21
राजा चो मन जहोवा चो हाथे, नाहार चो पानी असन आसे;जोन बाटे हुन मन करेसे, हुनी बाटे टार दखायसे।
2 लोग के आपलो सपाय चलनी-बुलनी नंगत लागुआय,
मानतर जहोवा मन के परखुआय†।
3 जतरा चेगातो ले आगर
जहोवा धरम आउर सत-नियाव ले हरिक होउआय।
4 गरेया-गरेया दखतो आंईक, गुमान करतो मन,
आउर दुसट बुता, ए तीनो पाप आय।
5 नंगत उआट ले मसागत करले, नफा होउआय,
मानतर हरबर होउन बुता करु के नोकसान ची होउआय।
6 ठगा-फारसी ले कमालो धन, उड़तो धुंआरी असन आय,
हुनके डगरातो लोग मोरना के डगरायसोत।
7 दुसटमन चो उबढंगरी बुता हुनमन के ची नास करेदे,
कसनबलले हुनमन धरम बुता करुक मन नी करोत।
8 ओधरमी चो बाट कोकटी-बाकटी रयसे,
मानतर धरमकारी चो चलनी-बुलनी चोखा रयसे।
9 झगड़ीन बायले संगे घर भीतरे रतो पलटा,
एकलाय लाड़ी ने रतोर नंगत आय†।
10 दुसट चो जीव, उबढंगरी बुता करुक मन करुआय;
हुन आपलो घर-लग चो लोग उपरे जीव नी दुखुआय।
11 हांसी-खेली करु के डंड दिले, सादा लोग बुद बीता होउआय;
बुद बीता के सिखिया दिले, हुन आउर बले गियान पाउआय।
12 धरमकारी महापरभु, दुसटमन चो घर उपरे नंजर संगायसे;
आउर हुन, दुसटमन के सत्यानास करेसे।
13 जोन मनुक गरीब चो गुहार के नी सुनेदे,
हुनचो गुहार के बले कोनी नी सुनदे।
14 लुकाउन दिलो भेंट ले रीस सितरुआय;
आउर घुस दिले, जंजाल रीस थामुआय।
15 धरमकारी, सत नियाव ले हरिक होयदे,
मानतर दुसटमन एचो ले सत्यानास होदे।
16 बुद चो बाट के छांडलो मनुक चो ठान
मोरलो लोग चो आत्मा मंजी होयदे।
17 सुख-भोग के मया करु गरीब उलटेदे;
मंद-सूर के मया करु केबई सवकार नी होयदे।
18 धरमकारी चो पलटा दुसट के,
आउर सोज लोग चो पलटा धोका-देउ के डंड मिरेदे।
19 झगड़ीन आउर चिड़चिड़ीन बायले संगे रतो पलटा,
छीड़ा ठाने रतोर नंगत आय।
20 बुद बीता घरे खुबे धन-माल आउर भरपुर तेल रयसे,
मानतर मूरक सपाय के धूर-धानी करेसे।
21 जोन धरम आउर दया चो बाट धरेसे,
हुन, नंगत जीवना, धरम आउर मान पायसे।
22 बुद बीता सेना-मुखिया, बलेयारमन चो सहर-भाड़ा भीतरे ओलुन
हुनमन भोरसा संगातो भाड़ा के भोसड़ाउआय।
23 जोन आपलो टोंड के समालुन गोटेयायसे,
हुन आपलो जीव के बिपती ले बचायसे।
24 जोन गुमान करुन रीस ले बेबार करुआय,
हुन गुमानी आउर टडमी आय। हुनचो नाव टेचराहा आय।
25 ठगरा आपलो लालच किरता मोरुन जायसे,
कसनबलले हुन आपलो हाथ ले बुता करुक ठग होयसे।
26 हुन दिन भर, लालच ची करते रयसे,
मानतर धरमकारी रोजे-दिना दान-पुन करते रयसे।
27 दुसट चो चेगालो जतरा घिन-घिना आय†,
तेबे कपट मन ले चेगालो जतरा कितलो आगर घिन-घिना आय।
28 फंद गवा नास होयदे,
मानतर महापरभु के मानुन सत गोट सांगु बीता जीतेदे।
29 दुसट मनुक आपनेके कटुर दखा देयसे,
मानतर सोज मनुक आपलो चलनी-बुलनी के धियान देयसे।
30 जहोवा चो बिरुद ने, मनुक चो बुद, समज,
आउर काई उआट नी चले।
31 जुद काजे घोड़ा तो तियार रयसे,
मानतर जीततोर जहोवा बाटले ची होयसे।