20
अंगुर-मंद, बुद के गुपायसे, आउर मंद-सूर, झगड़ा उमड़ायसे,हुनके खाउन माततो बीता बुद नोहलो आय।
2 राजा रीस होले, बीजापुलिया-बाग नांदलो असन डरतो लाईक आय,
जोन हुनके रीस चेगायसे, हुनचेई जीव जायसे।
3 लड़ई-झगड़ा ले लापी रतो लोग मान पायसोत,
मानतर मूरकमन लड़ई-झगड़ा ने ची रयसोत।
4 ठगरा, बतर बेरा नांगर नी फांदले
कटई बेरा हुनचो लगे काईची नी रयदे।
5 मनुक चो मने गड़िया पानी असन खुबे बिचारमन आसे,
मानतर समज बीता ची, हुन बिचारमन के चितायसे।
6 खुबे लोग आपनेके सत आय बलुन ढोंग मारुआत,
मानतर पतेयातो लाईक मीत कोके मिरेदे?
7 धरमकारी चो चोखा चलनी-बुलनी किरता,
हुनचो पाछे, पिला-झीलामन बले बर पायसोत।
8 राजा, नियाव चो आसनगादी ने बसुआय,
आउर सपाय अडरा बुता करुमन के फुनुन उड़ाउआय।
9 कोन बलुक सके, “मय आपलो मन के सुद करलेसे,
आउर पाप ले छंडावा पाउन पवितर होलेसे?”
10 किलो-काटा ले ठगुन तोहलतोर आउर आगर-घाट नापतोर,
ए दुनो के जहोवा घिनियाउआय।
11 लेका के हुनचो बुता ले जानुक होयसे,
हुनचो चलनी-बुलनी नंगत आसे कि नाई।
12 सुनतो काजे कान आउर दखतो काजे आंईक,
ए दुनो के जहोवा बनालो।
13 झूमराहा नी हो, गरीब होसे,
चेत आउर बुता कर, तेबे तुके मन-भरतले खाउक मिरेदे।
14 मोलेयातो बेरा लोगमन, “नंगत नोआय, नंगत नोआय” बलसोत,
मानतर घेनलो पाछे, हुनचो बड़ाई मारते बुलसोत।
15 सोन आउर खुबे मनी-मुकतामन तो आसे,
मानतर गियान चो गोट सबुले माहांग मनी-मुकता आय।
16 परगांया चो करजा काजे जुमे होउ चो फटई के धर,
परदेसिया चो करजा काजे जुमे होउ ले गाहना मारलो तीज के धर†।
17 ठगुन कमालो खादी-पीदी मीठ लागेसे,
पाछे टोंडे गोटी-माटी भोरेसे।
18 सोर-सुतर होउन ची काई उआट कर,
आउर नंगत सला धरुन ची जुद कर।
19 खुदियार लुकलो गोट के निकराउआय†,
एईकाजे टाबरा-टाबरी लोग संगे नी राहा।
20 जोन आपलो आया-बुआ के सरापेसे,
हुन सत्यानास होयदे।
21 हलवाल होउन पुरखामन ले धरलो बाटा,
सरासरी ने काई बर चो नी रयदे।
22 तुय नी बल, “मय अडरा बुता चो पलटा धरेंदे”;
तुय जहोवा चो बाट दखते रा, हुनी तुके छंडायदे।
23 आगर-घाट नाप के जहोवा घिनियाउआय,
ठगुन तोहलतो किलो-काटा नंगत नोआय†।
24 मनुक चो डांहका जहोवा ची पक्का करेसे,
तेबे मनुक आपलो बाट के कसन ने जानुक सके?
25 जोन मनुक हलवाल होउन बोदना बोअलोसे,
पाछे नानी जीव करेसे, हुन फांदा ने फसलोसे।
26 बुद बीता राजा, दुसटमन उपरे खोटला चलायसे,
आउर हुनमन के फुनुन उड़ायसे।
27 जहोवा चो उजर, मनुक चो आत्मा आय,
हुन, मनुक चो मन चो सपाय गोटमन के परखेसे।
28 दया आउर सत किरता राजा चो रखेया होयसे,
आउर दया करलोने ची हुनचो राजगादी चमकट रयसे।
29 जुवानमन चो सकत हुनमन चो मयमा आय,
मानतर सियानमन चो पाकलो चूंदी हुनमन चो मान आय।
30 कोड़ा मारले मनुक, अडरा बुता ले लापी गुचेसे,
आउर मार खादले, हुनके चेत चेगेसे।