29
घन-घन दागा दिले बले जिद करतो बीता,उधापड़े नास होयदे, आउर हुनचो बाचतो काई आसा नी रयदे†।
2 धरमकारी, राज करतो बेरा रयत हरिक ने रयसोत;
मानतर दुसट, राज करतो बेरा लोगमन कहरते रयसोत।
3 बुद के मया करतो बेटा, आपलो बुआ के हरिक करेसे,
मानतर बेसवामन संगे रतो बेटा, हुनचो धन-माल के सत्यानास करेसे।
4 राजा नियाव करुन, देस् के चमकट करेसे,
मानतर जुगे घूस धरु बीता हुनके सत्यानास करेसे।
5 आपलो घर-लग चो लोग संगे फोबाउन गोटेयातो बीता
हुनमन काजे फांदा मंडायसे।
6 अडरा मनुक पाप चो फांदा ने आपने फसुआय,
मानतर धरमकारी हरिक होउन जय-जय करुआय।
7 धरमकारी, गरीब चो हक के धियान देउआय;
दुसट, हुनमन चो काई फिकिर नी करे।
8 हांसी-खेली करतो लोग सहर के डसायसोत,
मानतर बुद बीतामन रीस के सितरायसोत।
9 कोनी बुद बीता, मूरक संगे बला-बली होलोने,
मूरक, जंजाल रीस होउन हुनचो हांसी-खेली करते रयसे।
10 माने मारामन, चोखा लोग के बईर करुआत,
आउर सोज लोगमन चो जीव धरतो घत ने रउआत।
11 मूरक आपलो रीस के समालुक नी सके,
मानतर बुद बीता आपलो रीस के समालेसे।
12 राजपाल फंद गोटमन बाटे धियान देयसे जाले,
हुनचो सपाय कमेयामन दुसट होयसोत।
13 गरीब आउर डाटा-टेवा करु गोटकी कटार आत:
जहोवाचेई, हुन दुनो के जीव संगायसे।
14 जोन राजा, गरीबमन चो सत नियाव करेसे,
हुनचो राजगादी जुग-जुग काजे रयसे।
15 बड़गी आउर सिखातो काजे दिलो दागा ले बुद मिरेसे,
मानतर जोन, लेका के छुट छांडसोत, हुन आपलो आया के लाज पड़ायसे।
16 दुसटमन राज करलोने पाप चो बाड़ती होयसे,
मानतर सरासरी ने धरमकारीमन, हुनमन चो सत्यानास होतो के दखदे।
17 आपलो बेटा के डंड देउन समजाव, तेबे हुन तुचो मन के अस्तिर करेदे
आउर तुय हरिक ने रसे।
18 जोन थाने महापरभु बाटले दरसन नी होयसे, हुता चो लोग नियम-कानुन के नी मानसोत,
मानतर धन-धन आत हुनमन जोन नियम-कानुन के मानसोत।
19 कमेया के सोजे दागा देउन समजाउक नी होये,
कसनबलले हुन समजुन बले नी माने।
20 नी बिचारुन रटफट गोटेयातो बीता ले
आगर आसा, भकवा ले आसे†।
21 कोनी मालिक आपलो कमेया के पिला बेरा ले खुबे मया करलोने
हुन कमेया पाछे, आपलो हक धरुक खोजेदे।
22 रीसाहा, झगड़ा उबजायसे†,
आउर खुबे रीस होतो मनुक पाप उपरे पाप करेसे।
23 गुमान किरता मनुक के लाज पड़ुक होयसे,
मानतर आपने के नानी करु बीता मान पायसे।
24 जोन चोर संगे रयसे, हुन आपलेई जीव चो बईर करुआय;
किरिया खुआउन पूछले बले हुन सत गवई नी देये।
25 डर, लोग काजे फांदा आय,
मानतर जहोवा उपरे भोरसा करले हुनचो रखेया होयदे।
26 खुबे लोग राजपाल के हरिक कराउक मन करसोत,
मानतर जहोवा बाटले ची लोगमन के सत-नियाव मिरेसे।
27 धरमकारीमन, कपटी लोग के घिनियाउआत,
आउर दुसटमन बले चोखा चलनी-बुलनी लोग के घिनियाउआत।