जीसु, बेबिचारी बायले के खेमा करेसे
8
मानतर जीसु, जयतून डोंगरी ने गेलो।
2 आउर बियाने फेर मंदिर ने ईलो, आउर जमाय लोगमन हुनचो लगे गेला, आउर हुन बसुन हुनमन के सिखाउक मुरियालो।
3 तेबे धरम-पंडितमन आउर फरीसीमन गोटोक बायले के आनला, जेके बेबिचार करतोने धरुन रओत, आउर हुनके मंजिगता उबा करुन जीसु के बलला,
4 “ए गुरुजी, ए बायले के बेबिचार करतो बेरा धरलुसे।
5 मोसा, नियम-कानुन ने आमके हुकुम दिलोसे कि असन बायले के पकना संगे मोरते मारतोर आय। एबे तुय काय बलसीस?”
6 हुनमन, जीसु के परखतो काजे ए गोट पूछला कि हुनचो उपरे कसूर तेंगड़तो काजे काई गोट मिरो। मानतर जीसु लोउन अंडकी ले भुंये लिखुक मुरियालो।
7 जिदलदांय हुनमन जीसु के पूछतेची रला, तेबे हुन उबा होउन हुनमन के बललो, “तुमीमन ले जोन पाप नोहलो आसास, हुनी हुनके आगे पकना मारो।”
8 आउर फेर लोउन भुंये लिखुक मुरियालो।
9 जीसु चो गोटमन के सुनलो सपाय लोगमन, बड़े ले धरुन नानी, गोटोक-गोटोक करुन निकरुन गेला। जीसु एकला हुता रये आउर हुन बायले हुताय मंजिगता उबा रली।
10 जीसु उबा होउन हुनके बललो, “ए बाई, हुनमन कोन बाटे गेला? काय, कोनी तुके डंड नी दिला?”
11 हुन बलली, “ए परभु, कोनी नाई।” जीसु बललो, “मय बले तुके डंड चो हुकुम नी देयें; जा, आउर फेर पाप नी कर।”
जीसु, संवसार चो उजर
12 जीसु फेर लोगमन के बललो, मय संवसार चो उजर आंय। जोन मोचो पाटे एयदे, हुन अंधार ने नी हिंडेदे, मानतर जीव चो उजर के पायदे।
13 फरीसीमन हुनके बलला, “एबे तुय खुदे आपलो गवई देयसीस; तुचो गवई सत नोआय।”
14 जीसु हुनमन के बललो, “मय खुदे मोचो गवई दिलोने बले मोचो गवई सत आय, कसनबलले मय जानेंसे कि मय कहां ले ईलेसे आउर कहां जायंसे। मानतर तुमी नी जानासाहास कि मय कोन बाट ले ईलेसे आउर कोन बाटे जायंसे।
15 तुमी मनुक चो नीती असन नियाव करसास; मय कोचई नियाव नी करेंसे।
16 मय नियाव करलोने बले, मोचो नियाव सत आय। कसनबलले मय एकला नोआंय, मोके पठालो बुआ बले मोचो संगे आसे।
17 आउर तुमचो नियम-कानुन ने बले लिखलोर आसे: दुयझन चो गवई मिसुन सत होयसे।
18 मय गोटोक गवई आंय आउर खुदे मोचो गवई देयंसे आउर दुसर गवई मोचो बुआ आय, जोन मोचो गवई देयसे, आउर हुन मोके पठालोसे।”
19 हुनमन हुनके पूछला, “तुचो बुआ कहां आसे?” जीसु हुनमन के बललो, “तुमी मोके आउर मोचो बुआ के बले नी जानासाहास। मोके जानते रले मोचो बुआ के बले जानतास।”
20 जीसु ए गोटमन के मंदिर चो दान पेटीमन संगालोर बाकरा ने सिखातो बेरा सांगलो, आउर कोनी हुनके नी धरला; कसनबलले हुनचो बेरा एबतले नी अमरु रये।
जीसु आपलो बारे ने सांगतोर
21 जीसु फेर हुनमन के बललो, “मय जायंसे आउर तुमी मोके डगराहासे आउर आपलो पाप ने मोरासे: जोन थाने मय जायंसे हुता तुमी नी एउक सकास।”
22 एके सुनुन जहूदीमन बलला, “काय, हुन आपने के मोराउ आय; कसनबलले हुन बलेसे कि जोन थाने मय जायंसे हुता तुमी एउक नी सकास।”
23 जीसु हुनमन के बललो, “तुमी खाले चो आहास, मय उपर चो आंय; तुमी संवसार चो आहास, मय संवसार चो नोआंय।
24 एईकाजे मय तुमके बलले, तुमी आपलो पाप ने मोरासे। कसनबलले तुमी, मय मुक्ति देउआंय बलुन नी पतेयालोने, आपलो पापमन ने मोरासे।”
25 हुनमन जीसु के पूछला, “तुय कोन आस?” जीसु हुनमन के बललो, “मय हुनी आंय, जेचो गोट के मय मूर ले सांगते रयें।
26 तुमीमन चो बारे ने मोके खुबे बलतोर आउर बिचार करतोर आसे, मानतर मोके पठाउ सत आय; आउर जोन गोट मय हुनचो बाटले सुनलेंसे, हुनी ए संवसार के बलेंसे।”
27 हुनमन नी समजला कि जीसु आमके बुआ चो बारे ने सांगेसे।
28 तेबे जीसु बललो, “जिदलदांय तुमी, मय मनुक चो बेटा के डेंग ने चेगाहासे, तेबे जानासे कि मय हुनी आंय। मय खुदे काई नी करें, मानतर जसन मोचो बुआ मोके सिखालोसे, उसनेची ए गोटमन के बलेंसे।
29 मोके पठाउ, मोचो संगे आसे; हुन मोके एकला नी छांडलो; कसनबलले मय सरलगा हुनी बुता करेंसे, जेचोले हुन हरिक होयसे।”
30 हुन ए गोटमन के बलते ची रलो कि खुबे लोगमन हुनके पतेयाला।
सत तुमके छंडायदे
31 तेबे जीसु हुन जहूदीमन के जोन हुनके पतेयाला, बललो: “तुमी मोचो गोट के मानते रलोने, सते मोचो चेलामन आहास।
32 तुमी सत के जानासे, आउर सत तुमके छंडायदे।”
33 हुनमन जीसु के बलला, “आमी तो अबराहम चो बंस चो आंव आउर केबई कोचई कमेया नी रलुसे; तेबे तुय, काय काजे बलसीस, तुमी छंडाय होआसे?”
34 जीसु, हुनमन के बललो, “मय तुमके सते सांगेंसे, जोन बले पाप करेसे, हुन पाप चो कमेया आय।
35 आउर कमेया अमदेया घरे नी रहेसे; मानतर बेटा अमदेया रहेसे।
36 बेटा तुमके छंडायदे जाले, सते तुमी छंडाय होआसे।
37 मय जानेसे कि तुमी अबराहम चो बंस चो आहास। तेबले बले मोचो गोट के नी मानासाहास; एईकाजे मोके मोरते मारतो काजे डगरायसाहास।
38 मय हुनी गोट के सांगेंसे, जोन मोचो बुआ मोके दखालोसे; आउर तुमी हुनी करासाहास, जोन तुमी तुमचो बुआ ले सुनलासाहास।”
39 हुनमन जीसु के बलला, “आमचो बुआ अबराहम आय।” जीसु हुनमन के बललो, “तुमी अबराहम चो पिलामन होतास जाले, अबराहम चो असन बुता करतास।
40 मानतर एबे तुमी मोचो असन मनुक के मोरते मारतो काजे मन करसाहास; जोन तुमीमन के हुन सत गोट के सांगलो, जोन महापरभु ले सुनलो, अबराहम असन काई नी करु रये।
41 तुमीमन आपलो बुआ करलो असन बुता करसास।” हुनमन हुनके बलला, “आमी उपका पिलामन नोआव, आमचो गोटकी ची बुआ आसे, बललोने महापरभु।”
42 जीसु हुनमन के बललो, “महापरभु तुमीमन चो बुआ होलोने, तुमीमन मोके मया करतास; कसनबलले मय महापरभु बाटले ईलेसे; मय आपलो खुद चो बाटले नी ईलेसे, मानतर हुनी मोके पठालो।
43 तुमी मोचो गोट के काय काजे नी समजसाहास? एईकाजे कि मोचो गोट के सुनतो काजे मन नी करासाहास।
44 तुमीमन तुमचो बुआ सयतान ले आहास, आउर आपलो बुआ चो असन अडरा बुतामन करुक खोजसाहास, जसन हुन करेसे। हुन तो मूर ले माने-मारा आय, आउर सत ने नी रये, कसनबलले सत हुनचोने मुरे नीआय।
45 मानतर मय तुमके सत गोट सांगेंसे, एईकाजे तुमी मोचो उपरे नी पतेयायसाहास।
46 तुमीमन ले कोन मोके पापी मानेसे? मय सत गोट सांगेंसे जाले, तुमी मोचो उपरे काय काजे नी पतेयायसाहास?
47 जोन महापरभु चो आय, हुन महापरभु चो गोट के सुनुआय; आउर तुमी एईकाजे नी सुनास, कसनबलले तुमी महापरभु चो नोआहास।”
जीसु आउर अबराहम
48 एके सुनुन जहूदीमन जीसु के बलला, “काय, आमी नंगत नी बलुंसे कि तुय सामरेया आस, आउर तुचोने असुद आत्मा आसे?”
49 जीसु हुनमन के बललो, “मोचो ने असुद आत्मा नीआय, मानतर मय मोचो बुआ चो इजित करेंसे, आउर तुमी मोचो इजित धरसास।
50 मानतर मय आपलो बड़ाई नी डगरायंसे, हव, एक झन तो आसे, जोन एके डगरायसे, आउर हुन नियाव करु आय।
51 मय तुमके सते सांगेंसे, जोन कोनी मनुक मोचो गोट के मानेदे, हुन जुग-जुग चो मोरना के नी दखेदे।”
52 जहूदीमन हुनके बलला, “एदांय आमी जानलु कि तुचोने असुद आत्मा आसे। अबराहम मोरलो, आउर अगमजानीमन बले मोरला, आउर तुय बलसीस कि कोनी मोचो गोट के मानेदे, हुन जुग-जुग चो मोरना के नी चाकेदे।
53 आमचो बुआ अबराहम तो मोरुन गेलो, काय, तुय हुनचो ले बले बड़े आस? आउर अगमजानीमन बले मोरुन गेला। तुय आपने के काय समजसीस?”
54 जीसु बललो, “मय आपलो मयमा करले, हुन फोकाहा आय; मानतर मोचो मयमा करु बुआ आसे, जेके तुमी महापरभु बलसास।
55 तुमी तो हुनके नी जानलास: मानतर मय हुनके जाने आउर मय हुनके नी जाने बलले, मय फंदी आंय। मय हुनके सते जानें, आउर हुनचो गोट के मानेंसे।
56 तुमचो बुआ अबराहम मोचो एतो दिन चो बाट दखतो ने हरिक रलो, आउर हुन दखलो आउर हरिक होलो।”