28
दुसटमन, कोनी नी खेदले बले डर काजे पराते रयसोत,मानतर धरमकारीमन, जुवान बीजापुलिया-बाग असन फिकिर नोहलो रयसोत।
2 देस् ने ओधरम बाड़लोने
राजपालमन बले खुबे बनदे;
मानतर राजपालमन, समज आउर गियानी रले
देस् खुबे दिन अस्तिर ने रयदे।
3 जोन राजा, गरीब-धुरीब के डाटा-टेवा करेसे
हुन, सपाय अरन के सत्यानास करतो चमास बेरा चो झिड़-झीड़ा बरसा-पानी असन आय।
4 नियम-कानुन के नी मानतो लोग, दुसटमन चो बड़ाई करसोत,
मानतर नियम-कानुन हिसाब ने चलतो लोग, दुसट चो बिरुद करसोत।
5 अडरा लोग सत-नियाव के नी समजोत,
मानतर जहोवा के डगरातो लोग हुनके नंगत ले समजुआत।
6 चोखा चलनी-बुलनी करु गरीब,
अडरा चलनी-बुलनी करु सवकार ले नंगत आय।
7 जोन बेटा, नियम-कानुन के मानुन चलेसे, हुन बुद बीता आय,
मानतर जोन बेटा, ओधरमीमन संगे मीत बांदेसे, हुन आपलो बुआ चो नाव बुड़ाउआय।
8 जोन कंतर ने देउन आपलो धन-माल चो बाड़ती करेसे†,
हुन धन, गरीबमन के दया करु चो बाटा होयदे।
9 जोन मनुक नियम-कानुन के सुनुक मन नी करे,
हुनचो गुहार के महापरभु घिनियाउआय।
10 जोन सोज लोग के फुसियाउन अडरा बाट ने नेयसे,
हुन आपलो खोड़लो खोदरा ने खुदे घसरेदे,
मानतर दोख नोहलो लोग के, नंगत बाटा चो हक मिरेदे।
11 सवकार आपलो नंजर ने बुद बीता होयसे,
मानतर समज बीता गरीब, हुन सवकार चो बुद चो सत के समजुआय।
12 धरमकारी जीतले, खुबे मयमा होयसे,
मानतर दुसटमन राज करतो बेरा, लोगमन लुकुन रयसोत।
13 आपलो पाप के लुकाउ बीता चो बाड़ती नी होये,
मानतर हुनके मानुन छांडलोने दया पायदे।
14 धन-धन आय हुन मनुक, जोन अमदेया परभु के डरुन चलेसे,
मानतर जोन आपलो मन कटुर करेसे, हुन बिपती ने पड़ेसे।
15 गरीब-धुरीब उपरे राज करु दुसट राजपाल,
नांदतो बीजापुलिया-बाग नोहले लापड़तो भालु असन आय।
16 आपलो रयत के खुबे डाटा-टेवा करतो राजा, भकवा आय;
मानतर ओनियाव ले मिरलो धन के घिनियाउ, खुबे बरक जीव रउआय।
17 माने-मारा मनुक, आपलो दोख किरता
जीवता जीव भर बुलन-घोर होउन रयदे;
हुनचो कोनी साहरा नी करदे।
18 जेचो चलनी-बुलनी चोखा आय, हुनके साहरा मिरेदे,
मानतर जोन अडरा बाट ने हिंडेसे, हुन उधापड़े नास होयदे।
19 आपलो भुंय-बाड़ी के कमाउ बीता पेट-भर खाउआय,
मानतर जोन फोकाहा गोटमन ने उनारु रयसे, हुन गरीब उलटेदे†।
20 पतेयातो लाईक मनुक खुबे बरमन पायदे,
मानतर जोन झटके सवकार होउक मन करेसे, हुन डंड पायदे ची।
21 कोचई पाटेया होतोर नंगत नोआय;
गोटोक गोंदा रोटी काजे ओधरम करतोर बले नंगत नोआय।
22 लालची मनुक धन कमातो काजे हलवाल होउ रयसे,
हुन नी जाने हुनके नोकसान होयदे।
23 सिखातो काजे दागा देउ बीता,
सरासरी ने, फोबातो बीता ले आगर बर पाउआय।
24 जोन आपलो आया-बुआ ले झीका-उड़मा करतोर काई पाप नोआय बलेसे,
हुन उबढंगरी चो संगवारी आय।
25 लालची मनुक झगड़ा उबजायसे,
मानतर जहोवा उपरे भोरसा करतो बीता चो बाड़ती होयसे।
26 आपलेई उपरे भोरसा करतो बीता भकवा आय;
मानतर बुद चो हिसाब ने चलतो बीता बाचेसे।
27 गरीब के दान देतो बीता चो नोकसान नी होये,
मानतर हुनके धियान नी देतो बीता, सराप उपरे सराप पायसे।
28 दुसटमन राज करतो बेरा, लोगमन लुकुन रयसोत;
मानतर हुनमन नास होला जाले, धरमकारीमन बाड़ती करसोत।