लूका
लिखलोर नंगत खबर
जान-चीन होतोर
1
खुबे लोगमन आमचो मंजिगता घटलो बुतामन चो गोटमन लिखतो काजे मन करला।
2 हुनमन हुनी गोटमन के लिखला आउर आमचो लगे अमराला, जेचो हुनमन मूर ले गवई रओत आउर महापरभु चो सेवकमन रओत।
3 एईकाजे, ए माहान थियुफिलुस, मय हुन जमाय गोटमन चो जमाय हाल मूर ले नंगत बरन ले जचई करले, आउर हुनके ओरी ने तुमचो काजे लिखतोर मोके नंगत लागली,
4 जेचोले तुमी जानुक सकास, जोन गोटमन तुमके सांगुन-सिखाउन रओत, जमाय सते आय।
(-*-)
जूहन्ना बपतिस्मा देतो बीता चो जनम
5 जिदलदांय राजा हेरोद, जहूदिया देस ने राज करते रलो, जकरिया नाव चो गोटोक मनुक रये, जोन महापरभु चो मंदिर ने सेवा करतो बीता रये। हुन अबिया पुजारी चो गोहड़ा चो रये। जकरिया चो बायले इलीसिबा, पईल पुजारी हारुन चो कुटुम चो रये।
6 जकरिया आउर इलीसिबा महापरभु चो नंजर ने खुबे धरमकारी रओत, आउर हुनचो जमाय हुकुममन आउर नियम-कानुनमन के मानतोने दोख नोहलो रओत।
7 मानतर हुनमन के पिला-झीला नी रओत, कसनबलले इलीसिबा बांझीन रली, आउर हुनमन दुनो डोकरा-डोकरी होउन रओत।
8 जिदलदांय जकरिया आपलो गोहड़ा चो पारी ने महापरभु चो मंदिर ने पुजारी चो बुता करते रये,
9 पुजारीमन चो नीती असन महापरभु चो मंदिर ने जाउन धूप गंधातो काजे हुनचो नाव ने चिटी निकरली।
10 आउर धूप गंधातोदांय जमाय लोगमन दुआरे पारथना करते रओत।
11 तेबे महापरभु चो गोटोक सरगदूत धूप गंधातो बेदी चो उजा हाथ बाटे उबा होलोर हुनके दखा दिलो।
12 आउर जकरिया सरगदूत के दखुन भक्याउन गेलो आउर हुनके खुबे डर धरली।
13 तेबे सरगदूत हुनके बललो: ए जकरिया, तुय नी डर, कसनबलले तुचो पारथना महापरभु सुनलोसे, आउर तुचो बायले इलीसिबा ले तुचो काजे गोटोक लेका पिला जनमेदे, आउर तुय हुनचो नाव जूहन्ना संगासे।
14 हुन तुके खुबे हरिक करेदे आउर हुनचो जनमलो किरता खुबे लोग हरिक होदे,
15 कसनबलले परभु चो पुरे हुनचो बड़े मान होयदे। हुन अंगुर-मंद आउर काई बरन चो निसा-पानी केबई नी खायदे, आउर आपलो आया चो पेट ले ची पवितर आत्मा ले भरपुर होयदे,
16 आउर इसराएलिमन ले, खुबे लोगमन के हुनमन चो परभु, महापरभु बाटे मन बोहड़ायदे।
17 हुन, एलिया अगमजानी चो आत्मा आउर बल संगे परभु चो पुरे-पुरे जायदे कि बुआमन चो मन के पिलामन चो बाटे बोहड़ायदे, आउर हुकुम नी मानतो लोगमन के धरमकारीमन चो अकल देयदे; आउर परभु काजे गोटोक रयत तियार करेदे।
18 जकरिया सरगदूत के पूछलो: “मय कसन ने जानुक सकें कि ए होतो बिती गोट आय? कसनबलले मय आउर मोचो बायले दुनो खुबे डोकरा-डोकरी होलुसे।”
19 सरगदूत हुनके बललो: “मय जिबराएल, महापरभु चो कमेया आंय, तुचो संगे गोटेयातो काजे आउर तुके ए नंगत खबर सुनातो-सांगतो काजे हुन मोके पठालोसे।
20 आउर दख, ए जमाय गोटमन नी होओतले तुय कोंदा रसे आउर गोटेयाउक नी सकसे, कसनबलले तुय मोचो गोट के नी पतेयालीस। मानतर ए जमाय गोटमन सांगलो समया ने सत होयदे।”
21 लोगमन जकरिया के मंदिर ले दुआरे एतो चो बाट टाकते रओत आउर भक्याउक मुरियाला कि हुनके मंदिर ने इतरो बेर काय काजे होली।
22 जिदलदांय जकरिया दुआरे ईलो, तेबे हुनमन ले गोटेयाउक नी सकलो; एईकाजे लोगमन जानला कि हुन मंदिर ने काई दरसन पावलोसे; हुन कोंदा होउन रये आउर हुनमन के अक्याते रये।
23 जिदलदांय हुनचो मंदिर ने सेवा करतो दिन पुरली, तेबे हुन आपलो घरे गेलो।
24 हुन दिनमन चो पाछे, हुनचो बायले इलीसिबा पेटे ठेबली; आउर पांच मयना ले हुन आपने के लुकाउन रली। हुन असन बलली,
25 “लाज पड़तो ले मोके बचातो काजे महापरभु ए दिनमन ने मोचो उपरे नंजर करुन, दया करलोसे”।
जीसु चो जनम चो गोट
26 इलीसिबा पेटे रलोर छय मयना पाछे, महापरभु, सरगदूत जिबराएल के गलील देस चो नासरत सहर ने, मरियम नाव चो गोटोक कुंआरी लेकी लगे पठालो।
27 कुंआरी मरियम चो माहला जूसुफ नाव चो मनुक संगे होउन रये, जोन राजा दाउद चो थर चो रये।
28 आउर सरगदूत मरियम लगे भीतरे एउन जुहार भेट करुन बललो: “हरिक आउर जय-जय तुचो होओ, तुचो उपरे परभु दया करलोसे! परभु तुचो संगे आसे!”
29 ए गोट के सुनुन हुन खुबे भक्याउन गेली, आउर बिचार करुक मुरियाली, “ए कसन बरन चो जुहार-भेट आय?”
30 सरगदूत हुनके बललो, “ए मरियम, तुय नी डर, कसनबलले महापरभु चो दया तुचो उपरे होलीसे।
31 आउर दख, तुय पेटे ठेबसे, आउर तुय गोटोक लेका पिला के नंगत होसे, तुय हुनचो नाव जीसु, बललोने पापमन ले छंडातो बीता संगासे।
32 हुनचो मान खुबे होयदे; आउर हुनके सपाय ले बड़े महापरभु चो बेटा बलदे; आउर परभु, महापरभु हुनचो पुरखा दाउद चो राजगादी हुनके देयदे,
33 आउर हुन जाकूब चो थर उपरे अमदेया काजे राज करेदे; आउर हुनचो राज केबई नी सरे।”
34 मरियम सरगदूत के बलली: “ए कसन होउक सके! मय मनुक संगे केबई बले नी सोवलेसे।”
35 सरगदूत हुनके बललो: “पवितर आत्मा तुचो उपरे उतरेदे, आउर सपाय ले बड़े महापरभु चो सकत तुचो उपरे छांय करेदे, एईकाजे हुन पवितर-पिला जोन जनमेदे, हुनके महापरभु चो बेटा बलदे।
36 आउर दख, तुचो कुटुम चो इलीसिबा के बले डोकरी बेरा बेटा होतोर आसे, जेके बांझीन बलते रओत, एबे हुन छय मयना ले पेटे ठेबलीसे।
37 कसनबलले महापरभु ले सपाय बानी होउक सके।”
38 मरियम बलली: “दख, मय परभु चो कमेयीन आंय, मोचो संगे तुचो सांगलो गोट असन होओ।” तेबे सरगदूत हुनचो लगे ले जाते गेलो।
मरियम इलीसिबा के भेटुक जायसे
39 पाछे मरियम तियार होउन तूरते जहूदिया राज चो डोंगरी परघन चो गोटोक सहर ने गेली,
40 आउर जकरिया चो घरे जाउन इलीसिबा के जुहार-भेट करली।
41 जसने इलीसिबा, मरियम चो जुहार सुनली, हुदलीदांय पिला हुनचो पेट ने कुलबुललो, आउर इलीसिबा पवितर आत्मा ले भरपुर होली।
42 आउर हुन जोर ले बलली: “तुय बायलेमन ने धन-धन आस, आउर तुचो पेट चो पिला धन-धन आय!
43 आउर असन दया मोके कहां ले मिरली कि मोचो परभु चो आया मोचो लगे ईलीसे?
44 जिदलदांय मय तुचो जुहार चो गोट सुनले, तेबे मोचो पेट चो पिला हरिक ने कुलबुललो।
45 धन-धन आय हुन, जोन सतपतेयाली कि महापरभु चो बाटले हुनके बललो गोटमन पुरा होयदे।”
मरियम बाटले महापरभु चो जय-जय गीत
46 तेबे मरियम बलली:
“मोचो जीव परभु के सहरायसे।
47 आउर मोचो आत्मा, मोचो मुक्ति करु महापरभु ले हरिक होली,
48 कसनबलले हुन आपलो कमेयीन चो दीन हाल के दखलो,
एईकाजे दखा,
एदांय ले जमाय जुग चो लोग मोके धन-धन बलदे,
49 कसनबलले हुन सकत चो महापरभु, मोचो काजे अचरित बुता करलोसे।
हुनचो नाव पवितर आय।
50 हुनचो दया हुनके डरतो लोगमन उपरे, पीड़ी-पीड़ी ले बनुन रहेसे।
51 हुन आपलो बांहा चो बल दखालो, आउर जोन आपने के बड़े मानते रओत, हुनमन के रन-बन करलो।
52 हुन बलबीतामन के राजगादी ले निकराउन दिलो
आउर दीन लोगमन के हक चो ठान (राजगादी) ने बसालो।
53 हुन भूके रलो लोगमन के नंगत-नंगत जाकमन ले उमकालोसे,
आउर सवकारमन के चुचाय हाथे निसकाउन दिलो।
54 महापरभु आपलो सेवा करु इसराएल, बललोने इसराएलिमन के दखा-राखा करलो कि
हुनमन महापरभु करलो दया के सूरता करोत,
55 हुन आमचो पुरखामन अबराहम आउर हुनचो थर संगे बलुन रये कि हुनचो दया हुनमन संगे जुग-जुग काजे रउआय।”
56 मरियम तीन मयना असन इलीसिबा संगे रउन भाति आपलो घरे बोहड़ली।
जूहन्ना बपतिस्मा देतो बीता चो जनम
57 तेबे इलीसिबा चो नंगत होतो बेरा अमरली, आउर हुन गोटोक लेका पिला के नंगत होली।
58 हुनचो घर लग चो लोगमन आउर कुटुम चो लोगमन एके सुनुन, हुनचो संगे हरिक होला कि परभु हुनचो उपरे बड़े दया करलोसे।
59 इलीसिबा लेका पिला के जनमालो पाछे आठवां दिने, पिला चो खतना करतो काजे लोगमन ईला, आउर हुनचो नाव, हुनचो बुआ चो नाव ने जकरिया संगातो काजे होला।
60 आउर हुनचो आया बलली:
“नाई; हुनचो नाव जूहन्ना संगातोर आय।”
61 आउर हुनमन इलीसिबा के बलला: “तुचो कुटुम ने ए नाव चो कोनी नीआत!”
62 तेबे हुनमन अक्याउन पिला चो बुआ के पूछला, तुय हुनचो नाव काय संगाउक मन करसीस?
63 आउर हुन गोटोक पटी मांगुन लिखलो, हुनचो नाव जूहन्ना आय, आउर जमाय अचरित होउन गेला।
64 एकदांय जकरिया चो टोंड आउर जीब खेलली; आउर हुन गोटेयाउक आउर महापरभु चो जय-जय करुक मुरियालो।
65 आउर हुन आली पाली चो रतो जमाय लोगमन ए गोटमन के सुनुन-जानुन डरला, आउर ए गोटमन जहूदिया देस चो सपाय डोंगरी परघन ने जगुर-पगुर होउन गेली,
66 आउर जमाय सुनतो लोगमन आपलो-आपलो मन ने बिचारुन बलला, ए लेका कसन होयदे? कसनबलले हुनमन जानला कि परभु चो हाथ हुनचो संगे रली।
जकरिया बाटले महापरभु चो गीत
67 आउर जूहन्ना चो बुआ जकरिया पवितर आत्मा ले भरपुर होलो, आउर अगमगोट गोटेयाउक मुरियालो:
68 “परभु, इसराएल चो महापरभु धन-धन होओ,
कसनबलले हुन आपलो लोगमन उपरे नंजर करलो आउर हुनमन के छंडालोसे।
69 आउर आपलो कमेया
दाउद चो कुटुम ने आमचो काजे बड़े सकत चो गोटोक मुक्ति देउ के पठालो,
70 जसन हुन आपलो पवितर
अगमजानीमन बाटले मूर बेरा ले सांगुन रये,
71 बललोने, आमचो बयरीमन ले आउर आमके नंगत नी भावतो जमाय लोगमन चो बल ले आमचो मुक्ति करलोसे,
72 कि आमचो पुरखामन उपरे दया करुन आपलो पवितर बायदा के सूरता करो,
73 आउर हुन किरिया, जोन महापरभु आमचो पुरखा अबराहम ले खाउ रये
74 कि हुन आमचो बयरीमन चो बल ले आमके छंडायदे। कसनबलले पवितर आउर धरम ले
75 जीव रतो बेरा नी डरुन हुनचो सेवा-बुता करुक होओ,
76 आउर तुय, ए बाबू, सपाय ले बड़े महापरभु चो अगमजानी बलाय होसे,
कसनबलले तुय, परभु चो बाट तियार करतो काजे हुनचो पुरे-पुरे हींडसे।
77 एईकाजे कि हुनचो लोगमन के मुक्ति चो गियान देओ, जोन पापमन चो खेमा ले हुनमन के मिरेसे।
78 ए आमचो महापरभु चो हुन बड़े दया ले होयदे;
जेचो किरता सरग ले आमचो उपरे बड़े बियान चो उजर बरेदे।
79 कसनबलले अंधार आउर मोरना चो छांय ने बसलो बीतामन के उजर देओ,
आउर आमके अस्तिर चो बाट ने हिंडाओ।”
80 आउर हुन लेका बड़े बाड़ते आउर आत्मा ने बल पावते रलो, आउर इसराएल ने दखा देतो दिन ले राने रलो।