इफिसुस सहर ने पउलुस
19
जिदलदांय अपुलोस, कुरिंथुस सहर ने रलो, तेबे पउलुस गुलाय गांव परघनमन ने बुलते-बुलते इफिसुस सहर ने ईलो। हुता पउलुस, खिंडिक सतपतेयालो लोगमन के भेटलो।
2 आउर हुनमन के पूछलो, “काय तुमी सतपतेयातो बेरा पवितर आत्मा पावलासाहास?” हुनमन पउलुस के बलला, “आमीमन पवितर आत्मा चो गोट बले नी सुनलुसे।”
3 हुन, हुनमन के पूछलो, “तेबे तुमी कोन बपतिस्मा धरलास?” हुनमन बलला, “जूहन्ना चो बपतिस्मा।”
4 तेबे पउलुस बललो, “जूहन्ना पापमन के छांडलो लोगमन के मन बोहड़ातो चो बपतिस्मा दिलो, आउर बललो, जोन मोचो पाछे एतो बीता आय हुनके, बललोने जीसु के सतपतेयाहा।”
5 असन सुनुन भाति हुनमन परभु जीसु चो नाव ने बपतिस्मा धरला।
6 आउर जिदलदांय पउलुस हुनमन चो उपरे हाथ थापलो, तेबे हुनमन चो उपरे पवितर आत्मा उतरली, आउर हुनमन दुसर-दुसर बोली बलुक आउर अगमगोट गोटेयाउक मुरियाला।
7 हुनमन सपाय मिसुन बाराझन इतलो मनुकमन रला।
8 पउलुस, जहूदीमन चो मंडली-घरमन ने जाउन भाति तीन मयना ले डर नोहलो, महापरभु चो राज चो गोटमन समजा-बुजा करुन-करुन लोगमन के उकसाते रलो।
9 मानतर खिंडिक लोगमन आपलो मन के कटुर बनाउन भाति हुनचो गोट नी पतेयाला। हुनमन लोगमन चो पुरे परभु चो बाट के अडरा बलुक मुरियाला, तेबे पउलुस हुनमन के छांडुन दिलो आउर सतपतेयालो लोगमन के आपलो संगे नीलो। हुन रोजे तरनुस चो सिखातो घर ने समजा-बुजा करते रलो।
10 दुय बरक ले असने ची होते रली, एचई काजे आसिया चो रतो सपाय जहूदीमन आउर जूनानीमन परभु चो गोट सुनला।
पउलुस महासंदे चो बुता करेसे
11 महापरभु, पउलुस ले असन-तसन नाई मानतर बड़े सकत ले महासंदे चो बुतामन कराते रलो।
12 कसनबलले लोगमन पउलुस चो देहें ले ओंगछीमन आउर पटकामन के धरुन हुन फटईमन के बेमार लोगमन चो उपरे मंडाते रला, जेचोले बेमारमन छांडते रली आउर देव-भूतमन बले हुनमन ले निकरुन जाते रला।
13 हुता खिंडिक जहूदीमन रला जोनमन झाड़ा-फूका करते बुलते रला, हुनमन देव-भूत समालो लोगमन उपरे परभु जीसु चो नाव ने असन बलुन भाति फूकूक मुरियाला, “आमी तुमके जीसु चो नाव ने हुकुम देउंसे जेके पउलुस सांगेसे, ‘निकरुन जा’।”
14 स्कीवा नाव चो गोटोक जहूदी बड़े पुजारी रलो। हुनचो सातझन बेटा रला, जोनमन असने ची करते रला।
15 देव-भूत हुनमन के बलली, “जीसु के मय जानेंसे, आउर पउलुस के बले जानेंसे, मानतर तुमी कोन आहास?”
16 आउर हुन मनुक जेचो थाने देव-भूत रली, हुनमन चो उपरे झपटलो आउर आपलो हक ने करुन भाति हुनमन चो उपरे असन कया दखाली कि हुनमन नांगड़ा आउर अदमड़ा होउन भाति घर ले निकरुन पराला।
17 जिदलदांय ए गोट इफिसुस ने रतो सपाय जहूदीमन आउर जूनानीमन जानला, तेबे हुन सपाय उपरे डर समाली आउर परभु जीसु चो नाव चो जय-जय होली।
18 आउर जोनमन एबे सतपतेयाउन रला, हुनमन ले खुबे लोगमन एउन-एउन आपलाहान अडरा बुतामन काजे खिसियाउन सपाय चो पुरे मानला।
19 आउर जोनमन पंगनाहा बुता करते रला, हुनमन ले खुबे लोगमन आपलो-आपलो पांगन-नासन चो कितापमन के रूंडा करुन भाति सपाय चो पुरे डसाउन दिला। हुन कितापमन चो मोल के जोड़लोके, पचास हजार चांदी चो सिक्का कटार चो होली।
20 असने परभु चो गोट जमाय बाटे जगुर-पगुर होते गेली आउर सतपतेयातो लोगमन बरसक होते गेला।।
21 जिदलदांय ए गोटमन होली, तेबे पउलुस आत्मा ने निचट करलो कि मय मकिदुनिया आउर अखाया बाटले जरूसलेम ने जायंदे आउर हुन बललो, “हुता गेलो पाछे मोके रोम सहर ने बले जातोर चे आसे।”
22 पउलुस आपलो सेवा-सुस्तारा करतो लोगमन ले तीमुथियुस आउर इरासतुस के मकिदुनिया ने पठालो आउर आपन खिंडिक दिन काजे आसिया राज ने ठेबलो।
इफिसुस सहर ने झगड़ा
23 हुदलदांय ‘परभु चो बाट’ चो बारे ने खुबे झगड़ा होली।
24 दिमेतिरयुस नाव चो गोटोक सोनार रलो, हुन अरतिमिस देवी चो नानी-नानी मंदिरमन बनाउक बलुन कारिगिरीमन के खुबे बुता मिराउन देते रलो।
25 हुन आपलो कारिगिरीमन के आउर असने ची बुता करतो दुसर सोनार कारिगिरीमन के रूंडा करुन भाति बललो, “ए मनुकमन, तुमी जानासाहास कि ए बुता ले आमके कितरो धन मिरेसे।
26 आउर तुमी एके दखसाहास आउर सुनसाहास कसनबलले इफिसुस ने ची नाई, मानतर सपाय आसिया ने ए पउलुस खुबे लोगमन के समजालोसे आउर हुनमन के भूलकाउन दिलोसे। हुन असन बलेसे कि हाथ चो कारिगिरी मूरत, महापरभु होउक चे नी सके।
27 एबे आमके गोटकी ची गोट चो डर नीआय कि आमचो पेसा चो इजित जायदे, मानतर ए बले आय कि बड़े देवी अरतिमिस चो मंदिर के हिनस्ता होयदे, जोन देवी के आसिया राज आउर संवसार चो सपाय लोग सेवा करसोत, हुनचो इजित-मान नी रयदे।”
28 हुनमन एके सुनुन आईग असन खुबे रीस होला, आउर किरकिरुन-किरकिरुन बलुक मुरियाला, “इफिसेयामन चो देवी अरतिमिस खुबे बड़े आय!”
29 सपाय सहर ने खुबे कली मातुन गेली। लोगमन मकिदुनिया चो गयुस आउर अरिस्तरखुस के धरला, जोनमन पउलुस संगे जातो लोगमन रला, तेबे कुड़ायक लोग गोटोक मन होउन भाति पंच-घरे हुनमन संगे पराते गेला।
30 जिदलदांय पउलुस लोग-कुड़ा भीतरे जातो काजे मने करलो, तेबे सतपतेयालो लोगमन हुनके जाउक नी दिला।
31 आसिया चो राज करतो लोगमन ले हुनचो खिंडिक संगवारीमन रला, हुनमन पउलुस के खबर पठाला आउर गुहारला कि हुन पंच-घरे नी जाओ।
32 हुदलीदांय पंच घरे कोनी-कोनी, काई-काई बलुन किरकिरते रला। कसनबलले लोग-कुड़ा ने खुबे कली मातुन रये, आउर खुबे लोगमन एके जानते बले नी रला कि हुनमन काय काजे रूंडा होलासोत।
33 तेबे हुनमन ले खिंडिक लोग, सिकंदर के पुरे ठेगलुन दिला, जेके जहूदीमन आपलो बाटले उबा करुन रला। सिकंदर ओगाय रतो काजे हाथे अक्यालो। हुन, लोगमन चो पुरे आमी कसूर करलो लोग नोआंय बलुन बलतोर मने करते रलो।
34 मानतर जिदलदांय लोगमन हुनके चिताला कि हुन जहूदी आय, तेबे सपाय लोग मिसुन भाति दुयक घंटा ले गोटकी संगे असन बलुन किरकिरते रला, “इफिसेयामन चो देवी अरतिमिस, सपाय ले बड़े आय।”
35 तेबे सहर मुखिया, लोगमन के ओगाय करुन भाति बललो, “ए इफिसेयामन, कोन नी जानेसे कि आमचो ए इफिसुस सहर सबु ले बड़े देवी अरतिमिस चो मंदिर आउर बादरी थान ले घसरलो पवितर पकना (मूरत) चो राखा करते एयसे?
36 एईकाजे कोनी ए गोट चो उलटा काई नी बलुक सके, तेबे तुमके ओगाय रतोर निचट आय, आउर समजलो-बुजलो नोहलो काई नी करा।
37 कसनबलले तुमीमन गयुस आउर अरिस्तरखुस के एथा आनलासाहास, जोनमन मंदिर चो चोरतो लोगमन नोहले आमचो देवी चो बदी करतो लोग नोआत।
38 फेर बले दिमेतिरयुस आउर हुनचो संगवारी कारिगिरीमन के कोचई उपरे झगड़ा आसे जाले कचरी आसे आउर हुता नियाव करतो लोगमन बले आसोत; हुता लोगमन गोटोक-दुसर चो उपरे नालीस करोत।
39 मानतर तुमी आउर काई दुसर गोट पूछतोर मने करासाहास जाले मुखियामन चो पंच ने फासला करुक होयदे।
40 कसनबलले आजी चो झगड़ा काजे आमके कसूरदार ठेबातो डर आसे, ए कली चो काई किरता नीआय, आउर लोग-कुड़ा चो रूंडा होतोर चो बले काई गोट सांगुक नी सकुंदे।”
41 आउर असन बलुन हुन लोगमन के पठाउन दिलो।