24
दुसटमन के दखुन ईरका नी हो,आउर हुनमन संगे रतो मन-इछा नी कर;
2 कसनबलले हुनमन उबढंगरी गोटमन बिचारते रउआत,
आउर हुनमन चो टोंड ले अडरा गोटमन निकरेसे।
3 बुद ले घर बनेसे,
आउर समज ले घर बसेसे;
4 गियान ले हुनचो खोलीमन,
महांग आउर मन-भावतो सुंदर तीजमन ले भोरेसे।
5 बुद बीता, बलेयार ले बले खुबे बीर आय,
आउर गियानी आपलो बुद ले, सकत बीता ले बले आगर करुक सकुआय;
6 नंगत सला धरुन ची जुद कर,
सला देउमन खुबे रले, जीत मिरेसे†।
7 मूरक, बुद पावतोर खुबे लापी चो गोट आय;
मंडली ने हुन, काई बलुक नी सके।
8 अडरा उआट करतो मनुक के,
लोग दुसट बलुआत।
9 अडरा उआट करतोर पाप आय,
हांसी-खेली करुमन के लोग घिनियाउआत।
10 बिपती बेरा तुय ढाढ़ुस छांडलीस जाले,
तुय कम सकत चो आस;
11 मोरते मारतो काजे नेउमन ले लोगमन के छंडाव,
हुनमन के मोरना ले बचाव;
12 तुय, “आमी हुनके नी जानलु” बलसे जाले,
तेबे काय, मन के परखु महापरभु, एके नी समजेसे?
काय, तुचो जीव के बचाउ, एके नी जानेसे?
काय हुन, सपाय लोग के आपलो बुता हिसाब ले पलटा नी देयदे?†
13 ए मोचो बेटा, तुय ओंडार तेल खा, कसनबलले हुन नंगत आय,
पोरी ले थिपतो ओंडार तेल के बले खा, हुन तुचो टोंडे मीठ लागेदे।
14 उसने बुद बले तुचो जीव काजे मीठ लागेदे;
हुनके मिरालीस जाले, तुचो नंगत होयदे,
आउर तुचो आसा नी टुटेदे।
15 ए दुसट, तुय धरमकारी चो घर उजड़ातो घत ने नी रा;
हुनचो बिसातो ठान के सत्यानास नी कर;
16 कसनबलले धरमकारी सात हार घसरले बले उठेसे;
मानतर दुसटमन बिपती ने पड़ुन रयसोत।
17 तुचो बयरी घसरलोने हरिक नी हो,
हुन हकनले तुचो मन हरिक-उदीम नी होओ,
18 कोन जाने, जहोवा एके दखुन हरिक नी होये,
आउर हुनचो उपर ले आपलो रीस गुचायदे।
19 तुय दुसट लोग किरता फिकिर नी कर।
कपट बुता करुमन ले ईरका नी हो†;
20 कसनबलले अडरा मनुक के सरासरी ने काई भलई नी मिरे;
दुसटमन चो दिया लिबेदे†।
21 ए मोचो बेटा, जहोवा आउर राजा दुनो के डरुन चल,
आउर हुनमन के नी डरतो एड़जा लोग संगे नी मिस;
22 कसनबलले एड़जामन उपरे उधापड़े बिपती एउन पड़ेदे,
जहोवा आउर राजा बाटले हुनमन उपरे एतो बिपती कसन रयदे, कोन जाने?
आउर बले नीतिबचन
23 ए बचन बले बुद बीतामन चो आय:
मुं दखुन नियाव करतोर, नंगत नोआय।
24 जोन, दुसटमन के,“तुमी दोख नोहलो आत,” बलेसे,
हुनके सपाय लोग सरापुआत, आउर जात-जात चो लोग घिनियाउआत;
25 मानतर दुसट के दागा देतो लोग चो भलई होयसे,
आउर हुनके नंगत-नंगत बरमन मिरेसे।
26 सत-मीत चो गोट,
सत रउआय।
27 बाहरी बुता के आगे सार,
आउर बेड़ा-खाड़ा के जतनाव;
पाछे आपलो घर बनाव।
28 आपलो घर-लग चो लोग चो बिरुद फंद गवई नी देस,
आउर आपलो फंद गोट ले हुनके नी फुसियाव।
29 असन नी बल, “मोचो संगे हुन जसन करलो, उसने ची मय बले करेंदे;
मय हुनचो ले पलटा धरेंदे।”
30 मय, ठगरा मनुक चो बेड़ा लगले
आउर मूरक चो अंगुर-पदर लगले गेले;
31 आउर दखले, हुता काटा-बुटामन भोरलीसे;
आउर भुंय, लाटामन ले ढाकी होलीसे,
आउर हुता चो भाड़ा भोसड़लीसे।
32 एके दखुन मने बिचारले;
हव, मय सिखिया पावले।
33 डंडिक आउर सोवते रा, आउर गोटोक झपल मार,
आउर ढिंडा-मिंडा होउन सोवते रा†,
34 तेबे तुचो उपरे गरीबी, खंगार असन
आउर नानागती, हतियार धरलो बीर असन एउन पड़ेदे†।