मोआबीमन के डंड देतोर
2
जहोवा असन बलेसे:“मोआब देस् चो तीन ठन पाप काजे ची नाई,
मानतर हुनमन आउर बले पाप करतो किरता मय हुनमन के डंड देयंदे ची।
कसनबलले हुनमन एदोम चो राजा चो हाड़ामन के
डसाउन लाकड़ी उलटाला।
2 एईकाजे मय, मोआब देस् के डसायंदे,
जेचोले करियोत चो राज-भाड़ा बले डसुन जायदे।
मोआब, जुद होतो कोलार,
आउर तोड़ी बाजतो राग होतो बेरा नास होयदे।
3 मय हुनचो राजा के सत्यानास करेंदे,
आउर हुनचो संगे सपाय मुखियामन के बले मोरते मारेंदे।”
जहोवा असन बलेसे।
जहूदा के डंड देतोर
4 जहोवा असन बलेसे,
“जहूदा चो तीन ठन पाप काजे ची नाई,
मानतर हुनमन आउर बले पाप करलो किरता मय हुनमन के डंड देयंदे ची,
कसनबलले हुनमन महापरभु चो नियम-कानुन के नी पतेयाला
आउर मोचो नीति-नियम के नी मानला,
मानतर हुनमन महापरभु चो बाट के घिनियाउन
आपलो पुरखामन असन देव-धामीमन चो पाट धरला।
5 एईकाजे मय, जहूदा के डसायंदे,
जेचोले जरूसलेम सहर चो भाड़ामन बले डसुन जायदे।”
इसराएल चो डंड
6 जहोवा असन बलेसे:
“इसराएल चो तीन ठन पाप काजे ची नाई,
मानतर हुनमन आउर बले पाप करतो किरता मय हुनमन के डंड देयंदे ची।
कसनबलले, हुनमन दोख नोहलो लोग के, रूपा चो सिक्का काजे
आउर नानागती होलो लोग के, गोटोक जोड़ी पनई काजे बिकुआत।
7 हुनमन गरीब-दुखीमन के काई असन नी पतेयाउआत,
आउर डाटा-टेवा होलो लोग चो सत-नियाव नी करुआत।
बाप-बेटा दुनो गोटकी लेकी लगे जाउआत।
असन करुन हुनमन मोचो पवितर नाव के अपवितर करुन निंदरुआत।
8 हुनमन गाहना धरलो फटईमन के
बेदीमन लगे ओचाउन हुताय सोउआत,
आउर दांड ले मिरलो
अंगुर-मंद के आपलो महापरभु चो मंदिर ने खाउआत।
9 तेबले बले मय हुनमन चो पुरे ले, एमोरीमन के सत्यानास करले
जोनमन देवदार रूक असन डेंग
आउर बांज-रूक असन बरसक रला।
मय हुनमन चो फर के
आउर चेर के बले सत्यानास करले।
10 मय तुमके, मिसर देस् ले निकराउन आनले,
आउर दुय कोड़ी बरक ले टंग-टंगा भाटा ने बाट दखाले
आउर एमोरीमन चो देस् चो हकदार बनाले।
11 ए इसराएलिमन, काय, ए सते नोआय?
मय तुमचो बेटामन ले आदो लोग के अगमजानी,
आउर जुवानमन ले आदो लोग के नाजीर* होतो काजे बाछले।”
जहोवा असन बलेसे।
12 मानतर तुमी बाछलो नाजीर लोग के अंगुर-मंद खुआलास
आउर अगमजानीमन के
“अगमगोट नी सांगा” बलते हुकुम दिलास।
13 “दखा, जसन भारा खुबे रले
गाड़ी धसुआय
उसने मय तुमके धसायंदे।
14 रोस ने परातो बीता बले मोरना ले बाचुक नी सकेदे,
आउर बल बीता मनुक चो बल, काई काम नी देयें।
बीरमन बले आपलो जीव बचाउक नी सकदे।
15 धनु-कांड बींदुमन बले उबा रउक नी सकदे,
खुबे चांड-हिंडुमन
आउर घोड़ा-सुवारमन बले आपलो जीव बचाउक नी सकदे।
16 बल बीतामन ले खुबे ढाढ़ुस करुमन बले
हुन दिने, डर काजे फटई नोहलो परादे।”
जहोवा असन बलेसे।