कुरिंथुस सहर ने
18
एचो पाछे पउलुस, एथेंस सहर के छांडुन भाति कुरिंथुस सहर ने ईलो।
2 हुता पउलुस, अकविला नाव चो गोटोक जहूदी संगे भेट होलो, जेचो जनम पुन्तुस ने होउन रली; हुन आपलो बायले पिरस्किला संगे इटली देस ले नवा-नवा एउन रलो, कसनबलले कलोदियुस राजा सपाय जहूदीमन के रोम सहर ले निकरुन जातो हुकुम देउन रलो, आउर पउलुस हुनमन थाने गेलो।
3 पउलुस आउर हुनमन चो गोटकी ची पेसा रली; एईकाजे पउलुस हुनमन संगे रलो, आउर हुनमन मिसुन भाति बुता करुक मुरियाला, हुनमन चो तमु बनातो पेसा रली।
4 पउलुस रोजे बिसातो दिने जहूदीमन चो मंडली-घरे जहूदीमन आउर जूनानीमन के बले समजा-बुजा करते रये।
5 जिदलदांय सीलास आउर तीमुथियुस मकिदुनिया ले ईला, तेबे पउलुस महापरभु चो गोट सुनातो लय ने रउन भाति जहूदीमन के साकी देते रलो कि जीसु ची किरिस्त आय।
6 मानतर जिदलदांय जहूदीमन बिरुद करुक आउर बदी देउक मुरियाला, तेबे पउलुस आपलो फटई फापड़ुन भाति हुनमन के बललो, “तुमचो लोउ तुमचेई मुंडीमन उपरे पड़ो, मय दोख नोहलो आंसे: एदांय मय बिजातीमन के नंगत खबर सुनाउक जायंदे।”
7 पउलुस, जहूदीमन चो मंडली-घर ले निकरुन भाति तीतुस जूसतुस नाव चो महापरभु चो गोटोक भगत घरे ईलो, जेचो घर पारथना घर संगे (जोड़ा होउन) रली।
8 तेबे जहूदी मंडली-घर चो मुखिया किरिसपुस, आपलो सपाय कुटुम चो लोगमन संगे परभु के सतपतेयालो; आउर खुबे कुरिंथेयामन नंगत खबर सुनुन भाति सतपतेयाला आउर बपतिस्मा धरला।
9 परभु राती बेरा दरसन देउन पउलुस के बललो, “नी डर, मानतर बलते जा, आउर ओगाय नी रा।
10 कसनबलले मय तुचो संगे आंसे, आउर कोनी तुचो उपरे एउन लड़ई करुन तुके नसट नी करोत; कसनबलले ए सहर ने मोचो खुबे लोगमन आसोत।”
11 पउलुस हुता डेढ़ बरक ले रलो आउर लोगमन के महापरभु चो गोट सिखाते रलो।
12 जिदलदांय गलियो, अखाया राज चो राजपाल रलो, तेबे जहूदी लोगमन गोटकी सोर होउन भाति पउलुस चो उपरे ईला, आउर हुनके नियाव गादी चो पुरे आनुन भाति बलुक मुरियाला।
13 “ए, लोगमन के समजायसे कि महापरभु चो भक्ति असन बरन ले करतोर आय, जोन नियम-कानुन चो बिरुद आय।”
14 जिदलदांय पउलुस बलतो काजे होते रलो, तेबे राजपाल गलियो, जहूदीमन के बललो, “ए जहूदीमन, ए खिंडिक ओधरम नोहले मोरते मारतो चो गोट होती, तेबे मय तुमचो गोट के सुनते।
15 मानतर ए बला-बली गोटमन आउर नावमन, आउर तुमचो नियम-कानुन काजे आय जाले, हुनके तुमी ची जाना; कसनबलले मय ए गोटमन चो नियाव करतो बीता होउक मने नी करेंसे।”
16 आउर हुन, हुनमन के नियाव गादी चो पुरे ले निकराउन दिलो।
17 तेबे सपाय लोगमन मंडली-घर चो मुखिया सोस्थिनेस के धरुन भाति नियाव गादी चो पुरे मारला; मानतर गलियो ए गोटमन चो काई धियान नी दिलो।
पउलुस, अंताकिया ने बोहड़ुन जातोर
18 पउलुस खुबे दिन ले कुरिंथी ने रलो, फेर भाईमन थान ले बिदा होउन भाति किंखिरिया ने मुंड खुरालो, कसनबलले हुन बोदना बोउन रलो। हुन पानी जाहाज ने सीरिया ने जाते गेलो, हुनचो संगे पिरस्किला आउर अकविला रला।
19 पउलुस इफिसुस ने अमरुन भाति हुनमन के हुता छांडलो आउर आपन जहूदीमन चो मंडली-घरे जाउन भाति हुनमन संगे समजा-बुजा करुक मुरियालो।
20 जिदलदांय हुनमन पउलुस के आमचो संगे खिंडिक दिन रा, बलुन गुहारला तेबे हुन नी मानलो।
21 हुन असन बलुन भाति हुनमन ले बिदा होलो, “महापरभु मन करलो जाले, मय तुमचो लगे फेर एयंदे।” तेबे हुन इफिसुस ले पानी जाहाज ने चेगुन जाते गेलो।
22 पउलुस कयसरिया ने उतरुन भाति जरूसलेम ने गेलो आउर सतपतेयालो लोगमन चो मंडली के जुहार करलो आउर हुताले हुन अंताकिया ने ईलो।
23 खिंडिक दिन पउलुस अंताकिया ने रलो, आउर हुताले हुन जाते गेलो आउर हुन, हुताले गलाती राज आउर फरूगिया राज ने गोटोक थान ले दुसर थाने बुलते-बुलते सपाय सतपतेयालो लोगमन के बरसक करते रलो।
अपुलोस, इफिसुस ने नंगत खबर सुनायसे
24 अपुलोस नाव चो गोटोक जहूदी रलो, जेचो जनम सिकंदरिया (मिसर राज) ने होउन रली, आउर हुन गोटोक पंडित रलो, हुन पवितर सास्तर के खुबे नंगत ले जानते रलो, हुन इफिसुस सहर ने ईलो।
25 हुन, परभु चो बाट चो सिखिया पाउन रलो, आउर मन देउन भाति जीसु चो गोट के नंगत ले सुनाते आउर सिखाते रलो, मानतर हुन सोजे जूहन्ना चो बपतिस्मा चो गोट जानते रलो।
26 हुन, जहूदीमन चो मंडली-घरे ढाढ़ुस संगे बलुक मुरियालो, मानतर पिरस्किला आउर अकविला हुनचो गोटमन के सुनुन भाति हुनके आपलो घरे नीला आउर हुनके महापरभु चो बाट चो बारे ने, आउर बले नंगत-नंगत समजाला।
27 जिदलदांय अपुलोस, अखाया ने जातो बिचार करलो तेबे भाईमन हुनके ढाढ़ुस दिला आउर अखाया चो सतपतेयालो लोगमन के चिटी लिखला कि हुनमन हुनचो संगे नंगत ले मिसोत। हुन अखाया अमरुन भाति हुता हुनमन चो खुबे साहरा करलो, जोनमन महापरभु चो दया ले सतपतेयाउन रला।
28 कसनबलले हुन पवितर सास्तर ले साकी देउन-देउन जीसु ची किरिस्त (मुक्ति देउ) आय बलुन, खुबे बल संगे जहूदीमन के सपाय चो पुरे हराते रलो। कोनी हुनचो गोट के उलटाउक नी सकते रला।