आमोस
1
आमोस, जहूदा चो तकोआ गांव ने छेरी-मेंडी चरातो धोरईमन ले गोटोक रये। जहूदा चो राजा उजियाह आउर इसराएल चो राजा जोआस चो बेटा जरोबाम चो दिनमन ने बललोने, बड़े भुंय-डोल होतोले दुय बरक आगे, इसराएल चो बारे ने आमोस दरसन दखलो।इसराएल चो संद लग चो देसमन चो नियाव
2 आमोस चो गोट,
“जहोवा, बड़े सियोन डोंगरी ले गरजेसे,
जरूसलेम ले आपलो गोट सुनायसे,
धोरईमन चो चरातो भाटामन कुमचुन गेलीसे
आउर बड़े करमेल डोंगरी चो रूक-राई सुकुन गेलीसे।”
3 जहोवा असन बलेसे,
“दमिसक सहर चो तीन ठन पाप काजे ची नाई,
मानतर हुनमन आउर बले* पाप करतो किरता मय हुनमन के डंड देयंदे ची;
कसनबलले हुनमन गिलाद चो लोग के
लोहो चो खोटलामन ले चेपाला।
4 एईकाजे मय, राजा हजाएल चो माहाल के डसायंदे,
जेचोले राजा बेन-हदद चो राज-भाड़ा* बले डसेदे।
5 मय दमिसक सहर चो देवड़ी के तस-नस करेंदे
आवेन कड़की आउर बेत-एदेन चो राजपालमन के,
मय मोरते मारेंदे,
बयरीमन, अराम देस्* चो लोग के बांदुन कीर देस्* ने नेदे।”
जहोवा असन बलेसे।
6 जहोवा असन बलेसे,
“मय, गाजा सहर चो तीन ठन पाप काजे ची नाई,
मानतर हुनमन आउर बले पाप करतो किरता हुनमन के डंड देयंदे ची।
कसनबलले हुनमन, हुता चो सपाय लोग के बांदुन नीला
आउर हुनमन के एदोमीमन चो हक ने करुन दिला।
7 एईकाजे मय, गाजा चो सहर-भाड़ामन के डसायंदे,
जेचोले हुनचो सपाय डेंग भाड़ामन बले डसेदे।
8 मय असदोद आउर असकलोन सहरमन चो
राजपालमन के सत्यानास करेंदे;
मय एकरोन सहर चो बिरुद होयंदे
आउर बाचलो सपाय पलिस्तीमन के सत्यानास करेंदे।”
जहोवा असन बलेसे।
9 जहोवा असन बलेसे,
“सोर राज* चो तीन ठन पाप काजे ची नाई,
मानतर हुनमन आउर बले पाप करतो किरता मय हुनमन के डंड देयंदे ची;
कसनबलले हुनमन, राज चो सपाय लोग के बांदुन नीला आउर एदोम चो हक ने करुन दिला,
आउर भाई-बंधमन संगे मया-दया ने रतो बायदा के भूलकला।
10 एईकाजे मय सोर राज चो सहर-भाड़ामन के डसायंदे,
जेचोले हुनचो राज-भाड़ामन बले डसुन सत्यानास होयदे।”
11 जहोवा असन बलेसे:
“एदोम राज चो तीन ठन पाप काजे ची नाई,
मानतर हुनमन आउर बले पाप करतो किरता मय हुनमन के डंड देयंदे ची;
कसनबलले हुनमन खांडा धरुन आपलो भाईमन के खेदला
आउर हुनमन के खिंडिक बले जीव नी दुखला;
हुनमन चो रीस केबई नी सितरली
अमदेया रीस ने ची रला।
12 एईकाजे मय तेमान सहर के डसायंदे,
जेचोले बोसरा परघन चो भाड़ामन बले डसुन जायदे।”
13 जहोवा असन बलेसे,
“अम्मोनीमन चो तीन ठन पाप काजे ची नाई,
मानतर हुनमन आउर बले पाप करतो किरता मय हुनमन के डंड देयंदे ची;
कसनबलले, हुनमन आपलो परघन के गिलाद ले बड़ातो काजे
पेटेहारिन बायलेमन चो पेट के बले भोसड़ाला।
14 एईकाजे मय, रब्बा सहर चो सहर-भाड़ामन के डसायंदे,
जेचोले हुनचो राज-भाड़ा बले डसुन जायदे,
जुद होतो दिने, लोगमन कोलार होतो बेरा,
बयरीमन लेहरा-धुका असन एदे;
15 आउर हुनचो राजा के
आउर मुखियामन के बले बांदुन नेदे।”
जहोवा असन बलेसे।