27
एतो दिन चो बारे ने ढोंग नी दखाव,कसनबलले तुय नी जानीस काली के काय होयदे।
2 लोग तुचो बड़ाई करोत, तुय आपलो बड़ाई आपने नी कर;
परदेसिया तुके सहराओत, तुय आपने के नी सहराव।
3 पकना बोज रयसे, आउर बारु बले बोज रयसे,
मानतर मूरक चो रीस हुन दुनो ले बले आगर आय।
4 रीस तो दया नोहलो आउर पुर असन आय,
मानतर ईरका-कुचर पुरे कोन उबुक सके?
5 चमाचम दागा देतोर,
लुकलो मया ले नंगत आय।
6 मीत चो हाथ ले पावलो घाव पतेयातो लाईक आय,
मानतर बयरी कपट ले खुबे चूमेसे।
7 मन भरतले खादलो पाछे, ओंडार तेल बले पोचपोचा लागुआय,
मानतर भूके रलो मनुक के कोचेला बले मीठ लागुआय।
8 घर के छांडुन बुलतो बीता हुन चड़ई असन आय,
जोन आपलो गूड़ा के छांडुन बुलते रउआय।
9 जसन बास-तेल आउर धूप, मन के हरिक करुआय,
उसने मीत चो हरिक मन ले दिलो सला, मन के हरिक करुआय।
10 जोन तुचो आउर तुचो बुआ चो बले मीत आय हुनके नी छांड;
आउर आपलो बिपती बेरा आपलो भाई घरे नी जा।
घर-लग चो मया करतो लोग, लापी रतो भाई ले खुबे नंगत आय।
11 ए मोचो बेटा, बुद बीता होउन मोचो मन के हरिक कर,
तेबे मय, मोके बदी देतो लोग के उत्तर देउक सकेंदे।
12 बुद बीता बिपती के दखुन लुकेसे;
मानतर सादा लोग, पुरे जाउन दुख-डंड भोगेसे†।
13 परगांया चो करजा काजे जुमे होउ चो फटई के धर;
परदेसिया चो करजा काजे जुमे होउ ले गाहना मारलो तीज के धर†।
14 जोन बड़े बियाने उठुन आपलो घर-लग चो लोग के बड़े राग ले बर देयसे,
हुनचो काजे एके सराप मानदे।
15 झड़ धरलो बेरा सरलगा पानी थिपतोर
आउर झगड़ीन बायले, दुनो गोटकी कटार आत;
16 जोन हुनके ठेबाउक सके, हुन लेहरा के बले ठेबाउक सकेदे,
आउर उजा हाथ चो मुटा ने तेल के धरु रउक सकेदे।
17 जसन लोहो, लोहो के लागन बनायसे,
उसने नंगत मीत, आपलो मीत के आउर बले नंगत बनायसे।
18 जोन मनुक अंजीर रूक चो दखा-रखा करेसे हुन, हुनचो फर खायसे,
उसने जोन आपलो मालिक चो रखेया करेसे, हुनचो मान पायसे।
19 जसन पानी ने थमना दखुक होउआय,
उसने ची मनुक चो गुन, हुनचो मन चो गोट ले जानुक होउआय।
20 जसन पतालपुर आउर नरक कुंड चो मन केबई नी भोरे,
उसने ची मनुक चो नंजर बले केबई नी भोरे।
21 रूपा के परखतो काजे कुठाली आउर सोन काजे भाटी†,
उसनेची मनुक के फोबानी गोट ले परखुक होयसे।
22 मूरक के ढेकी ने कांडले बले,
हुनचो एड़जा बुता नी छांडे।
23 आपलो छेरी-मेंडी गोहड़ी चो हाल के नंगत ले जान,
आउर आपलो पसु गोहड़ी के नंगत ले दखा-राखा कर;
24 कसनबलले धन-माल अमदेया नी रये,
काय, राज-मुकुट पीड़ी-पीड़ी ले रयदे?
25 काटलो रोंडा के गुचाले, नवा रोंडा अखरेसे,
आउर डोंगरीमन चो उपाय-बुटामन के रूंडायसोत,
26 तेबे तुय मेंडी पिलामन* के बिकुन फटई घेनसे,
आउर बोकड़ामन के बिकुन बेड़ा घेनसे;
27 बोकड़ीमन, इतलो गोरस देदे;
तुय आउर तुचो कुटुम-लोग पेट भर खाहासे
आउर तुचो कमेयीनमन बले हुताले खादे।