जीसु, दुय कम दुय कोड़ी बरक ले बेमार रलो बीता के उजरातोर
5
ए गोटमन चो पाछे, जहूदीमन चो गोटोक तिहार* रली, तेबे जीसु जरूसलेम ने गेलो।
2 जरूसलेम चो मेंडा-दुआर लगे गोटोक समूंद आसे, जेके इबरानी बोली ने, बेतहसदा बलुआत, आउर हुनचो पांचठन मांडो रये।
3 ए मांडोमन ने खुबे बेमार लोगमन, काना, खोड़ेया आउर लकवा मारलो लोगमन, पानी हलतो चो आसा ने, सोउन रओत।
4 कसनबलले धरालो समया ने, महापरभु चो सरगदूत समूंद ने उतरुन पानी के हलाते रये। पानी हलते खन जोन बले आगे उतरेसे हुन तूरते चेकरते रये, जेचो काई बले बेमारी होओ।
5 हुता गोटोक मनुक रये जोन दुय कम दुय कोड़ी बरक ले बेमार रये।
6 जीसु हुनके पड़लोर दखलो आउर जानलो कि हुन खुबे दिन ले असने पड़लोसे। जीसु, हुनके पूछलो, “काय तुय चेकरुक मन करसीस?”
7 हुन बेमार बीता जीसु के बललो, “ए परभु, मोचो लगे कोनी मनुक नीआत कि जिदलदांय पानी के हलायसे, तेबे मोके समूंद ने उतराओ। मानतर मोचो अमरलो ले आगे कोनी दुसर पानी ने डगायसोत।”
8 जीसु हुनके बललो, “उठ, आपलो डसना उठाउन हिंड-बुल।”
9 हुन मनुक तूरते तीरतिरा होलो आउर आपलो डसना के उठाउन हिंडुक-बुलुक मुरियालो। हुन बिसातो दिन रये।
10 एईकाजे जहूदीमन हुनके, जोन चेकरुन रये बलुक मुरियाला कि आजी, बिसातो दिन आय, तुके ओचना-डसना उठातोर नी बने।
11 हुन, हुनमन के बललो, “जोन मोके उजरालो, हुनी मोके बललो, आपलो ओचना-डसना के उठाउन हिंड-बुल।”
12 हुनमन, हुनके पूछला, “हुन कोन मनुक आय जोन तुके बललो, डसना के उठाउन हिंड-बुल?”
13 मानतर जोन चेकरुन रये, हुन नी जानते रये कि हुन कोन आय; कसनबलले हुन थाने लोग जुहलो किरता जीसु हुन थान ले गुचुन रये।
14 एचो पाछे जीसु हुनके मंदिर ने भेटलो, तेबे जीसु हुनके बललो, “दख, तुय चेकरलीस; आउर पाप नी कर, असन नी होओ कि एचोले काई भारी गराहां तुचो उपरे एओ।”
15 हुन मनुक जाउन जहूदीमन के सांगलो, जोन मनुक मोके उजरालो, हुन जीसु आय।
16 एईकाजे जहूदीमन जीसु के डाटा-टेवा करुक मुरियाला, कसनबलले हुन असन बुता बिसातो दिने करते रये।
17 जीसु हुनमन के बललो, “मोचो बुआ एबतले बुता करेसे, आउर मय बले बुता करेंसे।”
18 एईकाजे जहूदीमन आउर अदिक हुनके मोरते मारतो चो उआट डगराउक मुरियाला। कसनबलले हुन बिसातो दिन चो नीती के टुटायसे, आउर महापरभु के आपलो बुआ आय बलुन खुद के महापरभु चो कटार बनाते रये।
जीसु चो हक
19 जीसु हुनमन के बललो, “मय तुमके सते सांगेंसे, बेटा आपने काई नी करुक सके, सोजे हुनीची करेंसे जोन बुआ के करतो के दखेसे। कसनबलले जोन-जोन बुतामन के हुन करेसे, हुनमन के बेटा बले हुनी बरन ले करेसे।
20 कसनबलले बुआ, बेटा के मया करेसे आउर जोन-जोन बुता हुन खुद करेसे, हुन सपाय के बेटा के दखायसे; आउर बुआ एचोले बड़े बुता करतो काजे हुनके दखायदे, तेबे तुमी भक्याहासे।
21 जसन बुआ मोरलो लोगमन के उठायसे आउर जीव देयसे, उसनेची मय, बेटा बले जेके मन करेंसे, हुनमन के जीव उठायंदे।
22 बुआ कोचई नियाव नी करेसे, मानतर नियाव करतो सपाय हक बेटा के दिलोसे।
23 एईकाजे जमाय लोग जसन बुआ के इजित-मान करसोत, उसनेची बेटा के बले इजित-मान करोत; जोन बले, बेटा के इजित-मान नी करसोत, हुन, हुनके पठालो बुआ के बले इजित-मान नी करसोत।
24 मय तुमके सते सांगेंसे, जोन मोचो गोट के सुनुन मोचो पठालो बीता के पतेयायसोत, जुग-जुग चो जीव हुनचो आय, आउर हुनचो उपरे डंड चो हुकुम नी होए। मानतर हुन मोरना के नाहकुन जीव ने ओललोसे।
25 मय तुमके सते बलेंसे, हुन बेरा एयसे, आउर हुन एई समया आय; मोरलो लोगमन महापरभु चो बेटा चो राग के सुनदे, आउर जोन सुनदे, हुनमन जीव उठदे।
26 कसनबलले जोन बरन ले बुआ जीव चो मूर आय, हुनी बरन ले हुन बेटा के बले ए हक दिलोसे कि हुन जीव चो मूर रओ।
27 आउर हुनके नियाव करतो हक बले दिलोसे, एईकाजे कि हुन, मनुक चो बेटा आय।
28 एचोले नी भक्याहा, कसनबलले हुन बेरा एयसे कि जितरो मोठमन ने आसोत, मोचो राग सुनुन निकरुन एदे।
29 जोन नंगत बुता करलासोत, हुनमन जुग-जुग चो जीव काजे फेर जीव उठदे आउर जोन अडरा बुता करलासोत हुनमन डंड काजे फेर जीव उठदे।
जीसु चो बारे ने गवई
30 मय खुदे मोचो हक ले काई करुक नी सकें, जसन सुनेंसे, उसन नियाव करेंसे, आउर मय धरम ले नियाव करुआंय; कसनबलले मय मोचो मन ले नाई, मानतर मोके पठाउ चो मन-इछा के पुरा करुक मन करेंसे।”
31 “मय खुदे मोचो गवई दिलोने मोचो गवई सत नोआय।
32 एकलो आउर आसे, जोन मोचो गवई देयसे, आउर मय जानेंसे कि जोन मोचो गवई देयसे हुन सत आय।
33 तुमी जूहन्ना के, लोग पठाउन पूछलास आउर हुन सत चो गवई दिलोसे।
34 मानतर मय आपलो काजे मनुक चो गवई के भोरसा नी करेंसे, तेबले बले मय ए गोटमन के एईकाजे बलेंसे कि तुमके मुक्ति मिरो।
35 जूहन्ना तो जरतो आउर बरतो दीया असन बाट दखाते रये, आउर तुमके डंडिक काजे हुनचो उजर ने हरिक होतोर नंगत लागली।
36 मानतर मोचो लगे जोन गवई आसे, हुन जूहन्ना चो गवई ले बले बड़े आय; कसनबलले जोन बुता, बुआ मोके पुरा करतो काजे सोपलोसे, बललोने, एई बुता जेके मय करेंसे, हुन मोचो गवई आसे कि बुआ मोके पठालोसे।
37 बुआ जोन मोके पठालोसे, हुनी मोचो गवई दिलोसे; तुमी केबई हुनचो राग के नी सुनलासाहास, आउर हुनचो थमना के बले नी दखलासाहास।
38 हुनचो गोट के मने अमदेया नी धरास। कसनबलले जेके हुन पठालोसे हुनके तुमी नी पतेयाहास।
39 तुमी पवितर सास्तर ने डगरायसाहास, कसनबलले जानासाहास कि हुन थान ले जुग-जुग चो जीव तुमके मिरेसे; ए हुनी आय जोन मोचो गवई देयसे।
40 तेबले बले तुमी जीव पावतो काजे मोचो लगे एउक मन नी करसास।
41 मय मनुकमन ले इजित-मान नी डगरायंसे,
42 मानतर मय तुमके जानेंसे, तुमचो भीतरे महापरभु चो मया नीआय।
43 मय आपलो बुआ चो नाव ने ईलेसे, आउर तुमी मोके नी मानसास, कोनी आपलेई ची नाव ने ईलोने हुनके तुमी मानुआहास।
44 तुमी महापरभुचेई बाटले मिरतो इजित-मान के नी डगराउन, गोटोक-दुसर ले इजित-मान डगरायसास, तेबे फेर कसन ने मोके पतेयाउक सकासे?
45 असन नी समजा कि मय बुआ चो पुरे तुमचो उपरे कसूर तेंगड़ुन देयंदे; मानतर तुमचो उपरे कसूर तेंगड़तो बीता आसे, बललोने मोसा जेचो उपरे तुमी भोरसा करुआहास।
46 कसनबलले तुमी मोसा के पतेयालोने मोके बले पतेयातास, एईकाजे कि हुन मोचो बारे ने लिखलोसे।
47 मानतर तुमी हुनचो लिखलो गोटमन के नी पतेयाहास, तेबे फेर मोचो गोटमन के कसन ने पतेयाहासे?”