राजा सुलेमान चो आउर बले नीतिबचनमन
25
ए नीतिबचनमन बले सुलेमान राजा चो आय; जहूदा चो हिजकियाह राजा चो लिखियारमन, एमन के जुहाउन गोटकी संगे लिखला।2 महापरभु चो मयमा, भेद चो गोटमन ले होयसे,
मानतर राजामन चो मयमा, लुकलो गोटमन के निकरातोने होयसे।
3 जसन बादरी चो डेंग आउर मंजपुर चो गड़िया के जानुक नी होये,
उसने ची राजामन चो मन के बले जानुक नी होये।
4 सोन-रूपा चो मईल गुचालोने,
हुन सोनार के काम देयसे।
5 राजा चो पुरे ले दुसटमन के निकरालोने,
हुनचो आसनगादी धरम बुता किरता चमकट होयदे।
6 राजा चो पुरे आपनेके बड़े नी समज,
आउर बड़े मुखियामन चो ठाने उबा नी हो;
7 मुखिया तुके, “खाले बस” बलतो पलटा,
हुन तुके, “आव, ए लगे उपरे बस,” बलतोर नंगत आय।
8 दखा-सुना गोट काजे हलवाल होउन कचरी ने नी जा;
नोहले पाछे, लोग तुके लाज पड़ादे,
तेबे तुय काय करुक सकसे?
9 आपलो घर-लग चो लोग संगे बला बली होले आपने निपटाहा,
आउर गोटोक-दुसर चो लुकलो गोट लोग के नी सांगा;
10 नोहले लोग तुके लाज पड़ादे,
आउर अमदेया काजे तुचो इजित जायदे।
11 नंगत समया ने बललो गोट,
रूपा चो थारी ने सोन चो सेब असन आय।
12 जसन सोन चो माला नंगत लागुआय,
उसने मानतो लोग के, बुद बीता चो दागा बले नंगत लागुआय।
13 पतेयातो लाईक दूत,
कटई बेरा चो ओस असन
आपलो पठालो मालिक चो जीव के सितर करेसे।
14 दान देतो काजे ढोंग मारतो चोहड़ा-चोहड़ी,
पानी नोहलो बादरी आउर लेहरा असन आत।
15 धीरजा धरुन गोटेयाले राजा के बले मनाउक होउआय,
आउर सुसार गोट सांगले लोग मानुआत।
16 ओंडार-तेल मिरलोने, तुके जितलो खातोर आय हुतलेई खा,
जुगे खादलीस जाले, निकरा-बोक होसे।
17 आपलो घर-लग चो घरे घन-घन नी जा,
नोहले हुन बिरबिरा होउन तुके घिनियायदे।
18 कोचई बिरुद फंद गवई देतो बीता,
हुनचो काजे मुठला, खांडा नोहले गोजेयालो कांड असन आय।
19 दुख-तकलीस बेरा धोका देउ उपरे भोरसा करतोर,
दुखतो दात आउर खोड़ेयातो पांय असन आय।
20 मुरमुरा होलो मनुक पुरे हरिक चो गीत गावतोर,
सीत बेरा कामरा झीकतोर, नोहले घाव ने लोन रिकातोर कटार आय।
21 तुचो बयरी भूके आसे जाले, हुनके रोटी खुआव;
हुन पियास होलोसे जाले, हुनके पानी खुआव;†
22 तुय असन करलीस जाले, हुन आपने लाज पड़ेदे,
आउर जहोवा तुके बर देयदे।
23 बेर-उदिया डेबरी बाट चो लेहरा, बरसा आनेसे,
उसने खुसुर-फुसुर गोट ले, रीस चेगेसे।
24 झगड़ीन बायले संगे घर भीतरे रतो पलटा
एकलाय लाड़ी ने रतोर नंगत आय†।
25 थाकलो मनुक करा पानी खादले, हुनचो जीव के सितर लागुआय,
उसने लापी देस् ले नंगत खबर मिरले, जीव के अस्तिर लागुआय।
26 दुसट चो गोट के मानतो धरमकारी मनुक,
गोरो पजरा आउर केचकेचा चुंआ असन आय।
27 जसन खुबे ओंडार-तेल खातोर नंगत नोआय,
उसने आपलो मान डगरातोर बले नंगत नोआय।
28 जोन मनुक, आपलो मन के समालुक नी सके,
हुन, भाड़ा भोसड़ालो सहर असन आय।