22
खुबे धन कमातोले, नाव कमातोर नंगत आय,सोन-रुप पावतोले आगर, बर पावतोर नंगत आय।
2 सवकार आउर गरीब दुनो गोटकी कटार आत:
दुनो के जहोवा ची बनालोसे।
3 बुद बीता बिपती के दखुन लुकेसे;
मानतर सादा लोग, पुरे जाउन दुख-डंड भोगेसे†।
4 आपने के नानी करलोने आउर जहोवा के डरुन चललोने
धन, मान, आउर जीव मिरेसे।
5 कपटी चो बाटे, काटा आउर फांदा रयसे;
मानतर आपलो जीव चो रखेया करु, हुनचो ले बाचुन रयसे।
6 पिलामन के नंगत बाट ने चलतो सिखिया देस,
हुन डोकरा होले बले, हुनके नी भुलकेदे।
7 सवकार, गरीब उपरे हक संगाउआय,
आउर लागा धरु बीता, लागा देउ चो कमेया होउआय।
8 जोन ओधरम बुनेदे, हुन बिपती के काटेदे,
आउर हुनचो रीस चो ठेंगा टुटेदे।
9 दया करुमन धन-धन आत,
हुनमन आपलो रोटी गरीब संगे बाटुआत।
10 हांसी-खेली करुमन के निकराहा, तेबे झगड़ा छिड़ेदे;
बला-बली आउर इजित धरतोर बले सरेदे।
11 सुद मन के मने करतो आउर दया ले गोटेयातो बीता
राजा के बले आपलो मीत बनायसे।
12 जहोवा, गियान चो रखेया करुआय,
मानतर धोका देउ चो गोट के फोकाहा करुआय।
13 ठगरा बलेसे, “बाहरे बीजापुलिया-बाग आसे!
जोड़ान ने ची मोके मोरते मारेदे!”†
14 फोबाउन-फोबाउन गोटेयातो बेसवा चो टोंड, गड़िया खोदरा आय;
जहोवा जेचोले रीस होउआय, हुन हुताय घसरुआय।
15 पिलामन चो मने, मूरक गोटमन बांदी होउ रयसे,
मानतर सिखातो काजे पावलो डंड हुनके ढीलेसे।
16 जोन आपलो नफा काजे गरीब के डाटा-टेवा करेसे,
आउर सवकार के भेंट देयसे, ए दुनो ले नोकसान ची होयदे।
बुद बीतामन चो तीस ठन नीतिबचन
17 बुद बीतामन चो बचन:
कान डेरुन मोचो गोट के सुन,
आउर मोचो गियान चो गोटमन बाटे मन लगाव;
18 कसनबलले तुय हुन गोटमन के आपलो मने संगाउन
तुचो टोंड ले गोटेयालोने, ए मन-भावतो लाईक होयदे।
19 तुके जहोवा उपरे भोरसा होओ बलुन
मय आजी तुकेई, ए गोटमन सांगले।
20 तुचो भलई आउर गियान काजे
मय तीस ठन सिखिया-गोटमन लिखेंसे,
21 कि मय तुके सत गोटमन सिखाउक होओ,
तेबे तुय, तुचो पठाउ के सत उत्तर देउक सकसे।
22 कोनी गरीब-धुरीब के झीका-उड़मा नी कर, हुन गरीब आय,
आउर गरीब-दुखी चो बिरुद नियाव-दाव लड़ुन हुनमन के तकलीस ने नी पाड़;
23 कसनबलले जहोवा हुनमन चो नियाव-दाव लड़ेदे,
आउर हुनमन चो झीका-उड़मा करुमन चो जीव धरेदे।
24 रीसाहा मनुक चो मीत नी बना,
आउर झटके रीस होतो बीता चो संगे नी राहा,
25 तुय हुनचो चलनी-बुलनी नी सीख,
आउर तुचो जीव, फांदा ने नी फसो।
26 करजा धरुमन काजे
तुय बाद मारुन जुमे नी हो।
27 तुय लागा भोरुक नी सकलोने
तुचो ओचना के हुनमन झिकुन नेदे।
28 पुरबानी संदमन के,
तुय नी सरकाव†।
29 काय, तुय पक्का कारिगिरी करु के दखलीस?
हुन राजा चो सेवा करेदे, सादा लोग चो तलेया ने नाई।