4
“ए सामरिया चो डोंगरी ने रतो, बासान परघन चोभस-भसा गायमन असन बायलेमन, तुमी ए गोट सुना,
तुमी गरीब-दुखी आउर नानागती लोग के ठगा-फारसी आउर डाटा-टेवा करसास,
आउर आपलाहान मनुकमन के बलसास, ‘आमचो काजे खिंडिक आउर मंद आना’।
2 पवितर महापरभु जहोवा किरिया खाउन बलेसे,
दखा, तुमचो उपरे असन बिपती एयदे,
हुदलीदांय तुमके ओकसीमन ले झीकदे
आउर बाचलो लोग के गरी पकाउन मछरी धरतो असन धरदे।
3 तुमके आपलो-आपलो पुरे चो
भिती भोंगा ले छिंगड़ाउन निकरादे
आउर तुमके बड़े डोंगरी हरमोन बाटे खेददे।”
जहोवा असन बलेसे।
इसराएलिमन डंड पाउन बले मन नी बोहड़ातोर
4 “बेतेल ने एउन पाप करा,
गिलगाल ने एउन जुगे पाप करा।
रोजे बियाने आपलो जतरामन के चेगाहा,
आउर सपाय तीसर दिनमन ने आपलो दसवांस के आना।
5 पाग बिती रोटी के धन-धन भेंट चेगाहा,
आउर आपलो मन ले चेगालो जतरामन चो बारे ने लोगमन चो पुरे गुमान करुन सांगा।
कसनबलले ए इसराएल, तुमके असन करुक भायसे।”
जहोवा असन बलेसे।
महापरभु, इसराएलिमन मन बोहड़ातो मन करेसे
6 “एईकाजे मय तुमचो सपाय सहरमन ने भूक पड़ाले,
तुमके खातो काजे काई नी दिले,
तेबले बले तुमी सत-मन ले मोचो लगे बोहड़ुन नी ईलास।”
जहोवा असन बलेसे।
7 “कटई काजे तीन मयना बाचलो बेरा बले
मय तुमचो बेड़ामन ने पानी नी बरसाले,
मय गोटोक सहरे पानी बरसाले
दुसर सहर के सुखा छांडले,
गोटोक बेड़ा ने पानी बरसाले
आउर दुसर बेड़ा ने पानी नी बरसाले गुने सुकुन गेली।
8 एईकाजे दुसर-दुसर सहरमन चो लोग बुलुन-बुलुन गोटकी सहरे पानी काजे ईला
तेबले बले हुनमन के सोस भोरतो इतलो पानी नी मिरली;
फेर बले तुमी मोचो लगे बोहड़ुन नी ईलास।”
जहोवा असन बलेसे।
9 “मय तुमचो बेड़ा-खाड़ा के, घाम-तप ले आउर ओस ले नसाले।
तुमचो साग-बाड़ी आउर अंगुर-पदरमन ने लाक बसली आउर कुमचुन सुकुन गेली।
तुमचो अंजीर आउर जयतून रूकमन के थापामन खादला,
तेबले बले तुमी मोचो लगे बोहड़ुन नी ईलास।”
जहोवा असन बलेसे।
10 “जसन मय, मिसर देस् ने मरी पठाउन रले उसने तुमचो मंजी बले मरी पठाले,
तुमचो जुवानमन के खांडा ले मोराले
तुमचो घोड़ामन के दुसर चो हक ने करुन दिले;
तुमचो तमु-भाटा मोड़ीमन ले घिन-घिना गंदली।
तेबले बले तुमी मोचो लगे बोहड़ुन नी ईलास।”
जहोवा असन बलेसे।
11 “जसन मय सदोम आउर अमोरा सहरमन के, हुनमन चो पाप किरता सत्यानास करले
उसनेची मय तुमीमन ले आदो लोग के सत्यानास करले,
मय तुमके आईग-लुटी असन बचाले,
तेबले बले तुमी मोचो लगे बोहड़ुन नी ईलास।”
जहोवा असन बलेसे।
12 “ए इसराएल, मय तुमके डंड देयंदे,
मय तुमचो संगे असनेचे करुआंय बे।
एईकाजे ए इसराएल, आपलो महापरभु के भेटतो काजे तियार राहा।”
13 जोन डोंगरीमन के बनाउ आउर लेहरा के बोहाउ,
आपलो बिचार के मनुकमन के समजाउआय
उजर आउर अंधार के बनाउ,
आउर डोंगरी सिगमन ने हिंडु,
हुनचो नाव सेनामन चो महापरभु जहोवा आय।