले देतोर खुबे नंगत आय’।”