26
जसन जेट बेरा करा घसरतोर, आउर कटई बेरा बरसा होतोर नी फोबे,उसने ची मूरक चो मान करतोर बले नी फोबे।
2 जसन चेटिया आउर फारसी-चड़ई उड़ते रयसे,
उसने फोकाहा दिलो सराप बले नी लागे।
3 घोड़ा काजे कोड़ा, गदाहा काजे कासरा,
आउर मूरकमन के मारतो काजे ठेंगा आसे।
4 मूरक के हुनचेई असन भकवा उत्तर नी देस,
नोहले तुय बले हुनचेई कटार होसे।
5 मूरक के, हुनचो भकवा हिसाब ले उत्तर देस,
नोहले हुन आपने के बुद बीता समजेदे।
6 मूरक चो हाथे खबर पठातो बीता,
आपलो पांये टंगिया मारी होलो असन आउर मोहरा खादलो असन आय।
7 जसन खोड़ेया चो खोड़ेयातो पांय फोकाहा आय,
उसने ची भकवा चो टोंडे नीतिबचन फोकाहा आय।
8 जसन गोपेंदा ने पकना बांदुन संगातोर फोकाहा आय,
उसने ची भकवा चो मान करतोर फोकाहा आय।
9 जसन मतवारमन चो हाथे काटा गड़ेसे,
उसने ची एरामन चो टोंड ले निकरलो नीतिबचन चुभेसे।
10 बाट हिंडतो एरामन के नोहले मंदहामन के भूती कराउ बीता,
हुन धनु कांडेया असन आय जोन कोकेई होओ बिंदेसे।
11 जसन कुकुर, आपलो उचार के चाटुआय†,
उसने भकवा, आपलो भकवा बुता के घन-घन करुआय।
12 कोनी बुद नोहलो मनुक, आपने के बुद बीता समजेसे जाले,
भकवा के हुनचो ले आगर आसा आसे†।
13 ठगरा बलेसे, “जोड़ान ने तो बीजापुलिया-बाग आसे!
खोर बाटे बीजापुलिया-बाग आसे!”†
14 जसन कपाट हुनचो कबजा ने किंदरेसे,
उसने ठगरा बले आपलो खटेया ने उलटुन-पुलटुन सोयसे।
15 ठगरा आपलो हाथ थारी ने तो थापेसे,
मानतर ठग किरता आपलो गरास टोंडे नी नेये।†
16 ठगरा आपने के,सात झन समजुन-बुजुन उत्तर देतो बुद बीतामन ले बले
आगर बुद बीता समजुआय।
17 बाट हिंडतो बेरा, दुसर चो झगड़ा ने पड़तो मनुक,
बुला-खाया कुकुर चो कान धरतो बीता असन आसे।
18-19 आपलो घर-लग चो लोग के ठगुन
“मय तो हेंडसाते रले!” बलतो मनुक,
जीव धरतो कांड असन जरतो लुटी के पकातो बोया असन आय।
20 जसन दारु नी रले आईग लिबेसे,
उसने खुसुर-फुसुर करतो लोग नी रले झगड़ा बुतेसे।
21 जसन इंगरा ले मोस आउर आईग ले दारु जरेसे,
उसने ची झगड़ाहा मनुक झगड़ा उबजायसे।
22 खुसुर-फुसुर करुमन चो गोट, मीठ खादी-पीदी असन
पेटे जीरुन जायसे†।
23 कपटी चो फोबानी गोट,
माटी चो कुंडरी ने रूपा चो मईल रचालो असन आय।
24 बयरी, नंगत गोट गोटेयाउन आपने के सोज दखायसे,
मानतर हुनचो मने कपट भोरलीसे;
25 हुनचो फोबानी गोटमन के नी पतेयाव,
कसनबलले हुनचो मने सात ठन घिन-घिना गोटमन लुकालोर आसे;
26 हुन कपट करुन मन चो बईर लुकाले बले,
हुनचो दुसट बुता लोगमन चो मंजी दखा देयदे।
27 जोन खोदरा खोड़ेदे, हुन हुताय घसरेदे,
जोन पकना के उलटायदे, हुन पकना हुनचेई उपरे एउन चेपायदे।
28 फंद गोट ले चेपालो लोग के, फंदी बईर करुआय,
आउर फोबाउन गोटेयातो बीता ले नोकसान होउआय।