इसराएल के पाप ले बोहड़तो काजे हागदेतोर
5
“ए इसराएल चो कुटुम, मय जहोवा, तुमचो काजे करलाउन बलतो गोट के सुना,2 इसराएल देस्, गोटोक कुंआरी लेकी असन आय,
हुन घसरली, फेर केबई नी उठे,
हुन आपलेई भुंये उमताड़ा पड़लीसे
आउर हुनके उठातो लोग कोनी नी आत।”
3 महापरभु जहोवा असन बलेसे,
“जोन सहर ले जुद काजे हजार इसराएलिमन निकरते रला
हुता, सव झन ची बाचदे
आउर जोन थान ले सव झन निकरते रला
हुता दस झन ची बाचदे।”
4 जहोवा, इसराएल चो कुटुम के असन बलेसे,
“मोके डगराहा, तेबे तुमी जीव राहासे।
5 मानतर बेतेल चो देव-गुड़ी के नी डगराहा,
आउर गिलगाल ने देव-धामी चो डंडासरन करुक नी ओला
आउर बेरसेबा बाटे बले नी जाहा
कसनबलले गिलगाल चो लोग के बांदुन नेदे,
आउर बेतेल छांडा पड़ेदे ची।”
6 जहोवा के डगराहा, तेबे जीव राहासे
नोहले हुन, जूसुफ चो कुटुम उपरे आईग असन जंजाल रीस होउन
बेतेल के लाकड़ी उलटायदे आउर हुनके लिबातो काजे कोनी नी बाचदे।
7 ए, सत-नियाव के पीता उलटाउमन,
आउर भलई के अडरा करुमन!
8 जोन तारा-गोहड़ी के बनाउ,
पिरिचनाय अंधार के, बड़े बियान चो उजर बनाउ,
आउर दिन के, अंधार करुन राती बनाउ,
समदूर चो पानी के रूंडाउन
भुंये बरसाउ,
हुनचो नाव जहोवा आय।
9 हुन बरसक मनुक के उधापड़े सत्यानास करुआय,
आउर हुनचो भाड़ा के बले भोसड़ाउआय।
10 कचरी ने सत-नियाव करुमन के हुनमन बईर करुआत,
आउर सत गोटेयातो लोग के घिनियाउआत।
11 तुमी गरीब-दुखी के डाटा-टेवा करुआहास
आउर हुनमन चो अरन के झीकुआहास
तुमी सुंदर गोदलो पकना चो घर बनालासाहास,
मानतर तुमी हुता रउक नी सकासे;
तुमी, मन भावतो अंगुर-पदरमन रोपलासाहास,
मानतर तुमी हुता चो अंगुर-मंद खाउक नी सकासे।
12 कसनबलले मय जानेंसे, तुमचो पाप खुबे बाड़लीसे
आउर तुमचो पाप खुबे होलीसे
तुमी धरमकारीमन के डाटा-टेवा करुआहास आउर घूस धरुआहास
आउर नियाव काजे कचरी ने एतो गरीब लोग के बाट ले बोहड़ाउआहास।
13 एईकाजे असन बेरा, बुद बीतामन ओगाय राहा
कसनबलले ए अडरा समया आय।
14 जहोवा बलेसे, “ए लोगमन, तुमी भलई के डगराहा, अडरा के नाई!
तेबे तुमी जीव राहासे।
जसन तुमी जानसास
सेनामन चो महापरभु-जहोवा तुमचो संगे रयदे।
15 अडरा के बईर आउर भलई के मया करा
नियाव काजे कचरी ने ईलो लोगमन चो सत-नियाव करा।
असन करले, सेनामन चो महापरभु-जहोवा
जूसुफ बंस उपरे जीव-दुखेदे।”
16 एईकाजे सेनामन चो महापरभु-जहोवा असन बलेसे,
“सपाय जोड़ान ने लोगमन गागा-बोगा होते रदे
आउर सपाय खोर ने लोगमन हाय-हाय करते रदे
हुनमन बेड़ा-खाड़ा कमातो लोग के गागा-रोआं होतो काजे
आउर करलानी गीत गावतो लोग के करलातो काजे भूती देउन हागदेदे।
17 आउर सपाय अंगुर-पदरमन ने गागा-बोगा होते रदे
कसनबलले मय तुमके डंड देतो काजे तुमचो मंजार ले होउन जायंदे।”
जहोवा असन बलेसे।
जहोवा चो दिन, इसराएलिमन काजे पिरिचनाय अंधार चो दिन आय
18 तुमीमन ले कोनी जहोवा चो दिन के दखुक मन करसाहास जाले, तुमके हाय लागो!
जहोवा चो दिन ले तुमके काय नफा होयदे?
हुन दिन, पिरिचनाय अंधार रयदे, उजर चो नाई।
19 जसन कोनी बीजापुलिया-बाग के दखुन परायदे
आउर बाटे भालु के भेटेदे
नोहले घरे एउन भीती ने हाथ थापलोने
हुनके साप चाबेदे।
20 उसने सते, जहोवा चो दिन पिरिचनाय अंधार चो रयदे, उजर चो नाई,
आउर हुन दिने खिंडिक बले उजर नी रयदे।
21 जहोवा बलेसे, “मय तुमचो तिहारमन के मन नी करें आउर हुनमन के घिनियाउआय
आउर तुमचो मंडलीमन ले बले हरिक नीआंय।
22 तुमी मोचो काजे होम-जतरा नोहले अरन-जतरा चेगाले बले
मय हरिक नी होयें,
आउर तुमचो पोसलो बाछा चो मिला-मिसा जतरामन के बले
मन नी करें।
23 तुमी मोके आपलो गीत-गोबीन के नी सुनाहा
तुमचो सारंगी बाजामन चो दीस के बले मय नी सुनें
24 मानतर सत-नियाव के पजरा-पानी असन
आउर धरम-बुता के बारामासी बाहार असन अमदेया बोहुक दियास।
25 ए इसराएली कुटुममन, तुमी दुय कोड़ी बरक ले टंग-टंगा भाटा ने बुलतोदांय, काय, तुमी मोचो काजे ची जतरामन आउर भेंटमन चेगाते रलास? 26 नाई, तुमी तो सक्कूत के आपलो राजा आउर केवान के आपलो तारा-देव मानुन, हुनमन चो मूरतमन के घड़ुन डंडासरन करते रलास; 27 एईकाजे मय तुमके दमिसक चो हुन पाट कयदी बनायंदे।” जहोवा असन बलेसे, हुनचो नाव सेनामन चो महापरभु-जहोवा आय।