इसराएल चो पाप
3
“ए इसराएलिमन, जहोवा तुमचो बिरुद ने बललो गोट के सुना, ‘ए गोट हुन सपाय कुटुम काजे आय जोनमन के मय मिसर देस् ले निकराउन आनले।2 मंजपुर ने रतो सपाय कुटुममन ले
मय तुमके ची बाछले।
एईकाजे मय तुमचो सपाय पाप किरता
तुमके डंड देयंदे’।
अगमजानीमन चो बुता
3 काय, सोर होलो नोहलोर दुय झन
गोटकी संगे हिंडुआत?
4 काय, बीजापुलिया-बाग पारदी पावलो
नोहलोर रान ने नांदुआय?
काय, जुवान बीजापुलिया-बाग काई धरलो नोहलोर
करपन भीतरे नांदुआय?
5 काय, फांदा मंडालो नोहलोर
चड़ई आपने फसुआय?
काय, काई फसलो नोहलोर
फांदा आपने झीकी होउआय?
6 काय, जुद चो तोड़ी फूकतोर सुनलो नोहलोर
कोनी सहर ने लोग डरुआत?
काय, जहोवा पठालो नोहलोर
कोनी सहर ने बिपती पड़ेदे?
7 असनेचे, महापरभु जहोवा
आपलो कमेया अगमजानीमन के
सांगलो नोहलोर काई भेद चो काम नी करेदे।
8 बीजापुलिया-बाग नांदलोने,
कोन नी डरेदे?
महापरभु जहोवा बलले,
अगमगोटमन कोन नी सांगेदे?”
सामरिया चो सत्यानास
9 असदोद सहर चो भाड़ामन भीतरे
आउर मिसर देस् चो भाड़ामन भीतरे सांगा,
“सामरिया चो डोंगरीमन ने रूंडा होआ,
आउर दखा, हुता कितलो झगड़ा-लड़ई
आउर हुनमन चो मंजी कितलो डाटा-टेवा होयसे।”
10 जहोवा असन बलेसे, “मोचो रयत के काई भलई करतो ओज नी आय,
हुनमन उबढंगरी बुता आउर झीका-उड़मा ले कमालो धन के आपलो माहालमन भीतरे रूंडायसोत।”
11 एईकाजे महापरभु जहोवा असन बलेसे,
“तुमचो देस् के बयरीमन बेड़दे,
आउर तुमचो राज-भाड़ा के रन-बन करुन
झीका-उड़मा करदे।”
12 जहोवा असन बलेसे, “जसन धोरई, बीजापुलिया-बाग चो टोंड ले, मेंडा चो दुय पांयमन नोहले कान के ची झीकुक सकेदे, उसनेची सामरिया ने रतो इसराएलिमन सोजे ओचना चो टोक नोहले खटेया चो गोटोक पांय के ची बचाउक सकदे।”
13 सेनामन चो महापरभु जहोवा चो एई गोट आय,
“सुना आउर जाकूब* के ए गोट सांगुन चेताहा,
14 जोन दिने, मय इसराएल के हुनचो ओधरम किरता डंड देयंदे
तेबे मय बेतेल चो बेदीमन के बले सत्यानास करेंदे
आउर बेदी चो सींगमन टुटुन
भुंये घसरेदे।
15 मय, सीत बेरा आउर जेट बेरा चो घरमन के भोसड़ायंदे;
हाथी दात ले सजालो घरमन के बले सत्यानास करेंदे,
आउर बड़े-बड़े माहालमन के बले नास करेंदे।”
जहोवा चो एई बचन आय।